1, 2. ¿Tlen okichi Jesús itech tonal 14, metstli nisán, xiuitl 33? (Xikita tlaixkopinal tlen ika peua tlamachtil.)

ITECH tonal 14, metstli nisán, xiuitl 33, itech Jerusalén omotaya chikauak metstli. Jesús uan itlatitlaniluan okichijtokaj Pascua. Sejse xiuitl judíos okichiuayaj nin iluitl uan okilnamikiayaj tonal ijkuak Jehová okinmakixti itech altepetl Egipto tlen yokipiaya 1,500 xiuitl omochi. Ijkuak otlankej okichijkej nin iluitl, Jesús okitlali se yankuik iluitl iuan 11 itlatitlaniluan. Omonekiaya kichiuaskej sejse xiuitl pampa kilnamikiskiaj imikilis Jesús (Mateo 26:1, 2).

² Jesús okipeualti nin iluitl ika se tlatlaujtilistli. Satepan okinmakak itlatitlaniluan pan tlen amo okipiaya levadura uan okinmilui: “Xikmomajsewikah”. Satepan okonanki se copa ika vino, oksepa omotlatlaujti uan okijto: “Nonnochteh xikonikah” (Mateo 26:26, 27). Nin pan uan vino san itlaj kineskayotiaj. Itech non yoak Jesús okinmachti itlatitlaniluan tlen okijtosnekiayaj tlen okitekitilti uan noijki miak okseki tlamantli.

3. ¿Tlen tlajtlanilmej tikinnankiliskej axkan?

³ Jesús okinekiaya imachtijkauan sejse xiuitl ma kilnamikikan nin iluitl. Satepan okitokayotijkej “isena Toteko” (1 Corintios 11:20). Axkan  tikinnankiliskej ninmej tlajtlanilmej: ¿Tleka moneki ma tikilnamikikan imikilis Jesús? ¿Tlen kineskayotiaj pan uan vino? ¿Ken uelis timoyektlaliskej pampa tikilnamikiskej nin iluitl? ¿Akinmej moneki ma kikuakan pan uan ma konikan vino? Akinmej kichiuaj ken Cristo, ¿ken kiteititiaj kitlasojkamatiliaj toTajtsin Dios pampa kinmakas yolilistli tlen amo keman tlamis?

4. ¿Tlen uelis tikpiaskej pampa Jesús omikik pampa nochtin tlaltikpaktlakamej?

⁴ Tinochtin titlajtlakolejkej uan timikij pampa Adán otlajtlakolchi (Romanos 5:12). Pampa uelis timomakixtiskiaj itech tlajtlakoli uan mikilistli omonekiaya ma tikmakakan toTajtsin Dios se tlaxtlauili. Pero ken tinochtin titlajtlakolejkej, amo ikaj kitemakaskia tlaxtlauili (Salmo 49:6-9). Pero Jesús amo okipiaya tlajtlakoli. Ye okitemakak iyolilis ken tlaxtlauili uan ijkon okitlaxtlaui toTajtsin Dios. Ijkon axkan uelis timomakixtiskej itech tlajtlakoli uan mikilistli, uan noijki uelis tikpiaskej yolilistli tlen amo keman tlamis (Romanos 6:23; 1 Corintios 15:21, 22).

5. 1) ¿Ken okiteititijkej Jehová uan Jesús sapanoa techtlasojtlaj? 2) ¿Tleka moneki ma tikilnamikikan iCena toTeko?

⁵ Jehová uan Jesús okiteititijkej sapanoa kintlasojtlaj tlaltikpaktlakamej. Jehová okitemakak tlen omonekiaya pampa tlaxtlauili (Juan 3:16). Uan Jesús okinek mikis. Jesús yiuejkika kintlasojtla tlaltikpaktlakamej (Proverbios 8:30, 31). ¡Melauak tikintlasojkamatiliaj Jehová uan Jesús pampa nochi tlen okichijkej! Ik non, sejse xiuitl timonechikoaj pampa tikilnamikiskej iCena toTeko. Ijkon tiktlakamatij tlen okijto Jesús: “Ijkí xikchiwakah para nonnechilnamikiskeh” (1 Corintios 11:23-25).

6. ¿Tlen okiyekijto Jesús itech pan uan vino?

⁶ Ijkuak okichijtokaj non iluitl Jesús okinmilui imachtijkauan tlen kijtosnekij pan uan vino. Ye okijto itech pan: “Ye ni [kijtosneki, TNM] nokuerpo”. Uan itech vino okijto: “Ye ni [kijtosneki, TNM] noesso non ika timotlajtolsenkawa, nin noesso motoyawas para miakeh makintlapojpolwikah” (Marcos 14:22-24). Jesús itlalnakayo amo okikuepki pan nion ieso okikuepki vino. Tlen okijto kuali okiteititi pan uan vino san itlaj kineskayotiaj.

