Biblia amo kijtoua ma tikintlatlaujtikan teotsitsintin, san moneki ma tiktlatlaujtikan toTajtsin Dios ika itoka Jesús. Jesús okinmilui idiscípulos: “Ijkin ximotlatlaujtikan: ToTajtsin tlen tika iluikak ma mochipaua motoka” (Mateo 6:9, Biblia de América [BA]). Jesús amo keman okijto ma tiktlatlaujtikan se teotsin, se ángel noso ok ikaj, san moneki tiktlatlaujtiskej toTajtsin Dios.

Jesucristo noijki okijto: “Ne niojtli, nikpia tlen melauak uan niktemaka yolilistli. Amikaj uelis kixmatis noTajtsin tla amo nikpaleuis” (Juan 14:6, BA). San Jesús uelis techpaleuis tla tiknekij tikixmatiskej toTajtsin Dios (Hebreos 7:25).

¿Uelis tiktlatlaujtiskej toTajtsin Dios uan noijki teotsitsintin?

Itech majtlaktli tlanauatilmej toTajtsin Dios, okijto: “Ne nimoTeko, nimoDios uan san ne nikneki techueyichiuakan” (Éxodo 20:5, BA). ¿Tleka san ye kineki ma tikueyichiuakan? Nota itech Biblia de América kijtoua: “San ye Dios uan san ye moneki tikueyichiuaskej”. ToTajtsin Dios kineki san ye ma tikueyichiuakan uan ijkuak timotlatlaujtiaj tikueyichiuaj (Isaías 48:11).

Tla tikintlatlaujtiaj teotsitsintin, ángeles noso okse tlamantli, toTajtsin Dios moyolkokos. Amochtli Apocalipsis kijtoua ijkuak apóstol Juan okinekiaya kiueyichiuas se ángel, ye okilui: “Amo ijkon xikchiua ne san namouan nitekipanoua, nikinpaleuia akinmej mochijchikauaj yetoskej yolmelauakej uan kitematiltiaj tlen Jesús okichi. San toTajtsin Dios moneki xikueyichiua” (Apocalipsis 19:10, BA)