¿Keniuj uelis tikonixtajtoltis Biblia kemej mitsonyolpaktis uan kemej okachi mitsonpaleuis? Xikonita makuil tayolmajxitilismej tein kinpaleuiani miakej akin kiixtajtoltiaj Biblia.

Xikontemo kampa kuali tiontaixtajtoltis. Xikontemo kampa amo teyi mitsontapololtis, kampa onkas kuali tanex uan kampa amo semi tatsaktos, nejon mitsonpaleuis okachi kuali xikonixtajtolti Biblia.

Xiontaixtajtolti ika se kuali tanemilil. Biblia se netetayokolil tein toueyiTajtsin techmaka. Komo tikonneki maj senkis mitsonpaleui keman tikonixtajtoltis, moneki tikonchiuas ijkon kemej se konetsin kichiua ijkuak kinejmachkaki tein ipopaj kimachtia. Amo xikonkaua maj nion se tanemilil tein amo tapaleuia, kitsakuili maj Dios mitsonmachti (Salmo 25:4).

Xionmotataujti achto ke tionpeuas. Biblia kipia itanemililuan Dios, yejua ika moneki maj techpaleui maj tikajsikamatikan. Yejuatsin motenkaua ke kinmakas iespíritu akin kitajtaniaj (Lucas 11:13). Iyektikatsin espíritu uelis mitsonpaleuis xikonajsikamati keniuj tanemilia toTachijchiujkauj. Uan ijkon kemej panoskej tonalmej tikonajsikamatis hasta “in tamachilisme den kachi ouijke” (1 Corintios 2:10).

Xikonajsikamati tein tikonixtajtoltia. Amo sayoj xiontaixtajtolti. Keman tikonixtajtoltijtos Biblia, xiontanemili itech tein tikonixtajtoltijtok. Xionmotajtani: “¿Toni taman tein kuali kinextij akin ika tajtoua nejin tajkuilol? ¿Keniuj uelis nikchiuas tein nimomachtijtok?”.

Xikonixtali tionmomachtis. Komo tikonneki maj mitsonyolpakti tein tikonixtajtoltia itech Biblia moneki tionmochikauas tionmomachtis teisa tein mitsonpaleuis itech monemilis. Uelis tikonixtalis okachi tikonixmatis Dios, okachi tikonnextis tein kuali, tionmochiuas okachi kuali takat akin namikej oso okachi kuali siuat akin namikej uan okseki tamanok. Satepan xikonixpejpena tajkuilolmej itech Biblia tein mitsonpaleuiskej ijkon xikonchiua. *

Nejin makuil tayolmajxitilismej mitsonpaleuiskej xionpeua, sayoj ke ¿toni mitsonpaleuis maj okachi mitsonyolnotsa tein tikonixtajtoltia itech Biblia? Itech okse tamachtilis tikitaskej.