“¡Yokipiaya 19 xiuitl onikchixtoka!”. ¿Tlen okichixtoka tokni? Okichixtoka Traducción del Nuevo Mundo de las Escrituras Griegas Cristianas ika itlajtol bengalí. Miakej ijkon kijtouaj ijkuak kisa Traducción del Nuevo Mundo ika intlajtol. ¿Yotimotlajtlani kox onka miak tekitl ijkuak kinchiuaj biblias?

 Achto kintlaliaj tokniuan tlen tlajtolkopaskej ijkon ken kijtouaj tokniuan tlen tlapaleuiaj itech Comité de Redacción del Cuerpo Gobernante. ¿Keski xiuitl uejkauaj ijkuak kitlajtolkopaj Biblia? Tokni Nicholas Ahladis tlen tlapaleuia itech Servicios de Traducción ompa Warwick Nueva York, okijto: “Onka miak tlamantli tlen kitaj ijkuak tlajtolkopaj. Kitaj keski tlajtolkopaskej, kox oui intlajtol noso akinmej kitlajtoltiskej kox kimatij ken okatka yiuejkika. Noijki kitaj kox tlatlamantli tlajtouaj. Ijkuak kitlajtolkopaj Escrituras Griegas Cristianas uejkauaj kanaj se noso eyi xiuitl. Pero ijkuak kitlajtolkopaj nochi Biblia uejkauaj kanaj naui xiuitl noso okachi. Akinmej tlajtolkopaj ika señas okachi uejkauaj”.

 Ijkuak kitlajtolkopaj Biblia miakej tlapaleuiaj uan amo san yejuan akinmej tlajtolkopaj. Kinpejpenaj sekimej tokniuan tlen chantij itech okseki altepemej para ma kitlajtoltikan tlen kitlajtolkopaj uan kichiuaj ika nochi inyolo. Tlen yejuan kijtouaj tlapaleuia ma yeto ijkon ken ijkuilitok uan amo oui ma moajsikamati. Se tokni tlen kajki Sudáfrica uan kinmachtia akinmej kitlajtolkopaj Biblia, okijto: “Akinmej tlajtolkopaj kipiaj se ueyi tekitl ixpan Jehová uan noijki inmixpan akinmej kitlajtoltiaj iTlajtol”.

 Ijkuak tlami kitlajtolkopaj Biblia, moneki kichiuaskej impresión, ik non, imprenta moneki kipias seki tlamantli. Amatl, tinta, nochi tlen ika kikimilouaj, tlen ika tlapepechouaj, itlaj tlen kitlaliliaj uan mota plata, cintas, cartón, tlen ika sasalitok Biblia uan okseki tlamantli. Itech 2019 okitlaxtlajkej kanaj trescientos noventa y cinco millones ciento sesenta mil pesos (20 millones de dólares) tlen ika okikojkej nochi nin tlamantli. Noijki itech non xiuitl, tokniuan otekipanojkej kanaj trecientas mil horas para okichijkej impresiones uan okintitlankej biblias.

 ¿Tleka miak otitekipanojkej uan miak tomin otiktekitiltijkej? Joel Blue tlen tekipanoua itech Departamento Internacional de Impresión, okijto: “Biblia se amochtli tlen okachi ipati tikchiuaj”. Noijki okijto: “Tiknekij kuali ma mota nin amochtli para ma kiueyichiua toTajtsin Dios uan noijki tlen titetlapouiaj”.

 Noijki tikinchiuiliaj Traducción del Nuevo Mundo akinmej amo tlachiaj. Traducción del Nuevo Mundo kajki ika braile itech majtlaktli tlajtolmej. Ijkuak kichijchiuaj se Biblia ika braile, uejkauaj kanaj ocho horas. Amamej tlen kinpia motlatokej kanaj ome metro noso okachi. Noijki tikinchiuiliaj biblias akinmej tsaktokej tlen san kinkauiliaj ma kinkalakikan biblias tlen amo tilauak inmiamayo.

 Ajsi itech inyolo akinmej kitlajtoltiaj Traducción del Nuevo Mundo. Ma tikitakan tlen okinpanok tokniuan tlen tlajtouaj kiluba uan chantij República Democrática del Congo. Non altepetsintli kajki kanaj 1,700 kilómetros itech non altepetl. Tokniuan tlen ompa chantij san okipiayaj se Biblia ika tlajtoli kiluba pero ayakmo kuali okajsikamatiayaj. Tokniuan okimotlatlanetiayaj non Biblia ijkuak omomachtiayaj. Pero agosto 2018 nochtin tokniuan okiselijkej sejse Traducción del Nuevo Mundo ika intlajtol ijkon ken axkan tlapouaj.

 Se tokni tlen tlajtoua alemán uan kitlajtoltia Traducción del Nuevo Mundo tlen okiyankuilijkej, okijto: “Ayakmo nikijtoua moneki niktlajtoltis Biblia. Axkan nimotlajtlania: ‘¿Keman oksepa nimajxilis niktlajtoltis?’”. Se tlakatl tlen tsaktok, okijkuilo: “Onechmakakej se Traducción del Nuevo Mundo uan kipatlatok nonemilis”. Amo keman kuali onikajsikamatiaya iTlajtol toTajtsin Dios hasta ijkuak opejki niktlajtoltia Traducción del Nuevo Mundo. Nikneki okachi nikinmixmatis iTlaixpantijkauan Jehová uan nikmatis tlen moneki nikchiuas para niyetos ken yejuan”.

 Akinmej kitlajtoltiaj Traducción del Nuevo Mundo kintlasojkamatiliaj akinmej okitemakakej intomin ika nochi inyolo para ma kichijchiuakan nin amochtli. Miakej kitemakaj intomin ika nochi inyolo itech donate.mt1130.com uan itech okseki tlamantli. Timechtlasojkamatiliaj porque nankitemakaj tomin ika nochi namoyolo.