¿MELAUAK UELIS TIKPEJPENAS KEN TIYETOS SATEPAN? Sekimej kijtoaj yipa ijkuilitok tlen kinpanos uan oksekimej kijtoaj toTajtsin yokijto tlen kinpanos. Ik non, ijkuak amo ueli kichiuaj tlen kinekij, moyolkokoaj uan kijtoaj: “Ijkon ijkuilitok nechpanos”.

Sekimej moyolkokoaj porque kinpanoa miak tlamantli amo kuali uan tlajyouiaj. Xamo mochijchikauaj kuali yetoskej pero nochi kipoloaj ijkuak onka guerra, tlachtekij, mokokoaj uan ijkuak tlaxixini. Ik non, kijtoaj amo ipati mochijchikauaskej.

Melauak ualeua mopatla tonemilis ijkuak itlaj techpanoa (Eclesiastés 9:11). Pero tinochtin uelis tikpejpenaskej ken tiyetoskej satepan. Uan Biblia techiluia san tejuan tikpejpenaskej ken tiyetoskej satepan. ¿Tleka ijkon tikijtoaj?

Ijkuak israelitas yikalakiskiaj itech tlali tlen okinmiluijkej kinmakaskiaj, toTajtsin Dios okinauati Moisés ma kinmilui: “Oniktlali moixpan yolilistli uan mikilistli, tlateochiualistli uan tlauijuikaltilistli uan moneki tikpejpenas yolilistli para tiyoltos te uan moxuiuan, xiktlasojtla Jehová moDios, xikkaki itlajtol uan amo keman xikkaua” (Deuteronomio 30:15, 19, 20).

“Oniktlali moixpan yolilistli uan mikilistli, tlateochiualistli uan tlauijuikaltilistli uan moneki tikpejpenas yolilistli” (Deuteronomio 30:19).

ToTajtsin Dios okinmakixti israelitas ompa Egipto uan kinkauiliskia ma yolpakikan itech tlali tlen okinmilui kinmakaskia. Pero omonekiaya itlaj kichiuaskej. Omonekiaya kipejpenaskej “yolilistli” uan kitlasojtlaskiaj toTajtsin Dios, kikakiskiaj uan iuan mouikaskiaj.

Tejuatsin noijki moneki itlaj tikpejpenas uan tlen tikchiuas, kiteititis ken tikneki tiyetos satepan. Tla tikpejpenas tiktlasojtlas toTajtsin Dios, tikkakis tlen mitsiluis uan iuan timouikas, non kijtosneki tikneki tiyoltos nochipa itech xochitlali nikan tlaltikpak. ¿Pero ken tikchiuaskej ninmej eyi tlamantli?

Tlatitlanil Juan okijkuilo toTajtsin Dios “tlasojtlálistli” porque ijkon iyelis (1 Juan 4:8). Jesús kuali okimatiaya, ik non, ijkuak okitlajtlanijkej tlen tlanauatil okachi ipati, okijto: “Xiktlasojtla Moteko Dios [Jehová] ika nochi moyolo, ika nochi moalma iwa ika nochi motlalnamikilis” (Mateo 22:37). Para timouikaskej iuan toTajtsin Dios, moneki tiktlasojtlaskej uan amo tikimakasiskej. Pero ¿tleka moneki tiktlasojtlaskej?

Jehová techtlasojtla ken tetajmej kintlasojtlaj inkoneuan. Tetajmej maski tlajtlakolejkej mochijchikauaj kinmachtiskej inkoneuan, kinyolchikauaj, kinpaleuiaj, ika tlasojtlalistli kinyektlaliaj porque kinekij ma yolpakikan uan kuali ma yetokan. ¿Uan tlen kinekij ma kichiuakan inkoneuan? Kinekij ma kintlakamatikan uan ma kajsikamatikan kinpaleuis tlen kinmiluiaj. ¿Amo moneki noijki ma tiktlasojtlakan Jehová uan ma tiktlasojkamatilikan yotechmakak miak tlamantli?

