Itech metstli noviembre, xiuitl 2012, iTlaixpantijkauan Jehová okinemakakej Hotel Bossert. Ik non, iTlaixpantijkauan Jehová, akinmej ompa ochantiayaj, okiskej itech nin kali uan okimakakej llaves akin okiko. Tomin tlen ika okintlaxtlauilijkej nin kali, kitekitiltiskej pampa tlamachtiskej ika Biblia itech nochi Tlaltikpak.

Nin kali tlen okinemakakej kipia catorce pisos uan chijchijtok ken kalmej tlen okinchijchiuayaj yiuejkika itech ueyi altepetl Italia. Pampa iTlaixpantijkauan Jehová ayakmo tekitiskej itech altepetl Brooklyn uan panoskej itech altepetl Warwick (Nueva York), ik non, okinemakakej. Uelis panos miak xiuitl pampa panoskej.

Louis Bossert, tlen ochantiaya itech altepetl Nueva York uan okinemakaya kuauitl, okichijchi nin kali itech xiuitl 1909. Okichijchi pampa kitekitiltis ken hotel, pampa kinkalotis seki tlaltikpaktlakamej noso pampa ompa chantiskej. Pero pampa miakej ompa oajsiayaj amo oakiayaj, ik non, okachi okiueyitili nin kali itech xiuitl 1914. Uan itech xiuitl 1916 okichijchi ikuapak kali se restaurante tlen omotokayotiaya Marine Roof.

Itech xiuitl 1980, akinmej tekitij itech Kali kanin kinyekanaj iTlaixpantijkauan Jehová, okikojkej nin kali uan opejkej kiyektlaliaj pampa ompa chantiskej. Ninmej tokniuan okipatlakej kanin omijtotiayaj uan okiyektlalijkej pampa ompa tlakuaskej, uan restaurante tlen okatka okiyektlalijkej pampa ompa moseuiskej akinmej ompa chantiskej noso akinmej ompa mokalotiskej.

Itech xiuitl 2010, iTlaixpantijkauan Jehová opejkej kinkalotiaj itech nin kali akinmej yauij tlachiatiuij itech Kali kanin kinyekanaj iTlaixpantijkauan Jehová.

Akin okiko nin kali mokuayejyekoa kiyekchijchiuas pampa oksepa kitekitiltis ken hotel. Pampa iTlaixpantijkauan Jehová kuali okimaluiayaj nin kali, amo oui oksepa kinchiuiliskej cuartos tlen sapanoa kuajkualtsitsintin.

Ijkuak ayamo opanoayaj iTlaixpantijkauan Jehová itech Hotel Bossert, nin kali ayakmo kuali okatka pampa amo okimaluiayaj. Sapanoa sokio okatka, uan itempa kali tlen chijchijtok ika terracota omotaya yiuetsiskia. Ventanas ayakmo kuali okatkaj. San totomej ochantiayaj itech restaurante Marine Roof. Pero iTlaixpantijkauan Jehová opejkej tekitij pampa kiyekchijchiuaskej, otlapaleuijkej miakej tlaltikpaktlakamej tlen chantij itech ueyi altepetl Estados Unidos, uan otlanki okiyekchijchijkej itech xiuitl 1991.

Ijkuak okiyekchijchijkej, iTlaixpantijkauan Jehová okichipajkej uan okiyektlalijkej tlen okatka kiauak. Noijki okipatlakej terracota tlen okipiaya itempa kali uan okitlalijkej okse tlen chijchijtok ika fibra de vidrio. Uan okintlalijkej yankuikej ventanas tlen chijchijtokej ika caoba, se kuauitl kuajkualtsin.

Nochi okiyektlalijkej ijtik kali, kuajkualtsin okichijchijkej kanin mochiaj. Uan pampa kiyektlaliskej tepamitl tlen chijchijtok ika mármol, okikojkej tetl itech ueyi altepetl Italia. Ninmej tokniuan noijki okipatlakej yeso tlen okatka itech techo, pampa atl okijtlako.

Okachi oui okinyektlalijkej uejueyij tlaketsalmej tlen chijchijtokej ika tepostli. Ninmej ochijchijtokaj ika scagliola, itlaj tlen mochiua itech ueyi altepetl Italia uan mota ken mármol. Miak uelta okintlapaluijkej ninmej tlaketsalmej. Pampa amo ikaj okimatiaya ken mochijchiua scagliola omonekiaya tlatemoskej ken uelis kichijchiuaskej. Okajsikej se amochtli itech se biblioteca tlen kipia se universidad tlen kajki itech non altepetl, non okijtoaya ken uelis kichiuaskej. Opanok seki semanas, okichijkej ma motakan tlaketsalmej ken achto okatkaj.

Nin tekitl okitlamijkej itech xiuitl 1991, Hotel Bossert oksepa kuajkualtsin omotaya. Pampa kintlasojkamatiliskej, okinmakakej Premio Lucy G. Moses, itlaj tlen kinmakaj akinmej mochijchikauaj kinyektlaliskej kalmej tlen yiuejkika katej.