¿Kikauas toTajtsin Dios ma tlanauatikan tlaltikpaktlakamej maski sapanoa titlajyouiskej? Amo, ken yotimomachtijkej ayakmo miak poliui pampa toTajtsin Dios kintlajtlamis nochtin tekiuajkej itech Tlaltikpak uan nochi tlajyouilistli. Akin okinchijchi tlaltikpaktlakamej uan Tlaltikpak kineki ma tikmatikan keman kichiuas. ¿Ken techiluia nin tlamantli tlen miak ipati?

Ximokuayejyeko moneki tias okse altepetl, achto tejuatsin tikita itech se mapa ken uelis tiajsiti ompa. Ijkuak yitio itech ojtli tikita seki tlamantli tlen mitsititia kuali tio ijkon ken otikitak itech mapa. Noijki ijkon panoa ika Biblia, ompa techiluia nochi tlamantli tlen panos itech Tlaltikpak achto tlamis nochi. Uan nochi tlamantli tlen tikitaj techititia yiualajsitok tonal ijkuak tlamis nochi tlen amo kuali.

Biblia kijtoa achto tlamis nochi itech Tlaltikpak mochiuas seki tlamantli tlen sapanoa miak ipati. Ijkuakon itech Tlaltikpak mochiuaskej seki tlamantli tlen amo keman omochiuayaj. Ma tikitakan tlen tlamantli mochiuas itech Tlaltikpak.

1. ITECH NOCHI TLALTIKPAK ONKA OUIJKAYOTL Itech Mateo 24 tikajsij miak tlamantli tlen mochiuas itech Tlaltikpak achto tlamis nochi. Nochi nin tlamantli techititia “ya tlajtlamis nin tlaltíkpaktli” noso tlen amo kuali (tlaxelolmej 3 uan 14). Ompa kijtoa mochiuaskej guerras, yetos apistli, tlalolinis itech nochi Tlaltikpak, sapanoa tlachtekiskej, amo tetlasojtlaskej uan tlayekankej teopixkej tlakajkayauaskej (tlaxelolmej 6 a 26). Nochi nin tlamantli yiuejkika mochijtok itech Tlaltikpak. Pero nochi nin tlamantli mochiuas san itech se kauitl achto tlamis nochi. Uan noijki mochiuas ijkon ken okseki tlamantli.

2. AMO KIPIAJ KUALI INYELIS Biblia kijtoa “itech iksemi tonatijmeh” tlaltikpaktlakamej ayakmo kipiaskej kuali inyelis. Biblia kijtoa: “N tlakah yetoskeh xíkojteh, satlawel kiwilitaskeh tomi, moweyiliskeh iwa xaxankuatiskeh. Tlajtoskeh fiero de Dios, iwa mach kintlakitaskeh intajwah. Amo kimatiskeh motlasojkamatiskeh iwa mach ok kitlakitaskeh Dios. Mach kimatiskeh tetlasojtlaskeh nion tetlapojpolwiskeh. Satlawel kiwilitaskeh tepojpoaskeh iwa amo kixikoskeh tlan amokuali kelewis inkuerpo, tetlaijyowiltiskeh iwa kikokoliskeh tlan kuali. Yetoskeh teichtakawijkeh, ayakmó pinawaskeh nion mach itla kixmawiliskeh. Moyolpaktijtinemiskeh ika tlan amo kuali kelewia inkuerpo, iwa ayakmó kitemoskeh Dios” (2 Timoteo 3:1-4). Yiuejkika tlaltikpaktlakamej kichiuaj nin tlamantli, pero “itech iksemi tonatijmeh” okachi motaskia uan yetoskia okachi ouijkayotl. Ijkuakon yetos miak tlajyouilistli. ¿Axkan tikita ijkon kichiuaj tlaltikpaktlakamej?

3. KIJTLAKOJTOKEJ TLALTIKPAK Biblia kijtoa toTajtsin Dios “kimpojpolos akimeh kijtlakoah n tlaltíkpaktli” (Apocalipsis 11:18). ¿Ken kijtlakojtokej Tlaltikpak? Kichijtokej ijkon ken opanok ijkuak okatka Noé. Biblia kijtoa: “Pero Tlaltikpak oijtlakauik iixpan akin melauak toTajtsin Dios, uan itech Tlaltikpak sapanoa omoteuiayaj. Kema, toTajtsin Dios okitak Tlaltikpak, uan oijtlakauik”. Ik non, toTajtsin Dios okilui Noé: “Nikinmixpolos yejuan uan niktlajtlamis Tlaltikpak” (Génesis 6:11-13). ¿Tikita axkan nochi nin tlamantli mochijtok? Uan amo san non: tlaltikpaktlakamej yokinchijchijkej miakej teposmej tlen uelis kipojpolos Tlaltikpak uan nochtin Tlaltikpaktlakamej. Uan noijki okseki tlamantli tlaltikpaktlakamej kijtlakojtokej Tlaltikpak: yolik kitlamijtokej nochi tlen kichiua ma tiyoltokan: ejekatl, ueyi atl uan nochi tlen onka itech Tlaltikpak.

