BIBLIA AMO SE AMOCHTLI TLEN TLAJTOA ITECH CIENCIA PERO YOKIJTOAYA TLEN YIKIN TIKMATIJ. MA TIKINMITAKAN SEKI NESKAYOMEJ.

¿Kox ikaj okichijchi nochi tlen onka?

Miakej ixtlamatkej okineltokayaj amo ikaj otlachijchi. Axkan miakej kijtoaj kema. Biblia yokijtoaya nochi tlen onka ikaj okichijchi (Génesis 1:1).

¿Ken kajki tlaltikpak?

Yiuejkika miakej okineltokayaj tlaltikpak okatka patlauak. Itech siglo makuili achto itech xiuitl se, miakej ixtlamatkej griegos okijtojkej tlaltikpak tolontik. Pero itech siglo chikueyi achto itech xiuitl se, Isaías yokijtojka tlaltikpak “tolontik” (Isaías 40:22).

¿Ijtlakaui nochi tlen onka iluikak?

Itech siglo naui achto itech xiuitl se, se ixtlamatki tlen itoka Aristóteles okijto san tlaltikpak ijtlakaui uan okseki tlamantli tlen kajki iluikak amo keman ijtlakaui. Noijki ijkon okineltokayaj miakej. Pero yikipiaj kanaj 150 xiuitl ixtlamatkej otlamachtijkej tlen kiluiaj entropía, tlen kijtosneki ijtlakaui nochi tlen onka itech tlaltikpak uan iluikak. Se ixtlamatki tlen ijkon okineltokaya okatka lord Kelvin, ye okajsikamatki itech iluikak uan tlaltikpak tlen Biblia yokijtoaya: “Nochi tlajtlamis ken se tsotsoli tlajtlami” (Salmo 102:25, 26). Non tlakatl okineltokaya tlen kijtoa Biblia maski uelis ijtlakauis tlen onka, toTajtsin Dios uelis kichiuas amo keman ma pojpoliui nochi tlen okichijchi (Eclesiastés 1:4).

¿Ken mokitskijtokej planetas?

Aristóteles otlamachtiaya sejse planeta okatka ijtik se globo. Pero nin globo amo omotaya uan tlaltikpak okatka intlajkotia nochi globos. Itech siglo dieciocho ixtlamatkej opejki kineltokaj amo itlaj kinkitskijtok planetas. Pero itech siglo quince achto itech xiuitl se, Job yokijtojka “tlaltikpak amo itlaj itech mokitskijtok” porque ijkon okitlali akin okichijchi (Job 26:7).

MASKI BIBLIA AMO KIJTOA KEN TIMOPAJTISKEJ, YIUEJKIKA OKIJTO KEN MONEKI TIMOMALUISKEJ.

Akin omokokoaya omonekiaya kisekantiskej

Tlanauatil tlen okijkuilo Moisés okijtoaya akin okipiaya lepra omonekiaya kisekantiskej. Nin tlanauatil ok techpaleuia uan yikipia kanaj 150 xiuitl ijkuak opejki miak kokolistli opejki kitlakamatij (Levítico tlakotonal 13 uan 14).

Tla ikaj okikitskiaya se mikatl, omonekiaya momajtekis

Yikanaj 150 xiuitl, miakej omikej porque akinmej otlapajtiayaj okinkitskiayaj mikamej ijkuak okinyekitayaj uan amo omomajtekiayaj ijkuak okinpajtiayaj oksekimej. Pero Tlanauatil tlen okijkuilo Moisés yokijtoaya akin okikitskiaya se mikatl ayakmo uelis tlaueyichiuaskia uan omonekiaya maltis. Non okinpaleui miakej para amo ma mokokokan (Números 19:11, 19).

Moneki tiktlalpachoskej kuitlatl

Sejse xiuitl mikij miakej konemej ika diarrea porque san kanin onka kuitlatl. Tlanauatil tlen okijkuilo Moisés yokijtoaya omonekiaya uejka kitlalpachotiuij kuitlatl (Deuteronomio 23:13).

Ijkuak kichiuaj circuncisión

ITlanauatil toTajtsin Dios yokijtoaya omonekiaya kinchiuiliskej circuncisión chokotsitsintin ijkuak okipiayaj chikueyi tonal (Levítico 12:3). Porque inmieso konemej kuali moyektlalia ijkuak kipiaj chikome tonal. Itech nonmej tonalmej ayamo okatka pajtli, ik non, se chokotsin okichiuiliayaj circuncisión ijkuak yokipiaya chikome tonal.

Okachi amo mokokoa akin moyolchikaua

Ixtlamatkej uan akinmej tlapajtiaj kijtoaj amo mokokoa akin yolpaki, motlasojkamati, tetlapojpoluia uan kichia tlen kuali. Biblia yokijtoaya: “Akin yolpaki chikajtok pero akin moyolkokoa kipoloa ichikaualis” (Proverbios 17:22).