IVangeli Elabhalwa NguMathewu 4:1-25
4 Ngemva kwalokho umoya wakhokhela uJesu wamusa enkangala lapho afika khona walingwa+ nguDeveli.+
2 Wathi esezile ukudla okwamalanga angu-40 lobusuku obungu-40 wezwa eselambile.
3 UMlingi+ wamlanda wafika wathi kuye: “Nxa uyindodana kaNkulunkulu, tshela amatshe la ukuthi abe yizinkwa.”
4 Kodwa yena waphendula wathi: “Kubhaliwe ukuthi: ‘Umuntu akumelanga aphile ngesinkwa sodwa, kodwa langawo wonke amazwi aphuma emlonyeni kaJehova.’”*+
5 UDeveli wasemthatha wahamba laye edolobheni elingcwele,+ wafika wammisa esiqongweni sethempeli+
6 wasesithi kuye: “Nxa uyindodana kaNkulunkulu ziphosele phansi ngoba kubhaliwe ukuthi: ‘Uzanika izingilosi zakhe umlayo mayelana lawe,’ lokuthi, ‘Zizakuthwala ngezandla zazo ukuze unyawo lwakho lungatshayeki elitsheni.’”+
7 UJesu wathi kuye: “Kubhaliwe futhi ukuthi: ‘Akumelanga umlinge uJehova* uNkulunkulu wakho.’”+
8 UDeveli waphinda wamthatha wamusa entabeni ende okumangalisayo, wasemtshengisa yonke imibuso yomhlaba lenkazimulo yayo.+
9 Wasesithi kuye: “Ngizakupha zonke izinto lezi nxa ungaguqa phansi ungikhonze kanye nje kuphela.”
10 UJesu wathi kuye: “Suka Sathane! Phela kubhaliwe ukuthi: ‘NguJehova* uNkulunkulu wakho okumele umkhonze+ njalo nguye yedwa okumele umenzele inkonzo engcwele.’”+
11 Ngemva kwalokho uDeveli wamtshiya,+ izingilosi zasezifika zamqinisa.*+
12 Uthe esizwa ukuthi uJohane usebotshiwe,+ wasuka waya eGalile.+
13 Wathi esesukile eNazaretha wafika wahlala eKhaphenawume+ duze kolwandle, ezigabeni zakoZebhuloni lezakoNafithali,
14 ukuze kugcwaliseke lokho okwakhulunywa nguNkulunkulu esebenzisa umphrofethi u-Isaya owathi:
15 “O lizwe lakoZebhuloni lelakoNafithali, wena osemgwaqweni oya elwandle ngaphetsheya kukaJodani, Galile yabezizweni!
16 Abantu abahlezi emnyameni sebebone ukukhanya okukhulu njalo abahlezi esabelweni sethunzi lokufa sebethole+ ukukhanya.”+
17 Kusukela ngalesosikhathi kusiya phambili, uJesu waqalisa ukutshumayela esithi: “Phendukani ngoba uMbuso wezulu ususondele.”+
18 Wathi ehamba eceleni koLwandle lweGalile wabona izelamani ezimbili, uSimoni obizwa ngokuthi nguPhetro+ lomfowabo u-Andreya. Babephosela inethi elwandle njengoba babengabagoli benhlanzi.+
19 Wathi kubo: “Ngilandelani ngizalenza libe ngabagoli babantu.”+
20 Bahle batshiya amanethi abo bamlandela.+
21 Esuka lapho wabona ezinye izelamani ezimbili, uJakhobe indodana kaZebhedi elomfowabo uJohane.+ Babesesikepeni loyise uZebhedi belungisa amanethi abo, wasebabiza.+
22 Bahle baphuma esikepeni batshiya uyise, balandela uJesu.
23 UJesu wabhoda kulo lonke elaseGalile+ efundisa emasinagogeni abo+ futhi etshumayela izindaba ezinhle zoMbuso, eselapha yonke imihlobo yemikhuhlane lezifo zonke.+
24 Umbiko omayelana laye wagcwala kulo lonke elaseSiriya, abantu basebeletha kuye bonke ababebulawa yimikhuhlane etshiyeneyo lababelezinhlungu ezehlukeneyo,+ lababelamadimoni,+ lababelezithuthwane*+ kanye lababeyizigoga, wabasilisa bonke.
25 Ngenxa yalokhu abantu abanengi kakhulu bamlandela besuka eGalile, laseDekhapholi,* laseJerusalema, laseJudiya langaphetsheya kukaJodani.
Amabala angaphansi
^ Khangela iSengezo ku-A5.
^ Khangela iSengezo ku-A5.
^ Khangela iSengezo ku-A5.
^ Kumbe, “zamsiza.”
^ Kumbe, “lababelomkhuhlane wokuwa.”
^ Kumbe, “lasesabelweni samadolobho alitshumi.”