 Ximokuayejyeko itech nin tlamantli, ¿yiuejkika tlaltikpaktlakamej okipiayaj teposmej tlen ika uelis kinmixpoloskiaj nochtin tlaltikpaktlakamej? Amo, pero axkan kema kipiaj teposmej. Tikitaj pampa momati kipiaj miakej teposmej uan noijki kijtlakojtokej nochi Tlaltikpak. Uan tlaltikpaktlakamej amo kajsikamatij ken sapanoa tlajyouiskej pampa kinchijchiuaj teposmej. Pero tiyolpakij miak tikmatiskej yejuan amo uelis kipojpoloskej Tlaltikpak. Biblia techiluia toTajtsin Dios amo kinkauilis okachi ma kijtlakokan Tlaltikpak, pampa achto ye kinmixpolos.

4. MOTETLAPOUIJTOK ITECH NOCHI TLALTIKPAK Mateo noijki kijtoa mochiuaskia se tekitl tlen amo keman omotaya: “Iwa ijkuak nin kualitlájtoli non techilia kenomi Dios tlanawatia, motetlapowis itech nochi n tlaltíkpaktli para nochteh makimatikah. Iwa ijkuakó, tlamis n tlaltíkpaktli [noso tlen amo kuali]” (Mateo 24:14). Tetlapouilistli amo mochijtok ken kichiuaj miakej tlaneltokalismej. Kitematiltiaj itlaj tlen miak ipati: “Nin kualitlájtoli non techilia kenomi Dios tlanawatia”. ¿Akinmej kitematiltiaj nin Tekiuajkayotl itech nochi Tlaltikpak?

ITlaixpantijkauan Jehová okichijchijkej www.mt1130.com, pampa kitematiltiskej iTekiuajkayo toTajtsin Dios. Ompa tikinmajsij amatlajkuilolmej ika kanaj 700 tlatlamantli tlajtolmej. ¿Oksekimej noijki mochijchikauaj pampa kitematiltiskej nin Tekiuajkayotl? Ijkuak ayamo omoixmatiaya Internet, iTlaixpantijkauan Jehová yokinmixmatiayaj pampa otetlapouiayaj itech nin Tekiuajkayotl. Itech xiuitl 1939 pampa tlayekapan itech revista The Watchtower (axkan Akin Tetlapouijtok) tikajsij seki tlajtolmej tlen kijtoaj “Kitematiltia iTekiuajkayo Jehová”. Se amochtli tlen tlajtoa itech tlaneltokalismej kijtoa iTlaixpantijkauan Jehová “sapanoa mochijchikauaj tetlapouiskej ken amo ikaj kichiua”. TiiTlaixpantijkauan Jehová titetlapouiaj itech iTekiuajkayo toTajtsin Dios uan noijki ayakmo miak poliui uan kitlajtlamis nochi tlen amo kuali.

¿Yotikitak ken mochijtok nin tlamantli axkan? Itech cien xiuitl tlen yopanokej nin revista yokijto miak tlamantli tlen techititia nochi tlen axkan panotok, uan akinmej kitlajtoltiaj kitaj melauak mochijtok. Pero maski onka miak tlamantli tlen techititia melauak ijkon, oksekimej tlaltikpaktlakamej kijtoaj amo melauak tlen tikijtoaj uan  tlen panoa itech Tlaltikpak nochipa omotaya uan amo moijtlakojtok. Kijtoaj pampa axkan yiuelij tikmatij tlen panoa itech okseki uejueyij altepemej, ik non, tikmatij nochi ouijkayotl tlen ompa panoa. Pero noijki miakej tlaltikpaktlakamej kitaj nochi tlen panoa uan kajsikamatij axkan sapanoa oui.

Sekimej tlaltikpaktlakamej akinmej okichijchijkej amochtli The Bulletin of the Atomic Scientists, itech xiuitl 2014 okinmiluijkej tlaltikpaktlakamej akinmej katej itech Consejo de Seguridad de las Naciones Unidas, ken yejuan kuali yokitakej nochi tlen uelis kinmijtlakos tlaltikpaktlakamej, axkan kimatij ok uelis mikiskej nochtin tlaltikpaktlakamej san pampa kichijchijtokej miak tlamantli. Nochi nin tlamantli kinmititia miakej tlaltikpaktlakamej uan noijki akinmej okichijchijkej nin amochtli, ken ayakmo miak poliui uan tlamis nochi tlen amo kuali pampa tikatej itech itlamian tonalmej. Pero amo ma timomojtikan. ¿Tleka? Pampa uelis timomakixtiskej.