Santiago 4:1-17
4 ¿Tleka nanmokualaniaj uan nanmotsatsajtsiliaj? Porque nanmoyekanaj ika tlen namechyoltilana uan kixnamiki tlen kuali nankinekij nankichiuaskej.
2 Namejuan itlaj nankinekij pero amo nankipiaj. Nantemiktiaj uan nantlaixnekij pero amo ueli nankipiaj tlen nankinekij. Nanmokualaniaj uan nanmotsatsajtsiliaj. Amitlaj nankipiaj porque amo nankitlajtlanij.
3 Amo nankiseliaj ijkuak itlaj nankitlajtlanij porque nankitlajtlanij para nankichiuaskej tlen amo kuali uan tlen kineki namocuerpo.
4 Namejuan tlen onankikajkej toTajtsin Dios, ¿amo nankimatij tla nankipatioitaj tlen amo kuali kichiuaj oksekimej kijtosneki amo nanmouikaj iuan toTajtsin Dios? Porque akin kineki kichiuas tlen amo kuali kichiuaj oksekimej kijtosneki mochiua ikokolikni toTajtsin Dios.
5 Noso ¿nankijtouaj san nenka iTlajtol toTajtsin Dios kijtoua: “Toyolo kichiua matitlaixnekikan uan matimoxikokan”?
6 Pero toTajtsin Dios kiteititia okachi kitetliokolia tlen kuali ikinon iTlajtol kijtoua: “ToTajtsin Dios kinmixnamiki akinmej moueyinekij pero kintliokolia tlen kuali akinmej yolyamankej”.
7 Ikinon xikkauilikan toTajtsin Dios manamechyekana pero xikixnamikikan Diablo uan ye namechcholilis.
8 Ximotokikan inauak toTajtsin Dios uan ye namonauak motokis. Namejuan tlen nantlajtlakolchiuaj, ayakmo xikchijtinemikan tlen amo kuali ken yetoskia nankinchipauaj namomauan. Xikchipauakan namoyolo namejuan tlen amo nankimatij tlen nankichiuaskej.
9 Ximoyolkokokan, xielsijsiuikan uan xichokakan. Moneki xichokakan uan amo xiuetskakan. Moneki ximotekipachokan uan amo xipakikan.
10 Ximochiuakan nanyolyamankej ixpan Jehová uan ye namechueyitlalis.
11 Nokniuan, ayakmo xikinteneuakan* oksekimej. Tla ikaj kiteneua* se tokni noso kitlajtlakoltia ikni, kijtosneki kiteneua tlanauatil uan kitlajtlakoltia tlanauatil. Tla te tiktlajtlakoltia tlanauatil kijtosneki tijuez uan amo tiktlakamati* tlanauatil.
12 San toTajtsin Dios kintemaka tlanauatilmej uan san ye Juez. Ye uelis temakixtis uan teixpolos. Pero ¿akin te para tikinteneuas* oksekimej?
13 Axkan techkakikan namejuan tlen nankijtouaj: “Axkan noso mostla tiaskej okse altepetl uan ompa timokauaskej se xiuitl. Titlasemanaskej uan tiktlaniskej tomin”.
14 Pero namejuan amo nankimatij tlen namechpanos mostla. Porque nanyetoskiaj ken mixtli tlen monextia uan san niman ualpoliui.
15 Okachi kuali xikijtokan: “Tla Jehová kineki, tiyoltoskej uan tikchiuaskej seki tlamantli”.
16 Pero axkan namejuan nanmoueyinekij porque nankijtojtinemij miak tlamantli. Amo kuali nochi non tlamantli tlen nankijtojtinemij.
17 Ikinon tla ikaj kimati tlen kuali moneki kichiuas pero amo kichiua kijtosneki yitlajtlakolchijtok.
Notas
^ Noso “xikinmijtokan”, “xikinpojpouakan”.
^ Noso “kijtoua”, “kipojpoua”.
^ Noso “tikuelkaki”.
^ Noso “tikinmijtos”, “tikinpojpouas”.
