TiiTlaixpantijkauan Jehová sapanoa tikpatioitaj Biblia. Nochipa ika timomachtiaj uan ika titlamachtiaj iTekiuajkayo toTajtsin Dios (Mateo 24:14, TNM). Pero ken sapanoa tiktekitiltiaj san niman tlajtlami. Ik non, Traducción del Nuevo Mundo tlen okiski ika inglés itech 2013, moneki ma uejkaua uan kualtsin ma mota.

ITlaixpantijkauan Jehová tlen kinchijchiuaj amatlajkuilolmej ompa Estados Unidos okiyekiluijkej akin tlayekana itech se empresa tlen kichiua encuadernación, otiknekiayaj se Biblia tlen nochi ma kixiko. Akin kiyekana empresa okijto: “Amo onka Biblia tlen nankinekij. Porque nochi Biblias tlen onka, kinchijchiuaj para yetoskej ipan se mesa, amo para kintekitiltiskej”.

Amo kuali opepechitokaj inkuitlapanyo tlen achto okintlalilijkej Traducción del Nuevo Mundo. San niman oxitiniayaj biblias kanin tlatotonia noso kiaui. Para kichijchiuaskiaj se Biblia tlen nochipa motekitiltiskia uan amo itlaj ma kipano kanin tlatotonia noso kanin seua, akinmej kinchijchiuaj amatlajkuilolmej omonekiaya kitaskej nochi tlen motekitiltis para inkuitlapanyo, tlen ika kipepechoskej uan ken kichiuiliskiaj encuadernación. Ijkuak nochi okitakej, okichijchijkej seki cubiertas para kintlaliliskej seki biblias. Satepan okinmiluijkej sekimej iTlaixpantijkauan Jehová tlen chantij kanin tlatotonia noso kanin sapanoa seua, ma kintekitiltikan.

Chikuase metstli satepan, ninmej tokniuan okintemaktilijkej biblias. Akinmej kinchijchiuaj amatlajkuilolmej kuali okinmitakej uan noijki okachi okiyektlalijkej okseki tlamantli para oksepa kinchijchiuaskiaj okseki biblias. Okintekitiltijkej kanaj 1,697 biblias. Seki san kanin okintlalijkej. Se neskayotl, se yoak osiauak ijkuak okiauik uan okseki okinkajkajkej ijtik atl ijkuak opanok se chikauak ejekakiauitl noso huracán. Otlapaleui nochi tlen okinpanok.

Itech 2011, ijkuak okiyejyekojtokaj Biblia, okinkojkej encuadernadoras tlen okachi yankuikej para kitekitiltiskej ompa Ebina (Japón) uan Wallkill. Amo san omonekiaya ma kinkixtikan miakej biblias noijki omonekiaya ma kisakan san se tlamantli.

Itech 2012, ome imprentas opejkej kikixtiaj Traducción del Nuevo Mundo de 1984 ika inkuitlapanyo tliliuik uan okipiaya ken plástico chichiltik tlen moixmati ken poliuretano. Pero oijtlakauiayaj ijkuak okinpepechoayaj. Uan tlen ika okipepechoayaj uan forro amo keman okintekitiltiayaj itech non ecuadernadoras nion ika otekitikej ijkuak okinyejyekojkej biblias. Maski okitakej tlen uelis kichiuaskiaj, satepan ayakmo okinchijchijkej biblias.

Akinmej kichijchiuaj tlen motekitiltia para inkuitlapanyo biblias, okijtojkej amo uelis yetos yamanki uan oui kiyektlaliskej. Pero amo okijtojkej amo kinchijchiuaskej inkuitlapanyo biblias tlen okachi tlaxikoskiaj. Omochijchikajkej kichijchiuaskej yamanki inkuitlapanyo tlen amo ijtlakauij. Kanaj naui metstli okiyejyekojtokaj ika miak tlamantli uan satepan oksepa opejkej kinchijchiuaj.

Septiembre itech 2012, otlanauatijkej ayakmo ma kinchijchiuakan biblias hasta ijkuak ma tlamikan tlen yokatkaj uan omonekiaya kichiaskej ma kisa Traducción del Nuevo Mundo. Uan kisaskia itech 5 de octubre 2013 itech nechikol tlen mochiua sejse xiuitl tlen kichiua Watch Tower Bible and Tract Society of Pennsylvania.

Uan 9 de agosto 2013 okintitlanilijkej akinmej kinchijchiuaskiaj uan mostlatika san niman okinpeualtijkej. Uan achto Biblia okiski 15 de agosto. Uan imprenta tlen kajki Estados Unidos uan Japón chikome semanas otekitikej yoak uan tonal. Ijkon akinmej oyajkej nechikol tlen mochiua sejse xiuitl okiselijkej sejse Biblia.

Maski nin Biblia kualtsin mota uan nochi kixikoa, okachi miak ipati tlen itech ijkuilitok porque temakixtia. Uan mostlatika se siuatl tlen chanti Estados Unidos, okijkuilo: “Tlasojkamati miak onantechmakakej nin Biblia porque axkan okachi nikajsikamati”.