IHubo 78:1-72
Imaskili.* Ihubo lika-Asafi.+
78 Bantu bami, zwanini umthetho wami,*Lalelani amazwi aphuma emlonyeni wami.
2 Ngizavula umlomo wami ngikhulume izaga.
Ngizakhuluma izinto ezifihlakeleyo zakudala.+
3 Izinto esazizwayo lesizaziyo,Esazilandiselwa ngobaba bethu,+
4 Asisoze sizifihlele abantwabethu.
Sizatshela isizukulwane esizayo+Ngemisebenzi kaJehova emikhulu langamandla akhe,+Langezinto ezimangalisayo azenzileyo.+
5 Wanika uJakhobe umlayo,*Wanika u-Israyeli umthetho.
Watshela okhokho bethu
Ukuthi izinto lezi bazilandisele abantwababo,+
6 Ukuze isizukulwane esilandelayo,Abantwana abazazalwa, babezazi izinto lezi,+Labo besebelandisela abantwababo.+
7 Lokhu kuzakwenza abantwababo bamthembe uNkulunkulu.
Abasoze bayikhohlwe imisebenzi kaNkulunkulu,+Njalo bazalalela imilayo yakhe.+
8 Abasoze bafanane labokhokho babo,Ababeyisizukulwane esilenkani futhi esihlamukayo,+Esasihlala sitshintshatshintsha ingqondo,*+Njalo esasingathembekanga kuNkulunkulu.
9 Abako-Efrayimi babehlome ngemitshoko,Kodwa babaleka ngosuku lwempi.
10 Abasigcinanga isivumelwano sabo loNkulunkulu,+Bala ukulandela umthetho wakhe.+
11 Bakhohlwa lalokho ayekwenzile,+Imisebenzi yakhe emangalisayo ayebatshengise yona.+
12 Wenza izimanga phambi kwabokhokho babo,+Elizweni leGibhithe, esabelweni seZowani.+
13 Wehlukanisa ulwandle ukuze bachaphe,Wenza amanzi ama njengomduli.+
14 Wabakhokhela ngeyezi eminiKwathi ebusuku wabakhanyisela ngomlilo.+
15 Waqhekeza amadwala enkangala,Wabanathisa bakholwa angathi banatha esizibeni esitshonayo.+
16 Wakhipha amanzi amanengi edwaleni,Ageleza angathi yimifula.+
17 Kodwa baqhubeka bemonela,Bemhlamukela oPhezukonke enkangala.+
18 Bamdelela* uNkulunkulu ezinhliziyweni zabo,+Ngokufuna ngenkani ukudla ababekukhanuka.
19 Yikho bakhuluma kubi ngoNkulunkulu,Bathi: “Kambe uNkulunkulu angasinika ukudla enkangala?”+
20 Watshaya idwalaKwageleza amanzi, izifula zagcwala.+
Lanxa kunjalo bathi: “Kambe angenelisa ukusinika isinkwa,Kumbe ukunika abantu bakhe inyama?”+
21 UJehova wathi ekuzwa lokho wazonda kakhulu,+Wathumela umlilo+ kuJakhobe,Ulaka lwakhe lwavutha kwabako-Israyeli,+
22 Ngenxa yokuthi abazange bakholwe kuNkulunkulu,+Abazange bamthembe ukuthi angabasindisa.
23 Yikho wathuma amayezi,Wavula iminyango yamazulu.
24 Waqhubeka ebanika imana ivela phezulu ukuze badle,Wabanika ukudla okuvela ezulwini.+
25 Badla ukudla kwezingilosi,*+Wabanika okweneleyo badla basutha.+
26 Wenza umoya wempumalanga wavunguza emkhathini,Ngamandla akhe wenza kwavunguza umoya ovela eningizimu.+
27 Wabehlisela inyama ivela phezulu angathi luthuli,Wabanika inyoni ezinengi angathi yitshebetshebe esekhunjini lolwandle.
28 Wenza ukuthi ziwele enkambeni yabo,*Kuwo wonke amacele amatende abo.
29 Badla bazitika,Wabanika lokho ababekukhanuka.+
30 Kodwa bathi belokhu besafuna okunye ukudla,Bengakaginyi lalokho okwakusemilonyeni yabo,
31 Ulaka lukaNkulunkulu lwavutha phezu kwabo.+
Wabulala amadoda aqinileyo,+Wabulala amajaha ako-Israyeli.
32 Lanxa kunjalo baqhubeka besona,+Abazange bayikholwe imisebenzi yakhe emangalisayo.+
33 Yikho wenza insuku zabo zaphelela emoyeni njengomoya ophuma emakhaleni,+Waquma iminyaka yabo ngokubehlisela umonakalo bengalindelanga.
