Marcos 12:1-44
-
Sekimej tlakamej okimiktijkej itelpoch inteko (1-12)
-
Dios uan César (13-17)
-
Jesús okijto tlen panos ijkuak kinyolitiskej akinmej yoixpolikej (18-27)
-
Ome tlanauatilmej tlen okachi inpati (28-34)
-
¿Cristo ikone David? (35-37a)
-
Amo matikchiuakan tlen okichiuayaj akinmej otlamachtiayaj tlanauatil (37b-40)
-
Se siuatl okintemakak ome tomintsitsintin (41-44)
12 Jesús opejki kintlapouia ika neskayomej* uan okinmilui: “Se tlakatl okitokak uva uan okitlatsakui. Noijki otlayektlali kanin kipatskaskiaj uva uan okichi se torre. Satepan okinkajteuili sekimej tlakamej makitekipanokan uan ye oyajki okse altepetl.
2 Ijkuak ochikauak uva, okititlanki se tlakeuali makintlajtlaniliti nonmej tlakamej makimakakan tlen ye iaxka.
3 Pero yejuan okikitskijkej tlakeuali, okiuitekej uan san ijkon okikopkej.
4 Tlakatl okititlanki okse tlakeuali pero nin okikuauitekej uan okiuijuikaltijkej.
5 Satepan okititlanki okse tlakeuali pero okimiktijkej. Satepan okintitlanki okachi miakej tlakeualmej, pero sekimej okinuitekej uan oksekimej okinmiktijkej.
6 Nin tlakatl okipiaya se itelpoch tlen okitlasojtlaya. Saiktlami okititlanki itelpoch porque omokuayejyeko:* ‘Notelpoch kitlakaitaskej’.
7 Pero nonmej tlakamej okimoluijkej: ‘Ye nin telpochtli kitlakajteuiliskej. ¡Xiualakan, matikmiktikan uan ijkon tikmokauiskej tlen kikajteuiliskej!’.
8 Okikitskijkej, okimiktijkej uan okikixtijkej kanin otoktoka uva.
9 ¿Tlen kichiuas tlakatl tlen iaxka uva? Kinmiktiti nonmej tlakamej uan itlal kanin toktok uva kinkajteuilis oksekimej tlakamej.
10 ¿Amo keman onankitlajtoltijkej iTlajtol toTajtsin Dios kijtoua: ‘Tetl tlen amo okinekej akinmej kalchiuaj, omochi tetl tlen okachi tlakitskijtok’?*
11 ¿Amo onankitlajtoltijkej: ‘Jehová ijkon okichi uan techtlajtlachialtia’?”.
12 Akinmej okikokoliayaj Jesús, okajsikamatkej tlen okijto yejuan okinmiluijtoka ikinon okinekiayaj kitsakuaskej, pero omomojtiayaj porque ompa okatkaj oksekimej. Ompa okikajtejkej uan oyajkej.
13 Satepan Jesús okintitlanilijkej sekimej fariseos uan sekimej tlen okipaleuiayaj Herodes para kitlapololtiskiaj.
14 Ijkuak okajsitoj, okiluijkej: “Tlamachti, tejuan tikmatij amo keman titlakajkayaua. Amo mitstekipachoua tlen oksekimej kijtouaj uan amo titechikoita. Te titlamachtia tlen kineki toTajtsin Dios. Techilui, ¿moneki tiktlatlaxtlauiliskej César noso amo?
15 ¿Moneki titlatlaxtlauaskej noso amo?”. Pero Jesús okitak okipiayaj ome inmixko uan okinmilui: “¿Tleka nantechyejyekouaj? Xikualikakan se denario* para nikitas”.
16 Yejuan okiualikilijkej uan ye okintlajtlani: “¿Akin ixko nikan mota uan akin itoka nikan ijkuilitok?”. Yejuan okinankilijkej: “Ye César”.
17 Jesús okinmilui: “Xikmakakan César tlen iaxka César pero xikmakakan Dios tlen iaxka Dios”. Yejuan omotlajtlachialtijkej ijkuak okikakej tlen okinnankili.
18 Satepan oajsitoj saduceos tlen amo okineltokayaj kinyolitiskej akinmej yoixpolikej. Yejuan okiluijkej:
19 “Tlamachti, Moisés okijkuilo tla ikni se tlakatl ixpoliui uan amo okinpixki ikoneuan iuan isiua, non tlakatl moneki monamiktis iuan siuatl. Ijkon konemej tlen kinpiaskej yetoskej iaxkauan akin oixpoliuik.
20 Itech se familia okatkaj chikome iknimej. Telpochtli tlen otlayekanaya* omonamikti pero oixpoliuik uan amo okinpixki ikoneuan.
21 Satepan okse ikni omonamikti iuan non siuatl pero noijki oixpoliuik uan amo okinpixki ikoneuan. Okse ikni noijki ijkon okipanok.