7. ¿Tlen kineskayotia pan tlen amo kipia levadura?

⁷ Non yoak Jesús okitekitilti pan tlen amo okipiaya levadura tlen noijki okitekitiltiayaj itech Pascua (Éxodo 12:8). Itech Biblia ualeua tlajtoli levadura kineskayotia tlajtlakoli (Mateo 16:6, 11, 12; Lucas 12:1). Ik non, pan tlen amo okipiaya levadura tlen okitekitilti Jesús kuali kineskayotia itlalnakayo tlen amo kipia tlajtlakoli (Hebreos 7:26). Ik non, axkan ijkuak tikilnamikij iCena toTeko tiktekitiltiaj pan tlen amo kipia levadura.

8. ¿Tlen kineskayotia vino?

⁸ Vino tlen Jesús okitekitilti okineskayoti ieso. Noijki axkan san kineskayotia ieso. Jesús omikik pampa tinochtin tejuan itempa altepetl Jerusalén. Ye okitemakak iyolilis pampa “miakeh makintlapojpolwilikah intlajtlakolwah” (Mateo 26:28; 27:33). ¿Ken uelis tiktlasojkamatiliskej tlen okichi? Moneki ma timoyektlalikan pampa tikilnamikiskej iCena toTeko. Ma tikitakan ken uelis timoyektlaliskej.

9. 1) ¿Tleka moneki ma tiktlajtoltikan tlen okichi Jesús achto kimiktiskiaj? 2) ¿Ken tikita tlaxtlauili?

⁹ Uelis timoyektlaliskej tla tiktlajtoltiaj tlen okichi Jesús achto kimiktiskiaj. Uelis tikmatiskej tlen tiktlajtoltiskej tla tiktlajtoltiaj amatlajkuilol  Examinando las Escrituras diariamente. Miak ipati ma tiktlajtoltikan tlen okichi. Pampa ijkon sejse tejuan timokuayejyekoaj ken techpaleuia imikilis Jesús. Nin tlamantli miak ipati pampa ma timoyektlalikan pampa iCena toTeko. Se tokni siuatl okijto: “San tikchixtokej iCena toTeko. Sejse xiuitl okachi tikpatioitaj”. Tokni okimatiaya nochi tlaxelolmej tlen techtlapouiaj itech tlaxtlauili uan okimatiaya kinyekijtos. Pero ye kijtoa ijkuak omikik itajtsin okajsikamatki miak ipati imikilis Jesús. Nin okiyolseui miak.

10. ¿Noijki ken uelis timoyektlaliskej pampa iCena toTeko?

¹⁰ Noijki uelis timoyektlaliskej tla okachi titetlapouiaj. Itech nin metstli uelis titekitis ken precursor auxiliar. Ijkon uelis tikinyoleuaskej oksekimej ma monechikokan itech iCena toTeko. Ijkuak oksekimej tikintlapouiaj itech toTajtsin Dios, Jesús uan yolilistli tlen amo keman tlamis, kichiuas ma tiyolpakikan pampa tikchiuaj tlen toTajtsin Dios kineki (Salmo 148:12, 13).

11. ¿Tleka Pablo okijto sekimej tlapejpenalmej okikuayaj pan uan okoniayaj vino pero amo ken kineki toTeko?

¹¹ Ijkuak timoyektlaliaj pampa iCena toTeko, noijki uelis timokuayejyekoskej itech tlen Pablo okinmilui tokniuan akinmej ochantiayaj Corinto (xiktlajtolti 1 Corintios 11:27-34). Ye okijto ikaj uelis kikuaskiaj pan noso koniskiaj vino, pero amo ken “Toteko kimonekiltia”. Okijto akin ijkon kichiuas “tlajtlakolchiwa inawak ikuerpo iwa iesso n Toteko Cristo Jesús”. Ma timokuayejyekokan se tokni akin yokipejpenkej kichiua itlaj amo kuali, pero kikua pan uan koni vino. Tlatitlanil Pablo okijto akin ijkon kichiuas “Dios kitlaijyowiltis akin kikuas non paj noso konis non vino”. Ijkuak Pablo okinmijkuilo ninmej tlajtolmej, tokniuan okichijtokaj miak tlamantli amo kuali. Uan uelis sekimej okochtokaj ijkuak okilnamikiayaj iCena toTeko pampa sapanoa otlakuajkej noso okonikej vino achto monechikoskiaj pampa kilnamikiskiaj nin iluitl. Tlapejpenalmej tlen ijkon okichiuayaj amo okitlakaitayaj nin iluitl. Ik non, toTajtsin Dios amo okinekiaya ma kikuakan pan nion ma konikan vino.

