Yikipia kanaj 3,000 xiuitl se tlakatl okijto: “Nimitsueyichiuas pampa kuali otinechchijchi” (Salmo 139:14). Uan non melauak: pampa se konetl nesi san ika se célula, non melauak tetlajtlachialtia, ¿amo ijkon timokuayejyekoa? Miakej tlaltikpaktlakamej kineltokaj ikaj oTechchijchi. (Xiktlajtolti Salmo 139:13-17 uan Hebreos 3:4.)

Akin oKichijchi nochi noijki okichijchi Tlaltikpak uan nochi tlen nikan onka (Salmo 36:9). Ye omotlapoui iuan tlaltikpaktlakamej pampa ma kixmatikan. (Xiktlajtolti Isaías 45:18.)

Itech intlalnakayo tlaltikpaktlakamej onka miak tlamantli tlen ika kijtoaj tiuitsej itech se yolkatl. Pero ijkon mota pampa tinochtin otechchijchijkej pampa ma tiyetokan itech Tlaltikpak uan san se oTechchijchi. Ye amo okichijchi tlakatl ika se yolkatl, okichijchi ika tlalpinoli. (Xiktlajtolti Génesis 1:24; 2:7.)

Onka ome tlamantli tlen kichiua amo ma tiyetokan ken yolkamej. Achto, tlaltikpaktlakamej ueli tikixmatiskej, tiktlasojtlaskej uan tiktlakaitaskej akin oTechchijchi. Noijki otechchijchijkej pampa ma tiyoltokan nochipa, uan yolkamej amo ijkon okinchijchijkej. Pero axkan timikij pampa achto tlakatl amo okitlakamatki toTajtsin Dios. (Xiktlajtolti Génesis 1:27; 2:15-17.)