TLAMACHTIL 50
TLAKUIKALI 135 Jehová mitsiluia: “Nokone xiyeto ixtlamatki”
¿Ken uelis nankinpaleuiskej namokoneuan okachi matlaneltokakan?
“Namoneuian nankimatiskej teyolpakti, kuali uan ajsitok tlen kimonekiltia toTajtsin Dios” (ROM. 12:2).
NIN TLEN TIMOMACHTISKEJ
Axkan tikitaskej seki tlamantli tlen kinpaleuis tetajmej makinpaleuikan inkoneuan okachi makineltokakan toTajtsin Dios uan tlen kijtoua Biblia.
1, 2. ¿Tlen moneki kichiuaskej tetajmej ijkuak inkoneuan kintlajtlaniskej tlen tikneltokaj?
MIAKEJ kijtouaj moneki miak tiempo para kuali kinmiskaltiskej inkoneuan. Ikinon toTajtsin Dios kipatioita nanmochijchikauaj nankinpaleuiskej namokoneuan makineltokakan (Deut. 6:6, 7). Ijkuak moskaltijtiaskej namokoneuan, xamo kinekiskej kimatiskej seki tlamantli tlen tikneltokaj. Xamo kinekiskej kimatiskej tleka Biblia kijtoua amo matikchiuakan seki tlamantli.
2 Xamo nanmotekipachoskej porque namokoneuan namechtlajtlaniskej miak tlamantli uan nanmokuayejyekoskej ayakmo tlaneltokaj. Pero konemej moneki kimatiskej seki tlamantli uan non kinpaleuis matlaneltokakan (1 Cor. 13:11). Ikinon amo ximomojtikan ijkuak nomechtlajtlaniskej tlen tikneltokaj. Ijkuak itlaj namechtlajtlaniskej, xikinpaleuikan mamokuayejyekokan uan ijkon okachi kineltokaskej toTajtsin Dios uan tlen kijtoua Biblia.
3. ¿Tlen timomachtiskej?
3 Axkan tikitaskej tlen kinpaleuis tetajmej makinmachtikan inkoneuan makajsikamatikan tleka kineltokaj toTajtsin Dios, makipatioitakan tlen kijtoua Biblia uan makimatikan tlen tlanankiliskej ijkuak kintlajtlaniskej tlen kineltokaj. Tikitaskej tleka miak ipati konemej matlajtlanikan tlen kinekij kimatiskej uan tlen uelis kichiuaskej tetajmej para kinyekiluiskej tlen tikneltokaj.
XIKINPALEUIKAN NAMOKONEUAN OKACHI MAKINELTOKAKAN TOTAJTSIN DIOS UAN TLEN KIJTOUA BIBLIA
4. ¿Tlen uelis motlajtlaniskej konemej uan tleka?
4 Namokoneuan amo kineltokaskej toTajtsin Dios porque namejuan nantlaneltokaj. Yejuan amo otlaneltokayaj ijkuak oneskej ijkon ken namejuan amo onantlaneltokayaj. Ikinon motlajtlaniaj: “¿Kox melauak kajki toTajtsin Dios? ¿Kox uelis nikneltokas tlen kijtoua Biblia?”. Biblia techiluia tinochtin tlen tikchiuaj ken Cristo ‘kuali matimokuayejyekokan’ uan ‘nochi kuali matikitakan’ (Rom. 12:1; 1 Tes. 5:21). Pero ¿ken nankinpaleuiskej namokoneuan okachi matlaneltokakan?
5. ¿Ken nankinpaleuiskej namokoneuan okachi makineltokakan tlen kijtoua Biblia? (Romanos 12:2).