12. 1) ¿Ken okineskayoti Pablo iCena toTeko? 2) ¿Tlen okinmilui ma kichiuakan akinmej kinyoleuaj? 3) Tla akin yokipejpenkej tlajtlakolchiua, ¿tlen moneki kichiuas?

¹² Pablo okijto iCena toTeko ken ijkuak techyoleuaj ma titlakuatij. Uan okinmilui akinmej kinyoleuaj: “Mach weletis nonkoniskeh itech ikopa n Toteko, iwa itech inkopa n demóniojteh. Nion weletis nontlakuaskeh itech imesa n Toteko, iwa itech  inmesa n demóniojteh” (1 Corintios 10:16-21). Tla se tokni tlapejpenal kikua pan uan koni vino uan tlajtlakolchiua, moneki kinmiluis tlayekankej (xiktlajtolti Santiago 5:14-16). Uan tla melauak moyolkuepa, uelis oksepa kikuas pan uan konis vino tlen motekitiltiaj itech iCena toTeko. Ijkon kiteititis kipatioita tlaxtlauili tlen okitemakak Jesús (Lucas 3:8).

13. ¿Tleka moneki tinochtin ma timotlatlaujtikan uan ma timokuayejyekokan kanin tiyoltoskej?

¹³ Achto tikilnamikiskej iCena toTeko, moneki ma timotlatlaujtikan uan ma timokuayejyekokan kanin kineki toTajtsin Dios ma tiyetokan satepan. Moneki ma tikpatioitakan tlaxtlauili tlen okitemakak Jesús. Ik non, tla amo kuali tikmatij kox titlapejpenalmej, amo tikkuaj pan nion tikonij vino itech iCena toTeko. ¿Akinmej uelis kichiuaskej?

14. Itech iCena toTeko, ¿tlen kichiuaj akinmej katej itech yankuik tlajtolsenkaualistli?

¹⁴ Jehová okichi se tlajtolsenkaualistli iuan israelitas. Nin itoka tlajtolsenkaualistli itech Tlanauatil. Pero satepan toTajtsin Dios okijto kichiuaskia se yankuik tlajtolsenkaualistli (xiktlajtolti Jeremías 31:31-34). Itech cena tlen Jesús okichi iuan itlatitlaniluan okinmilui ika vino: “Nikchiwas se yankuik akuerdo por amejwan” (1 Corintios 11:25, ITlajtol toTajtzin Dios). Nin yankuik tlajtolsenkaualistli okichi Jehová iuan tlapejpenalmej (Gálatas 6:15, 16). Ika imikilis Jesús ueli omochi nin yankuik tlajtolsenkaualistli (Lucas 22:20). Ye kinpaleuia tlapejpenalmej pampa ma motokikan itech toTajtsin Dios. Uan tlapejpenalmej tlen katej itech nin yankuik tlajtolsenkaualistli yetoskej iuan Jesús itech iluikak (Hebreos 8:6; 9:15). Tlapejpenalmej kuali kimatij katej itech nin yankuik tlajtolsenkaualistli. Ik non, itech iCena toTeko kikuaj pan uan konij vino.

15. 1) ¿Akinmej katej itech tlajtolsenkaualistli itech Tekiuajkayotl? 2) Tla yolmelajkej, ¿tlen uelis kiseliskej?

¹⁵ Tlapejpenalmej noijki kimatij katej itech tlajtolsenkaualistli itech Tekiuajkayotl (xiktlajtolti Lucas 12:32). Jesús okichi nin tlajtolsenkaualistli iuan tlapejpenalmej akinmej okinekej tlajyouiskej ken ye (Filipenses 3:10). Tlapejpenalmej yolmelajkej tlen axkan katej, noijki pouij itech nin tlajtolsenkaualistli. Nochtin yejuan uelis yetoskej ueyi tekiuajkej itech iluikak uan nochipa tlanauatiskej iuan Jesús (Apocalipsis 22:5). Ik non, itech iCena toTeko kikuaj pan uan konij vino.

16. Xikyekijto Romanos 8:15-17.

¹⁶ Tlapejpenalmej noijki kuali kimatij yejuan ikoneuan toTajtsin Dios, ik non, kikuaj pan uan konij vino itech iCena toTeko (xiktlajtolti Romanos 8:15-17). Pablo okijto tlapejpenalmej kinotsaj toTajtsin Dios ken: “¡Abba, Totajtsi!”. Nin tlajtoli arameo abba kiteititia tlasojtlalistli uan tlakaitalistli. Nin tlajtoli kiteititia ken mouikaj tlapejpenalmej iuan toTajtsin Dios ijkuak kiseliaj “n Espíritu non ika nonmochiwah ipilwah Dios”. Iespíritu santo toTajtsin Dios kinmatiltia yejuan ikoneuan toTajtsin Dios. Nin amo kijtosneki amo kinekij mokauaskej itech Tlaltikpak. Pero kimatij tla yolmelajkej uelis tlanauatiskej iuan Jesús itech iluikak. Noijki kimatij Jehová okinpejpenki uan ye chipauak. Axkan itech Tlaltikpak ayakmo katej miakej itech 144,000 tlapejpenalmej (1 Juan 2:20; Apocalipsis 14:1). Kimachiliaj san sekan katej iuan Jehová, ik non, kiluiaj: “¡Abba, Totajtsi!”.

