Romanos 1:1-32
1 Ne niPablo uan niktekichiuilia Cristo Jesús. Ye onechpejpenki maniyeto apóstol uan maniktematilti kuali tlajtoli tlen kitemaka toTajtsin Dios.
2 ToTajtsin Dios yiuejkika okijto nin kuali tlajtoli itech iTlajtol ika iprofetas.
3 Nin kuali tlajtoli kitematiltia akin iKone tlen omochi se tlakatl uan okiski itech ifamilia David.
4 Ye melauak iKone toTajtsin Dios porque ika espíritu santo okiyoliti (ye toTeko Jesucristo
5 tlen techpaleuia matechtliokolikan tlen kuali. Jesús onechpejpenki maniyeto apóstol para manikinpaleui akinmej chantij itech nochi altepemej. Ijkon matlaneltokakan, matetlakamatikan* uan makitlakaitakan itoka.
6 Itech nonmej altepemej, namejuan noijki onamechpejpenkej para xikchiuakan ken Jesucristo).
7 Namechtlajkuililia namejuan tlen nanchantij Roma. ToTajtsin Dios namechtlasojtla uan onamechpejpenki xiyetokan nanyolchipauakej.
ToTajtsin Dios uan toTeko Jesucristo manamechtliokolikan tlen kuali uan manamechmakakan yolseuilistli.
8 Achto, ika itoka Jesucristo niktlasojkamatilia toTajtsin Dios porque ipan nochi tlaltikpak kijtouaj namejuan nantlaneltokaj.
9 Ne niktekichiuilia toTajtsin Dios ika nochi noyolo ijkuak niktematiltia kuali tlajtoli tlen kijtoua akin iKone. Ye kimati nochipa namopatka nimotlatlaujtia.
10 Noijki niktlatlaujtia toTajtsin Dios manechkauili manamechtlajpaloti tla ye kineki.
11 Nikneki namechitas uan namechyolchikauas para okachi kuali ximouikakan iuan toTajtsin Dios,
12 noso timosepanyolchikauaskej porque nantlaneltokaj uan ne noijki nitlaneltoka.
13 Nokniuan, nikneki xikmatikan miak uelta oniknekiaya namechtlajpaloti, pero amo niueli porque itlaj nechtsakuilia. Oniknekiaya ompa nitlamachtiti para miakej mamochiuakan discípulos ijkon ken onikchi itech okseki altepemej.
14 Moneki nikinpaleuis griegos uan akinmej uitsej itech okseki altepemej, ixtlamatkej uan akinmej amo ixtlamatkej.
15 Ikinon nikneki namechmatiltiti kuali tlajtoli ompa Roma.
16 Ne amo nipinaua niktematiltis kuali tlajtoli. Porque kuali tlajtoli kiteititia ichikaualis toTajtsin Dios uan kinpaleuia mamomakixtikan akinmej tlaneltokaj. Achto okimatkej judíos uan satepan griegos.
17 Kuali tlajtoli kinmititia akinmej tlaneltokaj toTajtsin Dios kichiua tlen kuali uan non kinpaleuia okachi matlaneltokakan. Ijkon ken ijkuilitok: “Akin yolkuali yoltos porque tlaneltoka”.
18 ToTajtsin Dios desde iluikak kiteititia kikualaniaj akinmej amo kitlakamatij* uan kichiuaj tlen amo kuali. Yejuan amo kinkauiliaj oksekimej makimatikan tlen melauak.
19 Yejuan moneki kixmatiskej toTajtsin Dios porque ye yokinmititi miak tlamantli.
20 Maski amo tikitaj toTajtsin Dios uelis tikixmatiskej tla timomachtiaj ken okichijchi tlaltikpak uan tla tikitaj nochi tlen okichijchi. Nochi non kiteititia ichikaualis amo keman tlami uan kiteititia ye melauak toTajtsin Dios, ikinon amikaj uelis kijtos amo onka toTajtsin Dios.
21 Maski okixmatiayaj toTajtsin Dios, amo okiueyichijkej nion amo okitlasojkamatilijkej. Opejki mokuayejyekouaj* miak tlamantli amitlaj ipati, inyolo opejki kintlapololtia uan amitlaj okajsikamatkej.
22 Yejuan omomachiliayaj ixtlamatkej pero okuatlapolojkej.
23 Amo kiueyichiuaj toTajtsin Dios tlen nochipa yoltok. Yejuan kinueyichiuaj imágenes tlen motaj ken tlakamej,* totomej, yolkamej tlen kinpiaj naui inmikxiuan uan yolkamej tlen motilanaj.
24 ToTajtsin Dios okinkauili makichiuakan tlen pitsotik kinyoltilana uan ijkon okisokiotijkej incuerpo.
25 Yejuan ayakmo okineltokakej akin melauak toTajtsin Dios uan opejki kineltokaj tlen amo melauak. Okitekichiuilijkej uan okiueyichijkej nochi tlen onka uan amo okiueyichijkej akin otlachijchi. Ye moneki nochipa tikueyichiuaskej. Amén.
26 Ikinon toTajtsin Dios okinkauili pitsotik maauilnemikan. Siuamej ayakmo kinekij motekaskej inuan tlakamej porque san kinekij motekaskej inuan siuamej.
27 Tlakamej noijki ayakmo kinekij motekaskej inuan siuamej. San kinekij motekaskej inuan tlakamej uan kichiuaj tlen pitsotik. Yejuan inselti motlajyouiltiaj porque tlajtlakolchiuaj.
28 Yejuan amo okinekej kixmatiskej toTajtsin Dios, ikinon ye okinkauili amo kuali mamokuayejyekokan* para makichiuakan tlen amo moneki kichiuaskej.
29 Kichiuaj nochi tlen amo kuali, tlajtlakolchiuaj, tlaixnekij uan amo yolkualmej. Tenexikolitaj, temiktiaj, mokualaniaj, tlakajkayauaj, kinekij matlajyouikan oksekimej uan san tlateneuaj.*
30 Kinteneuaj* oksekimej para amo kuali makinmitakan, kikokoliaj toTajtsin Dios, tlauijuikaltiaj, tetlauelitaj uan moueyinekij. Mokuayejyekouaj* kichiuaskej tlen amo kuali uan amo kintlakamatij* inpapanuan.
31 Amitlaj kajsikamatij, amo kichiuaj tlen kijtouaj, amo tetlasojtlaj uan amo teiknomatij.
32 Yejuan kuali kimatij toTajtsin Dios yokijto mikiskej akinmej ijkon kichiuaj. Pero yejuan ok ijkon kichiuaj uan noijki pakij ijkuak oksekimej ijkon kichiuaj.
Notas
^ Noso “matlauelkakikan”.
^ Noso “kiuelkakij”.
^ Noso “monejneuiliaj”.
^ Ika griego moijtoua “tlakamej tlen ixpoliuij”.
^ Noso “mamonejneuilikan”.
^ Noso “teijtouaj”, “tepojpouaj”.
^ Noso “kinmijtouaj”, “kinpojpouaj”.
^ Noso “monejneuiliaj”.
^ Noso “kinuelkakij”.