5 Xikinmiluikan namokoneuan makitakan kox melauak tlen tikneltokaj (xiktlajtolti Romanos 12:2). Ijkuak namokoneuan namechtlajtlaniskej tlen tikneltokaj, xikinpaleuikan matlatemokan itech Índice de las publicaciones Watch Tower uan Tlen ika momachtiaj iTlaixpantijkauan Jehová. Itech amatlajkuilol Tlen ika momachtiaj iTlaixpantijkauan Jehová uelis kitemoskej kanin kijtoua “Biblia” uan makitemokan kanin kijtoua “Biblia otechmakak toTajtsin Dios”. Ompa kitaskej tleka uelis kineltokaskej Biblia “iTlajtol toTajtsin Dios” maski okijkuilojkej tlakamej (1 Tes. 2:13). Uelis tlatemoskej itech amatlajkuilolmej tlen okipanok altepetl Nínive. Yiuejkika sekimej ixtlamatkej okijtouayaj non altepetl amo keman okatka. Pero kanaj itech xiuitl 1850 okajsikej ken okatka non altepetl uan non kiteititia Biblia amo tlakajkayaua (Sof. 2:13-15). Noijki uelis momachtiskej revista Akin Tetlapouijtok noviembre 2021 kanin kijtoua “¿Otikmatiaya?”. Ompa kijtoua ken omochijkej profecías ijkuak okipojpolojkej altepetl Nínive. Ijkon namokoneuan okachi kineltokaskej tlen kijtoua Biblia tla momachtiskej amatlajkuilolmej tlen tikinpiaj. Noijki kinpaleuis tlen kiyekijtouaj enciclopedias uan okseki amochmej tlen okinmijkuilojkej ixtlamatkej.
6. Xikyekijto ken nankinpaleuiskej namokoneuan mamokuayejyekokan. (Noijki xikita foto).
6 Xikinpaleuikan namokoneuan mamokuayejyekokan. Tetajmej uelis kitaskej ken uelis okachi kintlapouiskej inkoneuan tlen kijtoua Biblia uan ken kineltokaskej toTajtsin Dios. Uelis nankitaskej seki videos tlen kiteititiaj tlen yiuejkika opanok noso xikintlajtoltikan seki amochmej tlen noijki kijtoua non tlamantli. Noijki uelis nankinuikaskej kanin onka miak xochitl noso ompa Betel kanin kajki museo. Ijkuak nankitaskej seki tlamantli itech amochmej noso videos tlen kiteititiaj tlen opanok yiuejkika, xikitakan ken kinpaleuis namokoneuan okachi makineltokakan tlen kijtoua Biblia. Xikinmititikan namokoneuan itoka toTajtsin Dios nesi itech se tetl tlen yikipia kanaj tres mil xiuitl uan nin tetl moixmati ken tetl moabita. Non tetl kajki itech museo Louvre tlen kajki París ompa Francia. Noijki onka se copia itech Betel tlen kajki Warwick ompa Nueva York. Kajki itech exposición tlen itoka “La Biblia y el nombre divino”. Itech non tetl ijkuilitok tlen okichi tekiua Mesá tlen otlanauatiaya Moab ijkuak okixnamik tekiua tlen okatka Israel. Biblia kijtoua ijkon opanok non tlamantli (2 Rey. 3:4, 5). Non kinpaleuis namokoneuan makineltokakan Biblia amo tlakajkayaua uan ajsitok (noijki xikita 2 Crónicas 9:6).
Ximopaleuikan ika tlen onka itech museos para nankinpaleuiskej namokoneuan okachi matlaneltokakan. (Xikita párrafo 6).
7, 8. (1) Xikyekijto tlen kiteititia nochi tlen onka. (Noijki xikinmita fotos). (2) ¿Tlen uelis nankintlajtlaniskej namokoneuan tla nankinekij makineltokakan toTajtsin Dios otlachijchi?
7 Xikinmiluikan namokoneuan makitakan tlen okichijchi toTajtsin Dios. Ijkuak nanpaxalotiuij noso ijkuak nantekipanotiuij tlala, xikinmititikan ken chijchitok nochi tlen onka. Nochi non tlamantli kiteititia ixtlamatki akin otlachijchi. Ixtlamatkej yimiak xiuitl momachtiaj tleka seki tlamantli chijchitok ken se espiral. Se ixtlamatki tlen itoka Nicola Fameli okijto ijkuak tikpouaj keski espirales kipia se tlamantli, tikitaj momiaktilijtiuij números uan nin tlamantli moixmati ken sucesión de Fibonacci. Onka miak tlamantli tlen chijchitok ken se espiral. Ijkon chijchitokej galaxias, seki caracoles, ixijyo seki kouitl uan girasoles. a
8 Ijkuak namokoneuan yaskej escuela, kinmachtiskej ken chijchitok okseki tlamantli. Matikitakan tleka ijkon tikijtouaj. Se kouitl tomauak kipia imamayo, non imamayo kipia okseki imamayo okachi tsikitsitsintin. Nochi tlen ijkon chijchitok moixmati ken fractal porque momiaktilijti. Okseki tlamantli noijki ijkon chijchitok. Pero ¿akin otlanauati ijkon matlachijchito? Tla namokoneuan motlajtlaniskej non tlamantli, okachi kineltokaskej toTajtsin Dios otlachijchi (Heb. 3:4). Satepan xikintlajtlanikan: “Tla toTajtsin Dios otechchijchi, ¿amo ye okachi kimati tlen moneki tikchiuaskej tla tiknekij tipakiskej?”. Satepan xikinmititikan namokoneuan nonmej tlanauatilmej tlen miak inpati katej itech Biblia.
