1. ¿Tlen kijtouaj sekimej ijkuak mokuayejyekouaj nochipa yoltoskej?

 MIAKEJ kuali kitaj tlen kikuaskej uan kichiuaj ejercicio porque amo kinekij mokokoskej. Pero yejuan amo kichiaj nochipa yoltoskej. Xamo kijtouaj amo uelis ijkon panos noso amo kinekij nochipa yoltoskej porque mokuayejyekouaj tlajyouiskej ijkuak kokoxkatiskej noso ijkuak ueuejtiskej. Pero Jesús okijto kuali tiyetoskej ijkuak ‘nochipa tiyoltoskej’ ijkon ken kijtoua Juan 3:16 uan 5:24.

2. ¿Tlen kichiuas Jesús ijkon ken kijtoua Juan capítulo 6? (Juan 6:​39, 40).

² Se tonal, Jesús okichi se milagro uan sapanoua miakej okintlamakak san ika seki pan uan seki michimej. a Tetlajtlachialti tlen okichi pero okachi tetlajtlachialti tlen okijto mostlatika. Akinmej okajsitoj Jesús ompa Capernaúm, okinmilui kinyolitiskej akinmej yoixpolikej uan uelis nochipa yoltoskej (xiktlajtolti Juan 6:​39, 40). Ximokuayejyeko tlen kinpanos mofamiliares uan moyolikniuan tlen  yoixpolikej. Kualtsin tlen okijto Jesús porque techmachtia uelis kinyolitiskej akinmej yoixpolikej uan uelis nochipa tiyoltoskej. Pero itech Juan capítulo 6 Jesús okijto okseki tlamantli tlen miakej kitaj oui kajsikamatiskej. Matikitakan tlen techmachtia.

3. ¿Tlen otlamachti Jesús ijkon ken kijtoua Juan 6:51?

³ Akinmej oajsitoj Capernaúm okilnamikej ijkuak Jesús okintlamakak yetoskia ken ijkuak Jehová okinmakak maná israelitas ompa kanin tlauaki. Biblia kitokayotia maná “pan tlen oualaya iluikak” (Sal. 105:40; Juan 6:31). Jesús okintlapoui ijkuak israelitas okikuayaj maná porque okinekiaya kinmachtis okseki tlamantli. ToTajtsin Dios okichiuaya se milagro ijkuak israelitas okinmakaya maná pero non maná amo okinpaleui nochipa mayoltokan (Juan 6:49). Pero Jesús okijto ye kajki ken “pan tlen uits iluikak”, “pan tlen kitemaka toTajtsin Dios” uan “pan tlen kitemaka yolilistli” (Juan 6:​32, 33, 35). Satepan Jesús okijto amo san se tlamantli kijtosneki maná uan icuerpo. Okijto: “Pan tlen kitemaka yolilistli ye ne tlen oniualtemok itech iluikak. Nochipa yoltos akin kikuas nin pan” (xiktlajtolti Juan 6:51). Pero judíos amo okajsikamatkej tlen okinmilui Jesús. Noijki amo okajsikamatkej tleka Jesús okijto ye okachi miak ipati porque ye kajki ken pan tlen uits iluikak uan amo kajki ken maná tlen Jehová okinmakak israelitas. Ikinon ye okinpaleui makajsikamatikan ijkuak okinmilui: “Nocuerpo ye non pan tlen niktemakas”. ¿Tlen okinekiaya kijtos Jesús? Moneki matikajsikamatikan tlen okinekiaya kijtos. Porque non techpaleuis matikajsikamatikan tleka uelis techpaleuis nochipa matiyoltokan tejuan uan noijki akinmej tikintlasojtlaj. Matikitakan tlen okinekiaya kijtos Jesús.

“PAN TLEN KITEMAKA YOLILISTLI” UAN ICUERPO

4. ¿Tleka sekimej okualankej ijkuak okikakej tlen okijto Jesús?