17. 1) ¿Tlen kiseliskej tlapejpenalmej? 2) ¿Ken kimatij tlapejpenalmej yejuan ikoneuan toTajtsin Dios?

¹⁷ ToTajtsin Dios kinmiluia tlapejpenalmej yoltoskej itech iluikak. Tla titlapejpenal uelis ijkuak timotlatlaujtia tikijtoa chialistli tlen tikpia.  Noijki tikita seki tlaxelolmej tlajtoaj itech chialistli tlen tikpia. Se neskayotl, ijkuak Biblia kijtoa Jesús monamiktis iuan “inovia”, tikmati ompa tiyetos uan tikneki ma mochiua (Juan 3:27-29; 2 Corintios 11:2; Apocalipsis 21:2, 9-14). Noso ijkuak kijtoa toTajtsin Dios kintlasojtla tlapejpenalmej, tikmati mitstlapouijtok. Uan ijkuak Biblia kinnauatia tlapejpenalmej itlaj ma kichiuakan, espíritu santo mitsyolchikaua xiktlakamati. Iespíritu santo toTajtsin Dios mitsmatiltia tias iluikak.

18. 1) ¿Tlen kiseliskej akinmej mokauaskej itech Tlaltikpak? 2) ¿Tlen kimachiliaj pampa kiseliskej ninmej tlateochiualismej?

¹⁸ Uan toTajtsin Dios techiluia oksekimej tlaltikpaktlakamej tiyoltoskej itech Tlaltikpak tlen mokuepas se Xochitlali (Apocalipsis 7:9; Juan 10:16). Tla timokauas itech Tlaltikpak, tiyolpaki ijkuak tiktlajtoltia itech Biblia Tlaltikpak kikuepaskej se Xochitlali. Tikneki mokalchanejkauan uan moyolikniuan ma kipiakan yolseuilistli itech Tlaltikpak. Tikneki ayakmo ma yeto apistli, nochtin ma kipiakan tlen ika mopanoltiskej, ayakmo ma tlajyouikan, ma mokokokan nion ma mikikan (Salmo 37:10, 11, 29; 67:6; 72:7, 16; Isaías 33:24). Tikneki tikinselis mokalchanejkauan uan moyolikniuan tlen kinyolitiskej (Juan 5:28, 29). Tiktlasojkamatiliaj Jehová pampa uelis tikpiaskej ninmej tlateochiualismej. Noijki tiktlasojkamatilia Jesús pampa omikik topampa. Ik non, maski itech iCena toTeko amo tikkuaj pan nion tikonij vino, kema timonechikoaj.

19, 20. 1) Tla tiknekij tiyoltoskej nochipa, ¿tlen moneki ma tikchiuakan? 2) ¿Tleka tikneki tikilnamikis iCena toTeko?

¹⁹ Tinochtin uelis tiyoltoskej nochipa. Sekimej itech iluikak uan oksekimej itech Tlaltikpak. ¿Tlen moneki ma tikchiuakan pampa uelis tiyoltoskej nochipa? Moneki ma titlaneltokakan itech Jehová, Jesucristo uan itech tlaxtlauili. Ik non, itech iCena toTeko ma timokuayejyekokan itech tlateochiualismej tlen techmakas toTajtsin Dios uan ken miak ipati imikilis Jesús. Itech nin xiuitl miakej tlaltikpaktlakamej kilnamikiskej iCena toTeko itech viernes 3, metstli abril, ijkuak yokalak Tonaltsin. Timonechikoskej itech Kalmej kanin timonechikoaj uan okseki kintlaneuiskej.

²⁰ Achto tiaskej itech nin nechikol sapanoa ipati ma timokuayejyekokan ken miak ipati tlaxtlauili. Ijkon okachi tiktlasojkamatiliskej Jesús. Uan tla kuali titlakakij itech iCena toTeko, tikintlasojtlaskej oksekimej. ¿Ken uelis tikintlasojtlaskej? Tikinmiluiskej toTajtsin Dios kintlasojtla uan tlen kineki pampa tlaltikpaktlakamej (Mateo 22:34-40). Melauak tinochtin tiknekij timonechikoskej itech iCena toTeko.