NASA, ESA, and the Hubble Heritage (STScl/AURA)-ESA/Hubble Collaboration
¿Akin okichijchi nochi tlen onka? (Xikinmita párrafos 7 uan 8).
XIKINPALEUIKAN NAMOKONEUAN MAKITLAKAMATIKAN TLEN KIJTOUA BIBLIA
9. ¿Tleka ualeua konemej motlajtlaniaj kox melauak tlen kijtoua Biblia?
9 Xikinmajsikamatikan namokoneuan tla ualeua motlajtlaniaj kox melauak tlen kijtoua Biblia. Namejuan ximotlajtlanikan: “¿Nokone amo kipaktia tlen kijtoua Biblia? Noso ¿amo kimati tlen tlanankilis ijkuak kitlajtlaniaj tlen kineltoka?”. Tla ijkon kinpanotok namokoneuan, ximomachtikan amochtli Tiyoltos uan tiyolpakis b uan non kinpaleuis makipatioitakan tlen kijtoua Biblia.
10. ¿Ken uelis nankinpaleuiskej namokoneuan okachi mamouikakan iuan Jehová?
10 Xikinyolchikauakan namokoneuan okachi mamouikakan iuan Jehová. Ijkuak san sekan nanmomachtiskej amochtli Tiyoltos uan tiyolpakis, xikintlajtlanikan tlen ompa ijkuilitok uan ijkon kijtoskej tlen mokuayejyekouaj uan tlen kintekipachoua (Prov. 20:5). Tlamachtil chikueyi kijtoua Jehová yetoskia ken se toyolikni tlen techilnamiktia tlen moneki tikchiuaskej uan ijkon amitlaj techpanos. Xiktlajtoltikan 1 Juan 5:3 uan satepan xikintlajtlanikan: “Tla Jehová se toyolikni sapanoua yolkuali, ¿ken moneki tikitaskej tlen techtlajtlanilia matikchiuakan?”. Tla ijkon nankintlajtlaniskej namokoneuan, kinpaleuis makitakan Jehová kintlasojtla ikinon kinnauatia makitlakamatikan itlanauatiluan (Is. 48:17, 18).
11. ¿Ken uelis nankinpaleuiskej namokoneuan okachi makinpatioitakan principios bíblicos? (Proverbios 2:10, 11).
11 Xikinmiluikan namokoneuan ken kinpaleuis tla kintlakamatiskej principios bíblicos. Ijkuak nankitlajtoltiaj Biblia noso ijkuak mojmostla nankitlajtoltiaj texto, ximotlapouikan iuan namofamilia ken yonamechpaleuijkej principios bíblicos. Matikitakan ken techpaleuia. ¿Yokitakej namokoneuan ken kinpaleuis tla chikauak tekipanoskej uan ken kinpaleuis amo matlakajkayauakan? (Heb. 13:18). Noijki xikinmiluikan namokoneuan principios bíblicos kinpaleuia amitlaj makinpano uan amo san mamoyolkokokan (Prov. 14:29, 30). Ijkon namokoneuan okachi kipatioitaskej tlen kijtoua Biblia matikchiuakan (xiktlajtolti Proverbios 2:10, 11).
12. ¿Tlen kichiuaj se tokni uan isiua para kipaleuiskej inkone?
