Romanos 7:1-25
7 Axkan namechtlapouia namejuan tokniuan tlen nankixmatij tlanauatil. ¿Amo nankimatij ijkuak se tlakatl yoltok kinauatia iTlanauatil Moisés?
2 Tlanauatil kijtoua se siuatl moneki yetos iuan inamik ijkuak ok yoltok. Pero tla inamik ixpoliuis, ayakmo moneki kitlakamatis* tlanauatil kanin kijtoua moneki iuan yetos.
3 Non siuatl auilnemis* tla monamiktis iuan okse tlakatl ijkuak inamik ok yoltok. Pero tla inamik ixpoliuis uan monamiktis iuan okse tlakatl amo kijtosneki auilnemis,* porque ayakmo moneki kitlakamatis* tlanauatil kanin kijtoua moneki yetos iuan inamik.
4 Nokniuan, icuerpo Cristo noijki namechmakixtia imak iTlanauatil Moisés. Ijkon opanok para manamechnauati Cristo akin okiyolitijkej. Ijkon matikchiuakan tlen toTajtsin Dios kipaktia.
5 Ijkuak otikchiuayaj tlen okinekiaya tocuerpo, iTlanauatil Moisés otechpaleui matikajsikamatikan tocuerpo kineki matikchiuakan tlen amo kuali para matitlajtlakolchiuakan. Nochi non tlamantli kichiua matiixpoliuikan.
6 Pero axkan yotechmakixtijkej imak iTlanauatil Moisés porque Tlanauatil ayakmo technauatia. Axkan tiktekichiuiliaj toTajtsin Dios porque techyekana espíritu santo uan amo porque techyekana tlanauatil tlen okijkuilojkej.
7 ¿Tlen tikijtoskej? ¿Kijtosneki iTlanauatil Moisés se tlajtlakoli? ¡Amo! ITlanauatil Moisés onechpaleui manikmati tlen kijtosneki tlajtlakoli. Ne amo nikmatiskia tlen kijtosneki matitlaixnekikan tla iTlanauatil Moisés amo kijtoskia “amo xitlaixneki”.
8 Pero tlajtlakoli omokitski itech tlanauatil uan okichi manitlaixneki. Porque ne amo onikmatiaya tlen kijtosneki tlajtlakoli ijkuak amo okatka tlanauatil.
9 Ne oniyoltoka ijkuak amo okatka tlanauatil. Pero ijkuak oajsiko tlanauatil, tlajtlakoli omoyoliti uan ne onixpoliuik.
10 Noijki onikmatki tlanauatil tlen nechpaleuiskia maniyolto okichiuaya maniixpoliui.
11 Porque tlajtlakoli omokitski itech tlanauatil, onechkajkaya uan onechmikti.
12 Pero iTlanauatil Moisés chipauak. Tlen ompa kijtoua chipauak, melauak uan kuali.
13 ¿Kijtosneki itlaj kuali onechmikti? ¡Amo! Onechmikti tlajtlakoli. Tlanauatil techpaleuia pero okiteititi tlajtlakoli onechmikti. Tlanauatil okiteititi tlajtlakoli sapanoua amo kuali.
14 Tejuan tikmatij tlanauatil iaxka toTajtsin Dios, pero ne san nitlakatl uan onechnemakakej imak tlajtlakoli.
15 Amo nikajsikamati tlen nikchiua, porque nikchiua tlen nikkokolia uan amo nikchiua tlen nikneki.
16 Pero nikneltoka iTlanauatil Moisés tlapaleuia tla nikchiua tlen amo nikneki.
17 Pero axkan ayakmo ne nikchiua non tlamantli, kichiua tlajtlakoli tlen nikpia.
18 Ne nikmati amitlaj kuali nikpia itech nocuerpo tlajtlakole. Amo ueli nikchiua tlen kuali maski nikneki nikchiuas.
19 Amo nikchiua tlen kuali maski nikneki nikchiuas, porque nikchiua tlen amo kuali maski amo nikneki nikchiuas.
20 Tla nikchiua tlen amo nikneki nikchiuas, ayakmo ne nikchiua non tlamantli, kichiua tlajtlakoli tlen nikpia.
21 Ne nikita nikpia nin tlanauatil tlen nechnauatia: ijkuak nikneki nikchiuas tlen kuali, tlen amo kuali nouan kajki.
22 Noyolipan nechpaktia itlanauatil toTajtsin Dios,
23 pero itech nocuerpo kajki okse tlanauatil tlen kixnamiki itlanauatil notlayejyekol.* Tlanauatil tlen kajki itech nocuerpo ye tlajtlakoli uan nechnauatia.
24 ¡Nimialma! ¿Akin nechmakixtis itech nin cuerpo tlen kichiua manimiki?
25 Niktlasojkamatilia toTajtsin Dios porque ye onechpaleui ika tlen okichi toTeko Jesucristo. Tlen nimokuayejyekoua* kajki imak itlanauatil toTajtsin Dios pero nocuerpo kajki imak tlajtlakoli.
Notas
^ Noso “kiuelkakis”.
^ Noso “kikajkayauas inamik”.
^ Noso “kikajkayauas inamik”.
^ Noso “kiuelkakis”.
^ Noso “notlanemilil”.
^ Noso “nimonejneuilia”.
