Biblia kijtoua

 Ijkuak kichiuaj se bautismo nochi icuerpo kikalakiaj ijtik atl uan oksepa kikixtiaj. a Itech Biblia tiktlajtoltia ken miakej omoapolaktijkej (Hechos 2:41). Biblia noijki kijtoua Jesús okiapolaktijkej ijtik se aueyatl (Mateo 3:13, 16). Satepan se tlakatl etíope okitlajtlanki makiapolaktikan ijkuak oajsitoj “kanin okatka atl” (Hechos 8:36-40).

 Jesús okijto tla ikaj okinekiaya yetos idiscípulo omonekiaya moapolaktis (Mateo 28:19, 20). Satepan apóstol Pedro noijki ijkon otlamachti (1 Pedro 3:21).

Axkan tikitaskej nin tlamachtil:

•  ¿Tlen kijtosneki timoapolaktis?

•  ¿Kijtoua Biblia makinkuatekikan konemej?

•  ¿Tlen kijtosneki timoapolaktiskej ika itoka toTajtsin, iKone uan espíritu santo?

•  ¿Tlajtlakoli tla oksepa timoapolaktiskej?

•  Biblia kijtoua sekimej okse tlamantli moapolaktiaj

•  ¿Ken moneki moapolaktiskej akinmej kichiuaj ken Cristo?

 ¿Tlen kijtosneki timoapolaktis?

 Ijkuak ikaj moapolaktia kiteititia yomoyolkopki uan yokilui toTajtsin Dios nochipa kitekichiuilis maski san tlen tlamantli kixnamikis. Nin kijtosneki nochipa kitlakamatis toTajtsin Dios uan Jesús. Tla ikaj kineki nochipa yoltos itech xochitlali moneki moapolaktis.

 Ijkuak ikaj kikalakiaj ijtik atl uan kikixtiaj kijtosneki kipatla inemilis. Biblia kijtoua ijkuak ikaj moapolaktia yetoskia ken miki (Romanos 6:4; Colosenses 2:12). Ijkuak ikaj moapolaktia kijtosneki ayakmo kichiuas tlen achto okichiuaya uan kipias se yankuik inemilis para kitekichiuilis toTajtsin Dios.

 ¿Kijtoua Biblia makinkuatekikan konemej?

 Amo, Biblia amo kanaj kijtoua moneki makinkuatekikan konemej. b

 Biblia kijtoua tla ikaj kineki moapolaktis moneki kichiuas seki tlamantli. Achto moneki kimatis tlen melauak tlamachtia Biblia, kichiuas tlen momachtia uan moyolkopas, noijki motlatlaujtis ixpan toTajtsin Dios para motemakas (Hechos 2:38, 41; 8:12). Nochi nin tlamantli amo yiuelis kichiuas se konetl.

 ¿Tlen kijtosneki timoapolaktiskej ika itoka toTajtsin, iKone uan espíritu santo?

 Jesús okinmilui imachtijkauan: “Xitlamachtikan [...]. Xiteapolaktikan ika itoka noTajtsin, iKone uan espíritu santo. Xikinmachtikan makichiuakan nochi tlen onamechnauati” (Mateo 28:19, 20). Timoapolaktiskej ika itoka kijtosneki akinmej moapolaktiskej kimatij Jehová uan Jesucristo tlanauatiaj noijki kimatij ken miak ipati iespíritu santo toTajtsin Dios. Ijkuak apóstol Pedro okipajti se tlakatl tlen okatka koxo okijto ika itoka. Ijkin okijto: “¡Ika itoka Jesucristo Nazareno, nimitsiluia xinejnemi!” (Hechos 3:6). ¿Tleka ijkon okijto? Porque okimatiaya Jesús otlanauatiaya uan okipiaya chikaualistli.

•   Ijkuak kijtoua “noTajtsin” kijtosneki Jehová. c Ye akin otechchijchi, otechmakak tonemilis uan kipia nochi chikaualistli. Ikinon san Jehová tlanauatia (Génesis 17:1; Apocalipsis 4:11).