12 Se tokni tlen itoka Steve uan chanti Francia okijto tlen kichiua ye uan isiua para kipaleuiskej intelpoch tlen itoka Ethan. Yejuan kipaleuiaj intelpoch makajsikamati Jehová techtlasojtla ikinon technauatia matikintlakamatikan itlanauatiluan. Yejuan kitlajtlaniaj: “¿Tleka Jehová techiluia matimoyekanakan ika nin principio? ¿Ken kiteititia nin principio Jehová techtlasojtla? uan ¿tlen techpanos tla amo timoyekanaskej ika nin principio?”. Non kipaleuia Ethan makintlakamati itlanauatiluan Jehová. Steve okijto: “Tejuan tiknekij tokone makajsikamati tlen kijtoua Biblia okachi techpaleuia uan amo tlen kijtouaj oksekimej”.
13. Xikyekijtokan ken uelis nankinpaleuiskej namokoneuan mamoyekanakan ika principios bíblicos.
13 Xikinmachtikan namokoneuan mamoyekanakan ika principios bíblicos. Uelis ijkon nankichiuaskej ijkuak akinmej tlamachtiaj kinmiluiaj namokoneuan makitlajtoltikan se amochtli. Xamo itech non amochtli kijtoua sekimej okichijkej tlen Jehová amo kipaktia. Xamo oauilnenkej uan otetlajyouiltijkej. Pero non amochtli kijtoua nochi kuali tlen okichijkej ikinon akin kitlajtoltis noijki ijkon kinekis kichiuas. Xikinmiluikan namokoneuan mamokuayejyekokan ken momachilia Jehová ijkuak ikaj kichiua tlen amo kuali (Prov. 22:24, 25; 1 Cor. 15:33; Filip. 4:8). Non kinpaleuis makajsikamatikan okachi miak ipati makitlakamatikan Jehová. Noijki uelis kiyekijtoskej tlen kineltokaj ijkuak itlaj kintlajtlaniskej akinmej inuan momachtiaj noso akin kinmachtia.
XIKINMACHTIKAN NAMOKONEUAN AMO MAMOMOJTIKAN IJKUAK KIYEKIJTOSKEJ TLEN KINELTOKAJ
14. ¿Tlen kinmomojtia kiyekijtoskej telpochmej uan ichpochmej uan tleka?
14 Xamo sekimej telpochmej uan ichpochmej momojtiaj tlen kijtoskej ijkuak kintlajtlaniaj tlen kineltokaj. Xamo ijkon kinpanoua ijkuak moneki kijtoskej tleka yejuan amo kineltokaj evolución. Akinmej tlamachtiaj kijtouaj evolución melauak omochi. ¿Ken uelis nankinpaleuiskej namokoneuan amo mamomojtikan ijkuak kiyekijtoskej tlen kineltokaj?
15. ¿Tlen kinpaleuis telpochmej uan ichpochmej makijtokan melauak tlen kineltokaj?
15 Xikinpaleuikan namokoneuan okachi makineltokakan tlen kijtoua Biblia. Yejuan amo mapinauakan ijkuak kijtoskej kineltokaj toTajtsin Dios otlachijchi (2 Tim. 1:8). Ijkon tikijtouaj porque miakej ixtlamatkej kineltokaj ikaj otlachijchi uan amo nochi san iselti omochi. Nonmej ixtlamatkej yokitakej miak tlamantli tlen kiteititia sapanoua ixtlamatki akin otlachijchi. Ikinon yejuan amo kineltokaj evolución tlen tlamachtiaj ipan nochi tlaltikpak. Noijki namokoneuan kinpaleuis okachi matlaneltokakan tla mokuayejyekoskej tlen okinpaleui sekimej tokniuan makineltokakan toTajtsin Dios otlachijchi. c
16. ¿Ken uelis nankinpaleuiskej namokoneuan makiyekijtokan toTajtsin Dios otlachijchi? (1 Pedro 3:15; noijki xikita foto).
16 Xikinpaleuikan namokoneuan ken kiyekijtoskej kineltokaj toTajtsin Dios otlachijchi (xiktlajtolti 1 Pedro 3:15). Uelis nanmomachtiskej se tlamachtil tlen kajki itech jw.org tlen tlajtoua itech evolución. Namokoneuan uelis kipejpenaskej se tlamantli tlen kinpaleuis makinyekiluikan oksekimej toTajtsin Dios otlachijchi. Satepan ximomachtikan ken kinnankiliskej akinmej inuan momachtiaj. Noijki xikinmilnamiktikan amo moneki mokualaniskej inuan akinmej momachtiaj. Pero kuali makinyekiluikan akinmej kinekij okachi kimatiskej tlen tikneltokaj. Xamo ikaj tlen inuan momachtia kijtos: “Ne nikneltoka tlen nikita porque amo keman yinikita Dios”. Pero namokone uelis kiluis: “Ximokuayejyeko tio ijtik kojyo uan ompa tikitas se kualtsin kali, ¿amo san niman tikijtos ikaj okichijchi? Non techititia kajki akin nochi otlachijchi ijkon ken non kali ikaj okichijchi”.
