Keman tejuan kemej itaixpantijkauan Jiova tikmachtiaj aksa ika Biblia, tiknankiliaj tein miakej motajtaniaj, kemej nejin:

•   ¿Keniuj uelis yekmelauj tiyolpakiskej?

•   ¿Keniuj timotokiskej iuan Dios?

•   ¿Toni tein kualtsin kijtoua Biblia ke mochiuati amo uejkaua?

Nikan no tiknankiliaj tein miakej motajtaniaj, kemej nejin:

•  ¿Keniuj nantemachtiaj ika Biblia?

•  ¿Moneki nitaxtauas?

•  ¿Miak tein nantemachtiaj?

•  ¿Kani uelis nitajtanis komo nikneki xinechmachtikan?

•  ¿Uelis sayoj ojpa oso expa nanechmachtiskej?

•  Komo namechiluia ke nikneki xinechmachtikan, ¿monekis nimochiuas itaixpantijkauj Jiova?

•  ¿Uelis nikuis noBiblia?

•  ¿Uelis nikyoleuas aksa maj no kikaki tein timomachtiaj?

•  Komo achto nechmachtiaya se itaixpantijkauj Jiova, ¿uelis oksepa nanechmachtiskej?

•  ¿Nankipiaj se taman tein ika uelis nimomachtis noselti komo amo nikneki maj aksa temachti?

 Se itaixpantijkauj Jiova mitsonmachtis ika Biblia sejse taman tamachtilis. Tiktekitiltiaj amaix ¡Uelis tiyolpakiskej nochipaya! tein chijchiujtok kemej uelis ika se momachtis Biblia, uan ijkon yolik tikonmatis toni tamachtia Biblia uan keniuj tapaleuia tein se momachtia. Nejin video okachi techmelauilia keniuj titamachtiaj.

 Amo. Tikchiuaj ijkon Jesús kiniluij imomachtijkauan: “Amo nantaxtaujkej keman namechmakakej, amo no xitetaxtaualtikan keman nantemakaskej” (Mateo 10:8, Traducción del Nuevo Mundo). Amo kintaxtauiaj akin tamachtiaj uan amo no teyi moneki tikonixtauas komo tiontajtani se Biblia oso se amaix ¡Uelis tiyolpakiskej nochipaya!

 Ixyetok tikitaskej 60 tamachtilismej. Tejuatsin tikonijtos kejkemanian tionuelis uan ox sejse tamachtilis nankiitaskej oso sayoj tepitsin. Miakej kiixtaliaj momachtiskej se tamachtilis itech semana uan oksekin okachiok.

1.  1. Nikan xiontajtani maj mitsonkalpanokan. Tein tikonualtitanis amo tikuiskej okseko, ta sayoj ika timitsontemoskej.

2.  2. Mitsontemos se akin mitsonmachtis ika Biblia. Yejua mitsonmelauilis keniuj namomachtiskej ika Biblia uan tein tikonnekis tikonmatis uelis mitsonmelauilis.

3.  3. Tejuatsin uan akin mitsonmachtis namotenkauaskej kemanian namomachtiskej. Uelis mitsonmachtitiuj kampa tikonijtos. No uelis mitsonmachtis ika teléfono, videollamada, correo oso correo electrónico. Uelis mitsonmachtis se hora ijkon kemej tiuejkauaj iniuan oksekin, oso se tajko hora oso tein tionuelis.

 Kemaj. Sayoj moneki nikan xiontajtani maj mitsonkalpanokan. Keman akin mitsonmachtis mitsontemos, xikonilui ke sayoj tikonneki maj mitsonmachti ojpa oso expa para tikonitas ox tikonuelita tein tionmomachtia. Yejua mitsonmachtis ika folleto ¡Uelis tiyolpakiskej nochipaya! tein kipia sayoj eyi tamachtilis tein ika se peua se momachtia.

 Amo. Itaixpantijkauan Jiova kiuelitaj tamachtiskej ika Biblia, sayoj ke amo akin kichiualtiaj maj mochiua itaixpantijkauj Jiova. Sayoj titenextiliaj ika poujkaitalis tein kijtoua Biblia uan tikmatij ke sejsemej kinnamiki kiixpejpenaskej toni kineltokaskej (1 Pedro 3:15).

 Kemaj. Uelis tikonkuis tein yeski Biblia tein tikonnekis. Maski tejuan techpaktia tikuiskej Traducción del Nuevo Mundo porin ajsitok tanemililmej tein kipia uan kuali moajsikamati, tikmatij ke miakej kiuelitaj kikuiskej ininBiblia tein kuali kiixmatijya.

 Kemaj. Uelis yetoskej akin nemij mokalijtik oso akin tikonnekis tikonyoleuas.

 Kemaj. Tein melauj, xa okachi tikonuelitas tionmomachtis axkan porin tein ika titamachtiaj chijchiujtok kemej tapaleuis itech totonaluan. Axkan okachi tikitstiyouij videos uan kemej yeskia sayoj timonojnotstoskiaj keman timomachtiaj.

 Kemaj. Maski miakej okachi kuali momachtiaj komo aksa kinnextilia, sekin yekinika kinekij momachtiskej ininselti. Tejuatsin uelis tikonkuis “Nepaleuilmej tein ika uelis se momachtis Biblia” tein amo moixtaua. Seki yejua nejin:

•   Videos tein ika tajtoua Biblia. Nejin videos tein amo uejkauaj kimelauaj tein Biblia tamachtia.

•   Tein timotajtaniaj de Biblia. Kipia tataman tamachtilis kampa monankilia ika Biblia miak taman tein timotajtaniaj.