•   Ijkuak kijtoua “iKone” kijtosneki Jesucristo, akin topatka okitemakak inemilis (Romanos 6:23). Para timomakixtiskej sapanoua ipati matikajsikamatikan san ika Jesús uelis mochiuas tlen kineki toTajtsin Dios ipan tlaltikpak (Juan 14:6; 20:31; Hechos 4:8-12).

•   Ijkuak kijtoua “espíritu santo” kijtosneki ichikaualis toTajtsin Dios tlen ika kichiua nochi. d ToTajtsin Dios okitekitilti iespíritu santo para ika kichijchiuas nochi, techmakas tonemilis, para motlapouis inmiuan profetas noso akinmej ochantiayaj tlaltikpak uan para mamochiua tlen kineki (Génesis 1:2; Job 33:4; Romanos 15:18, 19). Noijki iespíritu santo okinpaleui tlakamej para makijkuilokan itech Biblia tlen mokuayejyekoua toTajtsin Dios (2 Pedro 1:21).

 ¿Tlajtlakoli tla oksepa timoapolaktiskej?

 Ualeua miakej tlakamej uan siuamej kipatlaj inreligión. Tla yomoapolaktijkej, ¿tlajtlakoli oksepa moapolaktiskej itech okse religión? Xamo sekimej kijtoua kema, porque amo kuali kajsikamatij Efesios 4:5, ompa kijtoua: “Onka san se toTeko, san se tlamantli tikneltokaj uan san se tlamantli timoapolaktiaj”. Pero nin texto amo kijtoua tlajtlakoli tla oksepa ikaj moapolaktis. ¿Tleka ijkon tikijtouaj?

 Tlen kijtoua achto. Tla tikitaj tlen kajki achto itech Efesios 4:5 tikitaj apóstol Pablo okijto moneki san sekan tiyetoskej. Akinmej kichiuaj ken Cristo moneki san se tlamantli kineltokaskej (Efesios 4:1-3, 16). Uelis san sekan yetoskej tla nochtin kichiuaj ken toTeko, Cristo Jesús, san se tlamantli kineltokaj nin kijtosneki san se tlamantli kajsikamatij tlen tlamachtia Biblia uan ijkon nochtin kichiuaj seki tlamantli para moapolaktiskej.

 Se tonal apóstol Pablo okinyole sekimej oksepa mamoapolaktikan. Porque yejuan omoapolaktijkej pero amo kuali okajsikamatiayaj tlen tlamachtia Biblia (Hechos 19:1-5).

 Apolaktilistli tlen toTajtsin Dios kiselia. Para toTajtsin Dios kiselis akin moapolaktia moneki kuali kajsikamatis tlen tlamachtia Biblia (1 Timoteo 2:3, 4). Tla ikaj omoapolakti pero amo okimachtijkej tlen melauak tlamachtia Biblia, maski omoapolakti toTajtsin Dios amo okiseli (Juan 4:23, 24). Xamo ikaj omoapolakti ika nochi iyolo pero ijkuak ijkon okichi amo kuali okixmatiaya toTajtsin Dios (Romanos 10:2). Para Totajtsin Dios kiselis, moneki kimatis tlen melauak tlamachtia Biblia, kichiuas tlen momachtia, motemakas ixpan toTajtsin Dios uan oksepa moapolaktis. Amo tlajtlakoli tla oksepa moapolaktis. Kuali tla ijkon kichiuas.

 Biblia kijtoua sekimej okse tlamantli moapolaktiaj

 Biblia kijtoua sekimej okse tlamantli omoapolaktijkej, amo omoapolaktijkej ken akinmej okichiuayaj ken Cristo. Matikitakan ken omoapolaktijkej.

 Ken oteapolaktiaya Juan Bautista. e Ijkuak se judío noso ikaj tlen omochi judío oyaya para Juan makiapolakti, okiteititiaya omoyolkopaya porque amo okitlakamatki tlanauatil tlen okimakakej Moisés. Juan oteapolaktiaya uan ijkon okinpaleuiaya para kixmatiskiaj uan kiseliskiaj Mesías (Lucas 1:13-17; 3:2, 3; Hechos 19:4).