⁴ Sekimej okualankej ijkuak okikakej Jesús okijto kitemakaskia icuerpo para matechpaleui nochipa matiyoltokan. Xamo yejuan omokuayejyekojkej melauak omonekiaya kikuaskej icuerpo Jesús (Juan 6:52). Pero Jesús okinmilui okse tlamantli tlen okachi okintlajtlachialti. Okijto: “Amo nanyoltoskej tla amo nankikuaskej icuerpo uan tla amo nankoniskej ieso iKone Tlakatl” (Juan 6:53).

5. ¿Tleka tikijtouaj Jesús amo okinmilui judíos makonikan ieso?

⁵ ToTajtsin Dios okijto amikaj makikua estli ijkuak okatka Noé (Gén. 9:​3, 4). Satepan Jehová okinmakak Tlanauatil israelitas uan oksepa okinmilui amo makikuakan estli. Omonekiaya kimiktiskej akin okikuaya estli (Lev. 7:27). Jesús okinmachti judíos makintlakamatikan itlanauatiluan toTajtsin Dios (Mat. 5:​17-19). Ikinon amo tikijtouaj ye okinmiluijtoka judíos makikuakan icuerpo uan makonikan ieso. Jesús okinekiaya kinmachtis tlen omonekiaya kichiuaskej para ‘nochipa yoltoskej’ (Juan 6:54).

6. ¿Tleka tikijtouaj Jesús okinekiaya kinmachtis ika se neskayotl ijkuak okijto makikuakan icuerpo uan makonikan ieso?

⁶ Jesús okiteititi okinekiaya kinmachtis se neskayotl ijkon ken ijkuak okitlapoui se siuatl tlen ochantiaya Samaria. Ye okilui: “Ayakmo amikis akin konis atl tlen ne nikmakas. Porque atl tlen ne nikmakas yetos ken se ameyali tlen itech meyatos uan kichiuas nochipa mayolto” (Juan 4: 7, 14). b Jesús amo okinekiaya kijtos siuatl tlen ochantiaya Samaria nochipa yoltoskia tla koniskia atl tlen kikixtiskiaj itech non atekochtli. Noijki amo okinekiaya kijtos nochipa yoltoskiaj tlen okikaktokaj ompa Capernaúm tla kikuaskiaj icuerpo uan koniskiaj ieso.

OME TLAMANTLI TLEN KITEITITIA AMO KIJTOSNEKI SAN SE TLAMANTLI TLEN JESÚS OKIJTO

7. ¿Ken mokuayejyekouaj sekimej tlen Jesús okijto itech Juan 6:53?

⁷ Akinmej pouij itech okseki religiones mokuayejyekouaj moneki tikchiuaskej tlen kijtoua Juan 6:53. Kijtouaj moneki tikkuaskej inakayo Jesús uan tikoniskej ieso ijkuak tikilnamikij iCena toTeko. Ijkon mokuayejyekouaj porque kijtouaj satepan noijki ijkon okijto Jesús (Mat. 26:​26-28). Yejuan kijtouaj nochtin tlen kilnamikij iCena toTeko moneki kikuaskej pan uan koniskej vino. Pero ¿moneki ijkon tikchiuaskej? Miak ipati matikmatikan tlen tikijtoskej porque sejse xiuitl sapanoua miakej touan monechikouaj para tikilnamikiskej iCena toTeko. Axkan timomachtiskej tleka okse tlamantli kijtosneki tlen ijkuilitok itech Juan 6:53 uan tlen okijto Jesús ijkuak okichi iCena.

8. ¿Tlen kiteititia amo kijtosneki san se tlamantli tlen Jesús okijto? (Noijki xikinmita dibujos).

