“Kungaba lokuthula emhlabeni nxa sonke singazwisisa ukuthi abantu batshiyene.”—Umbiko owakhitshwa yi-UNESCO Declaration of Principles on Tolerance ngo-1995.

 Kodwa ukungazwisisi ukuthi abantu batshiyene kungenza bangahloniphani futhi bazondane. Kungabangela lokuchothozana, udlakela lokubandlululana.

 Kubathwalisa nzima abanye ukwamukela ukuthi abantu batshiyene. Ikanti abanye bazitshela ukuthi umuntu ozwisisayo ukuthi abantu batshiyene kumele avumelane lakho konke okwenziwa ngabanye. Abanye bona balandela lokho okukhulunywa liBhayibhili endabeni le. Bathi kumele sihloniphe lokho abanye abakukhethayo ngoba wonke umuntu ukhululekile ukuzikhethela afuna ukukukholwa lendlela afuna ukuphila ngayo.

 IBhayibhili lingasinceda yini ukuthi sibe ngabantu abazwisisayo?

Okutshiwo liBhayibhili

 IBhayibhili lisifundisa ukuthi sibe ngabazwisisayo. Lithi: “Kakwaziwe ngabantu bonke ukuthi lina lingabantu abazwisisayo.” (KwabaseFiliphi 4:5) IBhayibhili lisikhuthaza ukuthi siqakathekise okufunwa ngabanye, sibahloniphe futhi sibaphathe kuhle. Lanxa singavumelani lezinye izinto abanye abazenzayo siqhubeka sibahlonipha ngoba bakhululekile ukuzikhethela abakufunayo.

 IBhayibhili likwenza kucace ukuthi kulendlela uNkulunkulu akhangelele ukuthi abantu baphile ngayo. Lithi: “[UNkulunkulu] ukutshelile okuhle, wena muntu.” (UMikha 6:8) Lokho esikutshelwa nguNkulunkulu esebenzisa iBhayibhili kwenza sithokoze empilweni.—U-Isaya 48:17, 18.

 UNkulunkulu kasiphanga imvumo yokwahlulela abanye. IBhayibhili lithi: ‘Munye kuphela otshaya imithetho longuMahluleli. Manje wena ungubani ukuthi wahlulele umakhelwane wakho?’ (UJakhobe 4:12) UNkulunkulu unike ngamunye wethu inkululeko yokuzikhethela futhi sizalandisa ngalokho esikukhethayo.—UDutheronomi 30:19.

Esikutshelwa liBhayibhili ngokuhlonipha abanye

 IBhayibhili lithi kumele ‘sihloniphe bonke abantu.’ (1 UPhetro 2:17, New Jerusalem Bible) Yikho labo abasebenzisa abakubala eBhayibhilini bahlonipha bonke abantu kungelani ukuthi bakholwani kumbe indlela abaphila ngayo. (ULukha 6:31) Lanxa kunjalo, lokho akutsho ukuthi sekumele bavumelane lakho konke abakwenzayo kumbe abakukhethayo. Bona bazama ukulingisela indlela uJesu ayephatha ngayo abanye.

 Ngokwesibonelo, uJesu watshengisa ukuthi uyamhlonipha omunye owesifazana ngokuxoxa laye ngomusa lanxa wayekholwa okutshiyene lokwakhe njalo eziphatha ngendlela ayengavumelani layo.—UJohane 4:9, 17-24.

 AmaKhristu azimisele ukulingisela uJesu ngokuchasisela abanye lokho akukholwayo ‘ngenhlonipho enkulu.’ (1 UPhetro 3:15) IBhayibhili liphinda lixwayise amaKhristu ukuthi angabambi abanye ngenkani ukuthi amukele imibono yawo. Lithi umlandeli kaKhristu ‘akumelanga alwe kodwa kumele abe lesineke kubo bonke,’ okugoqela lalabo abakholwa okungafanani lokwabo.—2 KuThimothi 2:24.

Indlela iBhayibhili elisebenzisa ngayo ibala elithi ukuzonda

 IBhayibhili lithi kumele sizame “ngamandla wonke ukuba lokuthula labantu bonke.” (KumaHebheru 12:14) Umuntu othanda ukuthula uyakubalekela ukuxabana labanye lanxa engasoze atshintshe indlela abona ngayo izinto. (UMathewu 5:9) IBhayibhili liphinda litshele amaKhristu ukuthi aphathe kuhle izitha zawo.—UMathewu 5:44.

 IBhayibhili lithi kulezinto uNkulunkulu “azizondayo” kumbe “azenyanyayo” ezenziwa ngabanye. (IZaga 6:16-19) Kodwa kumele sinanzelele ukuthi uNkulunkulu ‘uzonda’ izinto ezimbi ezenziwa ngabantu hatshi bona ngokwabo. Phela iBhayibhili lifundisa ukuthi uNkulunkulu uzimisele ukuthethelela abantu abenza okubi nxa bephenduka. Uyabancedisa labo abafuna ukutshintsha ukuze baphile ngendlela emthokozisayo.—U-Isaya 55:7.

Amavesi akhuluma ngokuhlonipha abanye lokubazwisisa

 UThithusi 3:2: ‘Libe ngabazwisisayo njalo abamnene kubo bonke abantu.’

 UMathewu 7:12: “Konke elifuna abantu bakwenze kini, lani kumele likwenze kubo.”

 UJoshuwa 24:15: “Khethani lamuhla ukuthi lizakhonza bani.”

 ImiSebenzi 10:34: “UNkulunkulu kakhethi.”

 UHabakhukhi 1:12, 13: ‘UNkulunkulu ngeke abekezelele izinto ezimbi.’

 KwabaseRoma 12:19: “Nikani ulaka lukaNkulunkulu ithuba, ngoba kubhaliwe ukuthi: ‘Ukuphindisela ngokwami, yimi engizabuyisela,’ kutsho uJehova.” a

 UJehova uNkulunkulu nguye kuphela olemvumo yokuphindisela. Uzalungisa konke ukungaphathwa kuhle kwabantu ngesikhathi esifaneleyo. Ukuze uthole okunengi bala isihloko esithi “Abantu Bazake Baphathwe Kuhle Yini?”