Edén: ¿melauak ompa ochantiayaj Adán uan Eva?

XIMOKUAYEJYEKO tika itech se kuajkualtsin xochitlali kanin amikaj chanti. Amitlaj mitstekipachoua nion amo timokokoua. Nochi tlen onka kichiua kuali ximomachili.

Nochi tlen tikita sapanoua kualtsin, mota ken tlauia tonaltsin itech kuajmej, onka tlatlamantli xochitl, molinia xiuitl ijkuak kiaui, totomej kualtsin tlakuikaj, mokaki xikojtli kitemojtinemi kanin motlalis uan itech temej temoua atl chipauak. ¿Mitspaktiskia ompa tiyetos?

Miakej mokuayejyekouaj ijkon ochantiaya achto tlakatl. Judíos, akinmej kichiuaj ken Cristo uan musulmanes yiuejkika kineltokaj achto totatajuan ochantiayaj itech xochitlali Edén. Biblia kijtoua oyolpakiayaj, kuali okatkaj uan omouikayaj iuan yolkamej. Noijki tlen okachi ipati, omouikayaj iuan toTajtsin Dios, ye okinekiaya machantikan nochipa itech non xochitlali (Génesis 2:15-24).

Hindúes kineltokaj yiuejkika okatka se xochitlali. Budistas kineltokaj, akinmej kinyekanaj noso budas monextiaj ijkuak nochi kuali kajki. Noijki seki religiones tlen katej África kintlapouiaj oksekimej ijkon ken okinpanok Adán uan Eva.

Maski san kanin chantij noso tlatlamantli inreligión, kineltokaj yiuejkika okatka se xochitlali. Se ixtlamatki tlen itoka Jean Delumeau kijtoua: “Miakej kineltokaj okatka se xochitlali kuajkualtsin, kanin nochi kuali okatka, omoyolseuiayaj, oyolpakiayaj, okipiayaj tlen kikuaskej, amikaj iuan omokualaniayaj nion omoteuiayaj. [...] Nin tlamantli okichi makilnamikikan xochitlali uan makinekikan oksepa ompa yetoskej”.

¿Tleka miakej kineltokaj okatka se xochitlali? ¿San se tlamantli tlen miakej mokuayejyekouaj? ¿Melauak okatka Adán, Eva uan xochitlali Edén?

Pero noijki miakej amo kineltokaj. Axkan miakej ixtlamatkej kijtouaj xochitlali amo melauak okatka. Hasta noijki sekimej teopixkej kijtouaj amo melauak okatka xochitlali Edén.

Biblia techmachtia miak tlamantli pero seki san kineskayotia. Ken ijkuak Jesús okinmachti idiscípulos ika neskayomej. Pero ijkuak itech Biblia tiktlajtoltiaj xochitlali Edén technextilia melauak okatka. Pero tla amo melauak okatka, amo uelis tikneltokaskej tlen kijtoua Biblia. Axkan timomachtiskej tleka miakej amo kineltokaj okatka xochitlali Edén. Satepan tikitaskej tleka sapanoua ipati matikneltokakan melauak okatka.