⁸ Matikitakan ome tlamantli tlen kiteititia  amo kijtosneki san se tlamantli tlen Jesús okijto. Achto matikitakan kanin okatka Jesús ijkuak okijto tlen ijkuilitok itech Juan 6:​53-56 uan keman ijkon okichi. Ye ijkon okijto itech xiuitl 32 ompa Galilea inmixpan miakej judíos. Ijkuakon ok opoliuiaya se xiuitl ijkuak kichiuaskia iCena ompa Jerusalén. Noijki matikitakan akinmej okintlapoui Jesús. Ompa Galilea okintlapoui judíos tlen san okinekiayaj kipiaskej tlen kikuaskej uan amo okinekiayaj kixmatiskej toTajtsin Dios (Juan 6:26). Ikinon ijkuak okintlapoui tlen yejuan amo okajsikamatkej, ayakmo okineltokilijkej uan okikajkej. Noijki ijkon okichijkej sekimej idiscípulos (Juan 6:​14, 36, 42, 60, 64, 66). Pero amo ijkon opanok itech xiuitl 33 ijkuak Jesús otlanauati makichiuakan iCena toTeko. Ijkuakon 11 iapóstoles amo okikajkej maski amo okajsikamatiayaj tlen otlamachtijtoka. Yejuan amo okichijkej ken akinmej okatkaj ompa Galilea. Apóstoles okineltokayaj Jesús ye iKone toTajtsin Dios tlen oualtemok iluikak (Mat. 16:16). Ikinon ye okinmilui: “Namejuan nouan nantlajyouijtinemij” (Luc. 22:28). Nin ome tlamantli techpaleuia matikajsikamatikan amo kijtosneki san se tlamantli tlen ijkuilitok itech Juan 6:53 uan tlen okijto Jesús ijkuak okijto matikilnamikikan iCena toTeko. Pero matikitakan okseki tlamantli tlen kiteititia amo san se tlamantli kijtosneki tlen okijto Jesús.

¿KEN TECHPALEUIA TLEN OKIJTO JESÚS?

9. ¿Akinmej pouij itech acuerdo tlen Jesús okijto ijkuak okichi iCena?

⁹ Ijkuak Jesús okichi iCena, okinmakak iapóstoles pan tlen amo okipiaya levadura uan okinmilui okineskayotiaya icuerpo. Satepan okinmakak vino uan okinmilui okineskayotiaya “estli tlen ika mochiua acuerdo” (Mar. 14:​22-25; Luc. 22:20; 1 Cor. 11:24). Jesús okijto non yankuik acuerdo sapanoua miak ipati. Non yankuik acuerdo okichi Jehová “iuan altepetl Israel”. Non kijtosneki okichi san inuan akinmej tlanauatiskej iuan Cristo itech iTekiuajkayo (Heb. 8:​6, 10; 9:15). Ijkuakon apóstoles amo nochi okajsikamatkej tlen okinmilui Jesús. Pero amo miak tonal panoskia uan kinpejpenaskiaj ika espíritu santo uan pouiskiaj itech yankuik acuerdo para tlanauatiskej iuan Jesús ompa iluikak (Juan 14:​2, 3).

10. ¿Tleka amo san se tlamantli kijtosneki tlen Jesús okintlapoui akinmej okatkaj Galilea uan ijkuak okichi iCena? (Noijki xikita dibujo).

¹⁰ Ijkuak Jesús okichi iCena okintlapoui ‘tlen amo miakej’. Ijkuakon okintlapoui iapóstoles uan yejuan okatkaj ‘tlen amo miakej’ (Luc. 12:32). Yejuan uan oksekimej kikuaskiaj pan uan koniskiaj vino. Nonmej apóstoles yaskiaj iluikak uan ompa yetoskej iuan Jesús. Ikinon amo san se tlamantli kijtosneki tlen okintlapoui iapóstoles ijkuak okichi iCena uan ijkuak okintlapoui akinmej okatkaj Galilea. Porque tlen Jesús okinmilui akinmej okatkaj Galilea okachi miakej kinpaleuiskia.

11. ¿Tleka tlen okijto Jesús ompa Galilea amo san sekimej kinpaleuiskia?

¹¹ Ijkuak Jesús okatka Galilea itech xiuitl 32 okintlapouijtoka judíos tlen san okinekiayaj makintlamakakan. Pero ye okintlapoui tlen okachi miak ipati porque kinpaleuiskia nochipa mayoltokan. Jesús okijto kinyolitiskej akinmej yoixpolikej uan  nochipa yoltoskej. Pero amo okijto san sekimej kinyolitiskej ijkon ken ijkuak okintlapoui iapóstoles ijkuak okichi iCena. Porque ijkuak okintlapoui akinmej okatkaj Galilea okijto miakej kinteochiuaskiaj uan ijkon nochipa yoltoskiaj. Ikinon okijto: “Nochipa yoltos akin kikuas nin pan. Nocuerpo ye non pan tlen niktemakas para mayoltokan akinmej chantij tlaltikpak” (Juan 6:51).

