Ijkuak ome iTlaixpantijkauan Jehová otetlapouiayaj inkalijtik tlaltikpaktlakamej, otetlajpalojkej itech se kali. Okiski se tlakatl tlen mota sapanoa omolyokokoaya, uan itech ikalijtik omotaya se mekatl ompa pilkatok inauak escaleras.

Nin tlakatl okinmilui ma panokan, yejuan okitlajtlanijkej tleka ompa pilkatok non mekatl. Non tlakatl okijto ika mokechpiloskia pero ijkuak okikak timbre ok okinek tlachiati. Ninmej iTlaixpantijkauan Jehová okipaleuijkej kuali ma mokuayejyeko uan okiuikakej iuan akin tlapajtia pampa ma kipaleui.

Nin okiski itech se periódico itech ueyi altepetl Bélgica. ITlaixpantijkauan Jehová kinpaleuiaj miakej tlaltikpaktlakamej pampa amo ma momiktikan. Ma tikitakan ken okinpaleuijkej itech okseki altepemej.

Se siuatl tlen chanti itech ueyi altepetl Grecia okijto: “Ijkuak nonamik onechkajkaya sapanoa onechyolkoko. Pampa sapanoa onimoyolkokoaya, onimokuayejyeko okachi kuali ma nimomikti. Onechyolseuiaya nikmatis ayakmo nitlajyouis tla nimomiktis”.

Pero non siuatl okitato akin tlapajtia. Satepan, okintemo iTlaixpantijkauan Jehová, opejki momachtia Biblia uan yaui nechikolmej. Ye okijto: “Nochtin tokniuan melauak onechtlasojtlayaj, itlaj tlen youejka oniknekiaya. Axkan nikinpia miakej noyolikniuan tlen ueli intech nitlaneltoka. Okachi niyolpaki uan nikpia yolseuilistli, ayakmo nechtekipachoa tlen uelis panos satepan”.

Se siuatl tlen iTlaixpantijka Jehová tlen chanti itech ueyi altepetl Inglaterra, okijto: “Se siuatl tlen nikixmati onechnotski pampa sapanoa omoyolkokoaya, uan onechilui momiktiskia non yoak. Pampa nikchiuas kuali ma mokuayejyeko, oniktekitilti se tlamachtil tlen kipia revista ¡Despertad! de mayo de 2008 tlen tlajtoa itech akinmej kinekij momiktiskej uan onikyolseui ika Biblia. Axkan, maski ok okipiaya ouijkayotl, ayakmo omokuayejyekoaya momiktis”.

Michael, se iTlaixpantijka Jehová tlen chanti itech ueyi altepetl Ghana, opejki motlapouia iuan se ichpochtli tlen tlanemakati kanin ye tekiti. Se tonal Michael okitak sapanoa omoyolkokoaya non ichpochtli uan okitlajtlani tlen kipanoa.

Non ichpochtli okijto okinekiaya momiktis pampa inamik oyajki iuan okse siuatl. Michael okiyolchika uan okitliokoli ome amochmej tlen tlajtoaj itech Biblia. Tlen ye okitlajtolti okipaleui pampa ayakmo ma momikti. Non ichpochtli okachi omomachti ika Biblia uan axkan iTlaixpantijka Jehová.

Itech ueyi altepetl Estados Unidos, se periódico okijkuilo tlen okichi se telpochtli tlen iTlaixpantijka Jehová ijkuak otetlapouiaya, ye okitak itech parque se carro tlen oxotlatoka. Nin telpochtli okijto:

“Onikitak itech iescape carro okitlalilijkej se tubo de secadora uan okikalakijkej itech ventana tlen otlatsaktoka ika cinta adhesiva.

”Totoka onitlachiato itech carro, uan itech ventana onikitak se siuatl chokatok, uan sapanoa tlapopokatok. Chikauak onikilui non siuatl: ‘¡Amo ijkon xikchiua!’.

”Ijkuak oniktlaposkia puerta, onikinmitak eyi konemej. Uan ijkuak onitlatlapo, non siuatl onechilui: ‘¡Xinechkaua! ¡Xinechkaua ma nimiki iuan nokoneuan!’.

”Onikilui: ‘Nimitstlatlaujtia amo ijkon xikchiua, ijkon amo itlaj tikyektlalis’.

”Ye onechilui: ‘Nikneki nias iluikak, uan nikinuikas nokoneuan’.

”Ijkuak siuatl ok ochokatoka, ne onimotlankuaketski uan opejki nichoka. Uan oksepa onikilui: ‘Nimitstlatlaujtia amo ijkon xikchiua’. Satepan oniknapalo uan yolik onikkixti.

”Onechtlatlaujti: ‘¡Xikinkixti nokoneuan!’.

”Yejuan okiajkokej inmatsitsiuan pampa ma nikinkixti. Ompa okatkaj ome takotsitsintin, se okipiaya naui xiuitl uan okse makuili, noijki ompa okatka se chokotsin tlen okipiaya ome xiuitl. Yejuan amo itlaj okichiuayaj, nion okimatiayaj tla uelis mikiskiaj.

”Ijkuak nochtin onikinkixti, onikseui carro. Inmiuan onimotlali uan onikilui siuatl: ‘Xinechilui tlen mitsyolkokoa’.”

ITlaixpantijkauan Jehová kitaj yolilistli se tetliokolil tlen miak ipati tlen techmaka toTajtsin Dios, akin oTechchijchi. Itech nochi Tlaltikpak mochijchikauaj pampa kinyolseuiskej akinmej okipolojkej se ikalchanejka pampa omomikti, uan kinpaleuiaj akinmej kinekij momiktiskej.