22 Chikome iknimej amo okinpixkej inkoneuan. Ijkuak nochtin yoixpolikej, siuatl noijki oixpoliuik.
23 Ijkuak kinyolitiskej akinmej yoixpolikej, ¿akin kimokauis non siuatl? Porque chikome iknimej iuan omonamiktijkej”.
24 Jesús okinnankili: “Namejuan nanmotlapololtiaj porque amo nankajsikamatij iTlajtol toTajtsin Dios nion ichikaualis.
25 Ijkuak kinyolitiskej akinmej yoixpolikej, tlakamej uan siuamej amo monamiktiskej porque yetoskej ken ángeles.
26 ¿Amo onankitlajtoltijkej libro tlen okijkuilo Moisés kanin tlajtoua itech xiuitl uitsyo? ToTajtsin Dios okijto kinyolitis akinmej yoixpolikej ijkuak okilui Moisés: ‘Ne niiDios Abrahán, niiDios Isaac uan niiDios Jacob’.
27 Ye inDios akinmej yoltokej uan amo inDios akinmej yoixpolikej. Namejuan nanmotlapololtiaj”.
28 Se tlakatl tlen otlamachtiaya tlanauatil okikak tlen omotlapouijtokaj. Ye okitak Jesús kuali okinnankili ikinon okitlajtlani: “¿Katli tlanauatil okachi ipati?”.
29 Jesús okinankili: “Tlanauatil tlen okachi ipati ye nin: ‘Xitlakakikan israelitas. Jehová toDios ye san se Jehová.
30 Xiktlasojtla Jehová moDios ika nochi moyolo, ika nochi moyolilis, ika nochi motlayejyekol* uan ika nochi mochikaualis’.
31 Onka okse tlanauatil tlen kijtoua: ‘Xikintlasojtla oksekimej ijkon ken te timotlasojtla’. Amo onka okse tlanauatil okachi ipati ken ninmej ome tlanauatilmej”.
32 Tlakatl tlen otlamachtiaya tlanauatil okilui Jesús: “Kuali otitlanankili Tlamachti uan melauak tlen otikijto: ‘Ye san se uan amo onka okse ken ye’.
33 Moneki tiktlasojtlaskej ika nochi toyolo, ika nochi totlayejyekol* uan ika nochi tochikaualis. Noijki moneki tikintlasojtlaskej oksekimej ken tejuan timotlasojtlaj. Non okachi ipati uan amo nochi tlen tiktliokoliaj* toTajtsin Dios”.
34 Jesús okitak kuali otlanankili non tlakatl uan okilui: “Amo uejka tika para tikalakis itech iTekiuajkayo toTajtsin Dios”. Ijkuakon ayakmo ikaj omixeui itlaj kitlajtlanis.
35 Jesús ok otlamachtijtoka itech templo uan okintlajtlani: “¿Tleka akinmej tlamachtiaj tlanauatil kijtouaj Cristo ikone David?
36 Espíritu santo okichi David makijto: ‘Jehová okilui noTeko: “Ximotlali noyekma hasta manikintlali mokxitlampa akinmej mitskokoliaj”’.
37 Tla David kinotsa noTeko, ¿ken uelis yetos ikone?”.
Miakej tlen ompa okatkaj okinpaktiaya kikakiskej Jesús.
38 Ye okinmilui ijkuak otlamachtijtoka: “Ximomaluikan porque akinmej tlamachtiaj tlanauatil kinpaktia nentinemiskej ika intlaken ueyak. Noijki kinpaktia makintlajpalokan tiankisko.
39 Kinpaktia motlaliskej tlayekapan itech sinagogas,* uan itech iluitl motlaliaj kanin nochtin kinmitaskej.
40 Kimoaxkatiaj tlen inmiaxka siuamej tlen yoixpoliuik innamik. Noijki uejkauaj motlatlaujtiaj para kintlajtlachialtiskej oksekimej. Yejuan okachi kintlajyouiltiskej”.
41 Jesús omotlali kanin uelis kinmitaskia akinmej okitemakayaj tomin para templo. Okitak okitemakayaj miak tomin akinmej miak okipiayaj.
42 Satepan oajsito se siuatl tlen yoixpoliuik inamik uan amo okipiaya miak tlamantli. Ye okintemakak ome tomintsitsintin.*
43 Jesús okinnotski idiscípulos uan okinmilui: “Ne namechiluia, nin siuatsintli maski amo kipia miak tlamantli okitemakak okachi miak tomin uan amo ken oksekimej.
44 Porque oksekimej okitemakakej tlen ayakmo kinejnekij.* Pero nin siuatsintli tlen amo kipia miak tlamantli okitemakak nochi tlen okipiaya”.
Notas
^ Noso “ejemplos”.
^ Noso “omonejneuili”.
^ Noso “tlachikajtok”.
^ Xikita diccionario.
^ Noso “okatka okachi ueyi”.
^ Noso “motlanemilil”.
^ Noso “totlanemilil”.
^ Noso “tlen tiktlatiliaj uan yolkamej tlen tikinmakaj”.
^ Xikita diccionario.
^ Noso “leptones”.
^ Noso “kitekitiltiaj”, “kikuij”.