12. ¿Tlen omonekiaya kichiuaskej akinmej okatkaj Galilea tla okinekiayaj nochipa yoltoskej?

¹² Axkan miakej mokuayejyekouaj san moneki kineltokaskej Jesús uan ye kinmakixtis (Juan 6:29). Pero ijkuak Jesús okatka Galilea amo okinmilui judíos san ijkon momakixtiskiaj akinmej yoixpolikej uan akinmej satepan nesiskiaj. Ye okijto kinteochiuaskiaj akinmej kikuaskiaj pan uan non kijtosneki akinmej melauak kineltokaskiaj. Pero sekimej tlen okineltokakej Jesús satepan okikajkej. ¿Tleka ijkon okichijkej?

13. ¿Tlen omonekiaya kichiuaskej judíos tla okinekiayaj yetoskej idiscípulos Jesús?

¹³ Miakej judíos tlen okintlamakak Jesús iuan yaskiaj tla kinmakaskia tlen okinekiayaj. Yejuan san okinekiayaj makinpajti, makintlamaka uan makinmachti tlen yejuan okinpaktiaya. Pero Jesús okinmilui omonekiaya kichiuaskej okseki tlamantli tla okinekiayaj yetoskej melauak idiscípulos. Porque ye amo okiualtitlankej san para makinmaka tlen oksekimej okinekiayaj kipiaskej. Akinmej melauak tlaneltokaskiaj omonekiaya yaskej ‘inauak’ uan non okijtosnekiaya omonekiaya kiseliskej tlen ye  otlamachtiaya uan kitlakamatiskiaj (Juan 5:40; 6:44).

14. ¿Tlen moneki tikchiuaskej tla tiknekij matechpaleui icuerpo uan ieso Jesús?

¹⁴ Jesús okijto omonekiaya kiteititiskej judíos otlaneltokayaj. ¿Tlen omonekiaya kineltokaskej? Omonekiaya kineltokaskej icuerpo uan ieso tlen kitemakaskia Jesús kinpaleuiskia nochipa mayoltokan. Sapanoua miak ipati kineltokaskiaj judíos non tlamantli uan tejuan noijki moneki ijkon matikneltokakan (Juan 6:40). Ikinon moneki matikneltokakan ye topatka omotemakak para matechpaleui icuerpo uan ieso tlen okijto itech Juan 6:53. Miakej uelis kiseliskej non tlateochiuali (Efes. 1:7).

15, 16. ¿Ken techpaleuia tlen kijtoua Juan capítulo 6?

¹⁵ Tinochtin techyolchikaua tlen kijtoua Juan capítulo 6 porque ompa kiteititia Jesús sapanoua techtlasojtla. Ijkuak Jesús okatka Galilea, okinpajti akinmej omokokouayaj, okintlapoui tlen kichiuas iTekiuajkayo toTajtsin Dios uan okintlamakak akinmej oapismikiayaj (Luc. 9:11; Juan 6:​2, 11, 12). Noijki okinmachti ye “pan tlen kitemaka yolilistli” (Juan 6:​35, 48).

¹⁶ Jesús okijto “oksekimej ichkamej” amo moneki kikuaskej pan nion koniskej vino ijkuak sejse xiuitl kilnamikij iCena toTeko (Juan 10:16). Pero noijki techpaleuia tlen okichi Jesús maski amo tikkuaj pan nion tikonij vino. Sapanoua techpaleuia porque tikneltokaj Jesús topatka omotemakak (Juan 6:53). Akinmej kikuaj pan uan konij vino kiteititiaj pouij itech yankuik acuerdo uan tlanauatiskej iuan Jesús ompa iluikak. Techpaleuia tlen ijkuilitok itech Juan capítulo 6 maski titlapejpenalmej noso tipouij inuan oksekimej ichkamej. Non techmachtia nochipa tiyoltoskej tla tikneltokaj Jesús topatka omotemakak.