U-Isaya 29:1-24
29 “Maye kuyo i-Ariyeli,* i-Ariyeli idolobho uDavida amisa kulo isihonqo sakhe.+Qhubekani minyaka yonke;Lihlale lisenza imikhosi yenu.+
2 Kodwa ngizakwenza ukuthi i-Ariyeli ihlupheke,+Kuzakuba lokukhala lokulila,+Izakuba njengeziko le-alithare kimi.+
3 Ngizakugombolozela ngezihonqo zami emaceleni wonke,Ngikuvimbezele ngothango lwezigodo ezicijileyoNgiphinde ngikuvalele ngemiduli.+
4 Uzakwehliselwa phansi,Ukhulume usemhlabathini,Ozakutsho kuzaphelela ethulini.
Ilizwi lakho lizazwakala emhlabathini+Njengelizwi lomuntu oledlozi.
Ilizwi lakho lizatshiyoza ethulini.
5 Amaxuku ezitha zakho azakuba njengothuli olucolekileyo,+Amaxuku alabo abalesihluku abe njengomule ophephukayo.+
Lokhu kuzakwenzakala masinyane, ngokucwayiza kwelihlo.+
6 UJehova wamabutho uzakukhulula.
Nxa esekwenza lokhu kuzakuba lomdumo wezulu lokuzamazama komhlaba kanye lomsindo omkhulu,Kube lomoya olamandla lesiphepho esilolaka lomlilo otshabalalisayo.”+
7 Ngemva kwalokhu ixuku lezizwe zonke lizalwisana le-Ariyeli,+Bonke abalwa layo,Lemiphotshongo yokuyivimbezela emisiweyo,Kanye lalabo abayicindezelayoBazakuba njengephupho, umbono webusuku.
8 Kuzakuba njengomuntu olambileyo ophupha esidla,Kodwa avuke elokhu elambile,Kube njengomuntu owomileyo ophupha enatha,Kodwa avuke elokhu ewomile njalo ediniwe.
Yikho okuzakwenzakala exukwini lezizwe zonkeElihlasela intaba iZiyoni.+
9 Mangalani libambe owangaphansi,+Zivaleni amehlo lingaboni lutho.+
Badakiwe kodwa abadakwanga liwayini,Bayadiyazela kodwa akubangelwanga butshwala.
10 UJehova usethululele umoya wobuthongo obukhulu phezu kwenu,+Uselivale amehlo lina baphrofethi,+Waligubuzela amakhanda lina elibona imibono.+
11 Yonke imibono kini iba njengebhuku elivaliweyo.+ Nxa ibhuku lelo bangalipha umuntu okwazi ukubala besebesithi: “Sicela ubalele phezulu,” yena uzakuthi: “Angenelisi ngoba livaliwe.”
12 Besekusithi nxa ibhuku lelo bangalipha umuntu ongenelisiyo ukubala, bathi: “Sicela ulibale,” yena uzakuthi: “Angikwazi ukubala.”
13 UJehova uthi: “Abantu laba bangikhonza ngemilomo yabo kuphela,Bangidumisa ngezindebe zabo kuphela,+Kodwa inhliziyo zabo zikhatshana kakhulu lami,Bangesaba ngenxa yemilayo abayifundiswe ngabantu.+
14 Ngakho yimi engizaphinda ngenze izinto ezimangalisayo ebantwini laba,+Kube yisimanga phezu kwesimanga,Ukuhlakanipha kwezihlakaniphi zabo kuzatshabalala,Lokuzwisisa kwabantu babo abakhaliphileyo kuzafihlwa.”+
15 Maye kulabo abazama ngazo zonke izindlela ukufihlela uJehova amacebo abo.+
Izenzo zabo bazenza emnyameni,Besithi: “Kambe ngubani osibonayo?
Ngubani okwaziyo esikwenzayo?”+
16 Litshila izinto sibili!
Umbumbi kungathiwa ufanana lebumba yini?+
Okwenziweyo kungakhuluma yini ngomenzi wakho kuthi,
“Kangenzanga”?+
Lokubunjiweyo kungakhuluma yini ngalowo okubumbileyo kuthi,
“Kazwisisi”?+
17 Ngesikhatshana nje iLebhanoni izatshintshwa ibe yisivande,+Isivande leso sizakuba njengegusu.+
18 Ngalelolanga izacuthe zizawezwa amazwi ebhuku,Amehlo eziphofu abone emnyameni omkhulu.+
19 Abamnene bazathokoza kakhulu ngenxa kaJehova,Labayanga bathokoze ngenxa yoNgcwele ka-Israyeli.+
20 Ngoba olesihluku uzabe engasekho,Lozikhukhumezayo uzatshabalala,Bonke abahlala belindele ukwenza okubi bazabhujiswa,+
21 Bonke abenza abanye babe lecala ngokukhuluma ilizwi elingamanga,Abafaka imijibila yokuthiya lowo owethula udaba lwakhe egedini ledolobho,+Labahlulela kubi olungileyo ngezimpikiswano ezingelancedo bazabhujiswa.+
22 Ngakho uJehova, yena owahlenga u-Abrahama+ uthi kwabendlu kaJakhobe:
“UJakhobe kasoze aphinde ayangeke,Ubuso bakhe abusoze buphinde buhlobe.*+
23 Uzathi ebona abantwabakheAbangumsebenzi wezandla zami bebuthene kuye,+Balingcwelise ibizo lami;Bazamngcwelisa sibili oNgcwele kaJakhobe,Njalo bazamesaba uNkulunkulu ka-Israyeli.+
24 Abaphambukileyo bazazwisisa,Labasolayo bazavuma ukufundiswa.”
Amabala angaphansi
^ Ibizo leli lingabe lisitsho ukuthi, “Iziko le-alithare likaNkulunkulu” njalo kungabe kutshiwo iJerusalema.
^ Buhloba ngenxa yokuyangeka lobuhlungu benhliziyo.