34 Kodwa wayesithi angabulala abanye babo, abaseleyo bamdinge.+
Babephenduka bamdinge uNkulunkulu,
35 Bakhumbule ukuthi uliDwala labo+Lokuthi uNkulunkulu oPhezukonke unguMhlengi wabo.*+
36 Kodwa bazama ukumqila ngemilomo yabo,Bemtshela amanga.
37 Inhliziyo zabo zazingabambelelanga kuye,+Abazange basigcine isivumelwano sakhe.+
38 Kodwa yena wayelesihawu,+Wayebathethelela* iziphambeko zabo angabatshabalalisi.+
Izikhathi ezinengi wayezibamba,Angabehliseli lonke ulaka lwakhe,+
39 Ngoba wayekhumbula ukuthi bangabantu nje,+Banjengomoya othi ungadlula ungaphindi uphenduke.
40 Bamhlamukela kanenginengi enkangala,+Bamzwisa ubuhlungu!+
41 Bamlinga kanengi uNkulunkulu,+Bamzwisa ubuhlungu oNgcwele ka-Israyeli.
42 Abazange bawakhumbule amandla akhe,Bakhohlwa ilanga abakhulula* ngalo esitheni,+
43 Lezibonakaliso azenza eGibhithe,+Izimanga azenza esabelweni seZowani.
44 Watshintsha amanzi ayesemigelweni esuka kuNayili aba ligazi,+Behluleka ukunatha ezifuleni zabo.
45 Wathumela izibawu ezinengi ukuze zibaqede+Lamaxoxo ukuze atshabalalise ilizwe labo.+
46 Wathumela intethe zatshaya zabhuqa izilimo zabo,Konke ababekusebenzele nzima kwadliwa ngumtshitshi wentethe.+
47 Watshabalalisa amasimu abo amagilebisi ngesiqhotho,+Lezihlahla zabo zesikhamori waziqeda ngamatshe esiqhotho.
48 Wehlisela isiqhotho+ phezu kwezifuyo zabo zokuthwala imithwalo,Wabulala izifuyo zabo ngombane.
49 Wabehlisela ulaka lwakhe oluvuthayoLentukuthelo yakhe evuthayo, wabenza bacindezeleka.
Wathuma izingilosi ukuthi zibehlisele umonakalo.
50 Wathululela ulaka lwakhe phezu kwabo.
Kazange abasindise ekufeni,Wabehlisela isifo esibulalayo.
51 Ekucineni wabulala wonke amazibulo aseGibhithe,+Isiqalo samandla abo okuzala elizweni likaHamu.
52 Wasekhipha abantu bakhe njengomhlambi wezimvu,+Wabakhokhela enkangala angathi ukhokhela umhlambi.
53 Wabavikela ngesikhathi ebakhokhela,Babengesabi lutho.+
Ulwandle lwasibekela izitha zabo.+
54 Wabaletha endaweni yakhe engcwele,+Elizweni leli lezintaba alithatha ngamandla akhe.+
55 Waxotsha izizwe phambi kwabo,+Wabapha ilifa ebalinganisela lona ngentambo yokulinganisa,+Wahlalisa izizwana zako-Israyeli emizini yazo.+
56 Kodwa baqhubeka bemdelela* futhi bemhlamukela+ uNkulunkulu oPhezukonke,Abazange balalele izikhumbuzo zakhe.+
57 Baphambuka njengabokhokho babo, abazange bathembeke.+
Babefana ledandili* elixegayo ongeke ulithembe.+
58 Baqhubeka bemcaphula ngokukhonza onkulunkulu bamanga ezindaweni zabo eziphakemeyo,*+Babemvusa ulaka* ngezithombe zabo ezibaziweyo.+
59 UNkulunkulu wakuzwa wazonda kakhulu,+Wasebalahla abako-Israyeli.
60 Wacina elitshiyile ithabanikeli laseShilo,+Itende ayehlala kulo phakathi kwabantu.+
61 Wayekela ibhokisi lesivumelwano lathunjwa,Wavuma ukuthi izitha zithathe isibonakaliso samandla lenkazimulo yakhe.+
62 Wabazondela abantu abalilifa lakhe,Wenza abantu bakhe babulawa ngenkemba.+
63 Umlilo waqothula amajaha,Intombi ezigcweleyo azizange zihlatshelelwe izingoma zomtshado.*
64 Abaphristi bakhe babulawa ngenkemba,+Abafelokazi babo abazange balile.+
65 UJehova wasevuka angathi uvuka ebuthongweni,+Waphaphama njengendoda elamandla+ ebidakwe liwayini.
66 Waxotsha izitha zakhe zabuyela emuva,+Wazithela ihlazo elingapheliyo.
67 Walitshiya itende likaJosefa,Kazange asikhethe isizwana sako-Efrayimi.
68 Kodwa wakhetha isizwana sakoJuda,+Intaba iZiyoni ayithandayo.+
69 Wenza ukuthi indawo yakhe engcwele ihlale isikhathi eside njengamazulu,+Lanjengomhlaba awumise ukuthi uhlale kuze kube nini lanini.+
70 Wakhetha uDavida+ inceku yakhe,Wamthatha ezibayeni zezimvu.+
71 Wamsusa ekweluseni izimvu ezilamazinyane,Wamenza waba ngumelusi kaJakhobe isizwe sakhe.+
Wambeka phezu kuka-Israyeli olilifa lakhe.+
72 UDavida wabelusa ngenhliziyo eqotho,+Wabakhokhela ngobungcitshi.+
Amabala angaphansi
^ Khangela iNgcazelo Yamabala.
^ Kumbe, “imfundiso yami.”
^ Kumbe, “izikhumbuzo.”
^ NgesiHebheru, “Esingazange silungise inhliziyo zaso.”
^ NgesiHebheru, “Bamlinga.”
^ Kumbe, “kwezidalwa ezilamandla.”
^ NgesiHebheru, “yakhe,” okutsho uNkulunkulu kumbe u-Israyeli.
^ Kumbe, “nguye owayebaphindiselela.”
^ NgesiHebheru, “Wayesibekela.”
^ NgesiHebheru, “abahlenga.”
^ NgesiHebheru, “bemlinga.”
^ Khangela iNgcazelo Yamabala.
^ Khangela iNgcazelo Yamabala.
^ Kumbe, “Babemenza abe lobukhwele.”
^ NgesiHebheru, “zidunyiswe.”