 Ken omoapolakti Jesús. Juan Bautista okiapolakti Jesús pero nin amo ken sekimej omoapolaktijkej. ¿Tleka? Porque Jesús amo okatka tlajtlakole (1 Pedro 2:21, 22). Ye amo omoapolakti para kiteititis moyolkopa nion para kitlatlaujtis toTajtsin Dios makipaleui makipia chipauak itlalnamikilis (1 Pedro 3:21). Ye omoapolakti para kiteititis kineki kichiuas tlen toTajtsin Dios kineki uan para yetos Mesías noso Cristo. Nin noijki kijtosneki kitemakaskia inemilis topatka (Hebreos 10:7-10).

 Kinapolaktiaj ika espíritu santo. Juan Bautista uan Jesucristo okijtojkej sekimej kinapolaktiskiaj ika espíritu santo (Mateo 3:11; Lucas 3:16; Hechos 1:1-5). Ijkuak ijkon kinapolaktiaj amo ken ijkuak kinapolaktiaj ika itoka espíritu santo (Mateo 28:19). ¿Tleka?

 Amo miakej akinmej kichiuaj ken Cristo kinapolaktiaj ika espíritu santo. Ninmej kinpejpenaj ika espíritu santo para yaskej iluikak uan tekitiskej iuan Cristo ken tekiuajkej uan teopixkej (1 Pedro 1:3, 4; Apocalipsis 5:9, 10). f ¿Akinmej kinnauatiskej? Nochtin akinmej kichiuaj ken Cristo uan kichiaj chantiskej ipan tlaltikpak ijkuak mokopas xochitlali (Mateo 5:5; Lucas 23:43).

 Kinapolaktiaj itech Cristo Jesús uan itech imikilis. Akinmej kinapolaktiaj ika espíritu santo noijki kinapolaktiaj itech Cristo Jesús (Romanos 6:3). Ijkon kinapolaktiaj akinmej kinpejpena tlanauatiskej iuan Jesús ompa iluikak. Ijkuak kinapolaktiaj itech Cristo Jesús peua pouij itech itlanechikol: ye itsonteko cuerpo uan yejuan cuerpo (1 Corintios 12:12, 13, 27; Colosenses 1:18).

 Akinmej kinpejpenaj yaskej iluikak noijki kinapolaktiaj itech imikilis Jesús (Romanos 6:3, 4). Ijkon ken Jesús, okachi mochijchikauaj kitlakamatiskej uan kitekichiuiliskej toTajtsin Dios uan ayakmo kichiaj chantiskej tlaltikpak. Ijkuak tikijtouaj moapolaktiaj itech imikilis Jesús, mochiuaj ijkuak ixpoliuij uan kinyolitiaj para yoltoskej iluikak ken espíritus (Romanos 6:5; 1 Corintios 15:42-44).

 Kinapolaktiskej ika tlitl. Juan Bautista okijto: “Ye [Jesús] namechapolaktis ika espíritu santo uan ika tlitl. Ye kikitskijtok tlen ika kejekanis trigo uan tlachipauas kanin tlaejekanis. Kololos trigo tlen yichipauak uan kitlatis, pero tlajsoli kitlamotlati ijtik tlitl tlen amo keman seuis” (Mateo 3:11, 12). Nin texto kiteititiaj akinmej kinapolaktiaj ika tlitl uan ika espíritu santo amo san se tlamantli. ¿Tlen kijtosneki tlen okijto Juan?

 Trigo kineskayotia akinmej kichiuaj uan kikakij tlen Jesús kinmiluia. Yejuan uelis kinapolaktiskej ika espíritu santo. Tlajsoli kineskayotia akinmej amo kikakij Jesús. Yejuan kinapolaktiskej ika tlitl nin kijtosneki kinmixpoloskej para nochipa (Mateo 3:7-12; Lucas 3:16, 17).