Amo oui makintlapouikan namokoneuan akinmej inuan momachtiaj. (Xikinmita párrafos 16 uan 17). d
17. ¿Ken uelis nankinpaleuiskej namokoneuan matetlapouikan? Xikyekijto tlen uelis kitlajtlanis namokone akin iuan momachtia.
17 Xikinyolchikauakan namokoneuan makintlapouikan oksekimej tlen tlamachtia Biblia (Rom. 10:10). Ijkuak peuas tetlapouiskej namokoneuan yetoskia ken se konetsintli tlen kineki peuas nejnemis. Se konetsintli kita oui peuas nejnemis pero momachtia ken moketsas uan satepan yolik peua nejnemi. Namokoneuan noijki kitaskej oui ijkuak peuas tetlapouiskej pero satepan ayakmo kitaskej oui. Pero kinpaleuis tla amo oui tlamachtiaj. Namokone uelis kitlajtlanis akin iuan momachtia: “¿Otikmatiaya miakej ixtlamatkej kichijchiuaj miak tlamantli ijkon ken kitaj tlen onka? Nikneki nimitsititis se video”. Satepan makititi video tlen kajki kanin kijtoua “¿Ikaj okichijchi?”. Satepan makitlajtlani: “Tla se ixtlamatki kiueyitlaliaj porque okichijchi itlaj ijkon ken tlen onka, ¿amo moneki okachi kiueyitlaliskej akin nochi otlachijchi?”. Non kipaleuis akin kitlapouijtok makineki okachi kimatis tlen titlamachtiaj.
NOCHIPA XIMOCHIJCHIKAUAKAN XIKINPALEUIKAN NAMOKONEUAN OKACHI MATLANELTOKAKAN
18. ¿Ken nankinpaleuiskej namokoneuan okachi makineltokakan toTajtsin Dios?
18 Axkan miakej amo kineltokaj toTajtsin Dios (2 Ped. 3:3). Ikinon ijkuak nanmomachtiskej inuan namokoneuan, xikinpaleuikan mamomachtikan okseki tlamantli tlen kinpaleuis okachi makitlakaitakan iTlajtol toTajtsin Dios uan itlanauatiluan. Xikinpaleuikan mamokuayejyekokan ijkuak kitaj tlen Jehová okichijchi. Xikinpaleuikan makajsikamatikan ken yomochijkej seki profecías. Ximotlatlaujtikan inuan namokoneuan uan noijki inpatka ximotlatlaujtikan. Jehová namechteochiuas porque nanmochijchikauaj nankinpaleuiskej namokoneuan okachi matlaneltokakan (2 Crón. 15:7).
TLAKUIKALI 133 Telpochtli, xikueyichiua Jehová
a Tla tikneki tikmatis okachi, xikalaki itech jw.org uan xikita video Las maravillas de la creación revelan la gloria de Dios: Patrones en la naturaleza.
b Tla yotlanki onankinmachtijkej namokoneuan ika amochtli Tiyoltos uan tiyolpakis, uelis oksepa inuan nanmomachtiskej seki tlamachtil tlen katej itech sección 3 uan 4. Ompa kijtoua ken techpaleuia tla tikintlakamatiskej itlanauatiluan toTajtsin Dios.
c Xikita revista ¡Ma titlachixtokan! septiembre 2006 kanin kijtoua “Por qué creemos que hay un Creador”. Noijki xikita amatlajkuilol El origen de la vida. Cinco cuestiones dignas de análisis. Noijki xikalaki itech jw.org uan xikinmita videos kanin kijtoua “¿Kineltokaj sekimej ikaj otlachijchi?”.
d FOTO: Se telpochtli kinpaktia drones ikinon se tokni okititi se video tlen kajki kanin kijtoua “¿Ikaj okichijchi?”.