Tlajtoli “tikkakiskej” ualeua kijtosneki ma “titetlakamatikan”. ¿Amo melauak ijkon kineki se teta  ijkuak kiluia ikone: “techkaki”? Ik non, tla tikkakij tlen techiluia toTajtsin Dios kijtosneki tikchiuaskej tlen ye kineki. Axkan toTajtsin Dios amo touan motlapouia, ik non, moneki tiktlajtoltiskej Biblia uan tikchiuaskej tlen kijtoa (1 Juan 5:3).

Para tikkakiskej tlen techiluia toTajtsin Dios moneki tikchiuaskej tlen Jesús okijto: “N tlakatl amo san ika paj yolitok, yej noiwa ika nochi tlájtoli non Dios kijtoa” (Mateo 4:4). Moneki titlakuaskej pero okachi ipati tikixmatiskej toTajtsin Dios. ¿Tleka? Ueyi tekiua Salomón okijto: “Ixtlamatilistli techpaleuia ijkon ken tomin noijki techpaleuia pero ixtlamatilistli kichiua ma tiyoltokan” (Eclesiastés 7:12). Ixtlamatilis toTajtsin Dios techpaleuis ma tikpejpenakan tlen kuali uan non techpaleuis ma tikpiakan yolilistli tlen amo keman tlamis.

Itech okse tlamachtil otikijtojkej tlen okijto Jesús: “Xikalakikah kan ik kaltentli non tsopijtik, porke patlawak n kaltentli iwa kuyawak n ojtli non tewika kan moixpoloah, iwa miakeh ik ompa yajtokeh” (Mateo 7:13, 14). Para uelis tiaskej itech ojtli pitsauak, timotlasojkamatiskej tla techmakaskej itlaj tlen ika timopaleuiskej para tiajsitiuij kanin moneki tiaskej uan ijkon tikseliskej yolilistli tlen amo keman tlamis. Ik non, moneki timouikaskej iuan toTajtsin Dios (Salmo 16:8). Pero ¿ken tikchiuaskej?

Nochipa tikchiuaj miak tlamantli uan noijki techpaktiskia okseki tlamantli tikchiuaskej. Amo timajxiliaj uan non kichiua amo ma timokuayejyekokan tlen kineki toTajtsin Dios ma tikchiuakan. Ik non, Biblia techiluia: “Ximotlachilikah kenijki nonnentinemih. Amo xinemikah kemi non amitla kinekih kajsikamatiskeh, yej xiyeknemikah kemi non ya kixmatih itlajtol Dios. Yika xikintiotilikah n tonatijmeh iwa nochipa xikchiwakah nochi tlan kuali kemi Dios kimonekiltia, porke itech ninteh tonatijmeh yomomiakili tlan amokuali” (Efesios 5:15, 16). Ma tikpatioitakan timouikaj iuan toTajtsin Dios (Mateo 6:33).

Amo uelis tikpatlaskej tlen yotikchijkej. Pero uelis itlaj tikchiuas para te uan mokalchanejkauan kuali nanyetoskej satepan. Biblia techmachtia Jehová sapanoa techtlasojtla uan techiluia tlen moneki tikchiuaskej. Xiktlajtolti tlen okijto Miqueas akin otlajtoaya ipatka toTajtsin Dios:

“Tlaltikpaktlakatl ye yomitsilui tlen kuali. ¿Uan tlen kineki Jehová xikchiua? ¡San moneki nochi xikchiua ika melajkayotl, xitetlasojtla uan xiyeto yolyamanki ixpan moDios!” (Miqueas 6:8).

¿Tikneki tiyetos yolyamanki ixpan toTajtsin Dios? Tla tikkakis tlen mitsiluia, tikpias tlateochiualistli uan noijki moyolikniuan. San moneki tikpejpenas ken tikneki tiyetos satepan.