Amaphesenti adlula 60 abahumutshi asebenzela emawofisini okuhumutsha (abizwa langokuthi ngamaRTO), ikanti abanye basebenzela emawofisini egatsha. Kunceda ngani ukuba lamawofisi okuhumutsha? Yiwaphi amathuluzi abahumutshi okumele babe lawo ukuze bawenze kuhle umsebenzi wabo? Kunceda ngani ukuthi iwofisi yokuhumutsha ibe sendaweni lapho okukhulunywa khona ulimi okuhunyutshelwa kulo?

 Nxa iwofisi yokuhumutsha ilapho ulimi olukhulunywa khona ngabantu abanengi kuba lula ukuthi abahumutshi bawenze kuhle umsebenzi wabo. UKarin ohumutshela olimini lwesiLow German uthi: “Selokhu sathuthela eRTO leyi eseCuauhtémoc eChihuahua, eMexico, sizixoxela ngesiLow German labanye abahumutshi. Sitshumayela ngaso futhi yiso esisikhulumayo nxa sisiyathenga lasezitolo. Phela sesisendaweni lapho ulimi lwethu olukhulunywa khona ngabantu abanengi. Lokhu kuyasinceda ukuthi sihambisane lendlela abantu abakhuluma ngayo lotshintsho olubakhona olimini lwethu.”

 UJames osebenza ewofisini yokuhumutsha yolimi lwesiFrafra eGhana uyavuma ukuthi wayekukholisa sibili ukusebenzela ewofisini yegatsha, kodwa uthi: “Sengikuthanda kakhulu ukusebenzela eRTO. Ukutshumayela ngolimi lwesiFrafra lokubona indlela abantu abamukela ngayo izindaba ezinhle kuyangithokozisa.”

 Kodwa kuyini okukhangelwayo nxa kudingwa indawo yokwakha iRTO? UJoseph okuHlangothi Lokwakha olusemawofisini ethu amakhulu eWarwick eNew York, e-U.S.A uthi: “Ubunzima obujayele ukubakhona yikuthi kwezinye indawo kulohlupho lwamagetsi lolwamanzi njalo i-inthanethi ayitholakali lula okwenza kube nzima ukuthi abahumutshi bawenze masinyane umsebenzi wabo. Yikho nxa sidinga indawo esizakwakha kuyo iRTO sikhangela ezinengana ukuze sithole leyo ezakwenza umsebenzi wabahumutshi ube lula.”

 Indlela elula futhi engaduliyo yikwakha iRTO lapho okuleWolu Yemihlangano, iWolu yoMbuso kumbe indlu yabanali, besekusithi abahumutshi badingelwe indawo yokuhlala. Nxa kungaswelakala indawo enjalo kuyathengwa isakhiwo lapho abahumutshi abazasebenzela khona futhi bahlale khona. Kodwa nxa izimo zingatshintsha isakhiwo leso siyathengiswa imali yakhona ibisisetshenziswa kwezinye indawo.

 Ngomnyaka wenkonzo ka-2020 sisebenzise imali engaba ngamadola angu-13 miliyoni (U.S.) ukuze umsebenzi owenziwa emawofisini okuhumutsha uqhubekele phambili. Abahumutshi abasemaRTO kumele babe lamakhompiyutha, ama-software asebenza kulawo makhompiyutha, imitshina yokurekhoda, i-inthanethi lezinye izinto ezigoqela amanzi lamagetsi. Ikhompiyutha yomhumutshi ngamunye ingaba ngamadola angu-750 (U.S.). Amakhompiyutha la ayafakwa inhlelo ezitshiyeneyo okugoqela le-Watchtower Translation System. Uhlelo lolu lunceda abahumutshi ukuthi bahlele kuhle umsebenzi wabo futhi lulamathuluzi abawadingayo ukuze bawenze kuhle.

 Abahumutshi baphinda baphiwe lemitshina abangayisebenzisa ukurekhoda besemawofisini abo. Imitshina le yaba luncedo kakhulu ngesikhathi kuqalisa iCOVID-19 ngoba abahumutshi babesenelisa ukuhamba layo lapho abahlala khona ukuze baqhubeke ngomsebenzi wabo wokurekhoda amavidiyo kumbe okunye nje okumele kurekhodwe.

 Kulabanye abafowethu labodadewethu abancedisayo ekuhloleni umsebenzi owenziwe ngabahumutshi ikanti abanye bancedisa ukugcina amaRTO esesimeni esihle. UCirstin osebenza eRTO yesi-Afrikaans eCape Town, eSouth Africa uthi: “Abamemezeli abanengi lamaphayona esikhathi sonke balethuba lokuncedisa lapha eRTO futhi bayakukholisa.”

 Abafowethu labodadewethu abancedisa emaRTO bayasiqakathekisa kakhulu isibusiso lesi. Omunye udadewethu oncedisa eRTO uthi ukusebenza lapho kumenza athokoze futhi kuyamkhuthaza. Abanye abafowethu labodadewethu bayancedisa ngokuvuma ukuzorekhodwa. UJuana osebenza ewofisini yokuhumutsha yesiTotonac eVeracruz, eMexico uthi: “Njengoba sesisebenzela lapho okukhulunywa khona ulimi lwethu, sokulula ukuthi abafowethu labodadewethu abanengi babuye bazorekhodwa.”

 Ukuba lamawofisi okuhumutsha kuncedile yini ukuthi umsebenzi wabahumutshi uthuthuke? Amamiliyoni abantu ababala izingwalo zethu bayavuma ukuthi umsebenzi wethu uthuthukile sibili. UCédric osewofisini yokuhumutsha yolimi lwesiKongo eDemocratic Republic of Congo uthi: “Abanye abafowethu labodadewethu babesithi isiKongo esisemabhukwini ethu yisiKongo sama-Watch Tower ngoba sasingahumutshi ngendlela abantu abakhuluma ngayo. Kodwa bathi khathesi sesihumutsha ngesiKongo esikhulunywa nsuku zonke.”

 U-Andile osebenza ewofisini yokuhumutsha yolimi lwesiXhosa eSouth Africa uthi: “Abantu abanengi basitshela ukuthi indlela esesihumutsha ngayo isitshintshile kakhulu. Ngitsho labantwana ababebala iNqabayokulinda ngolimi lwesikhiwa khathesi sebeyibala ngesiXhosa. Bayakukholisa lokubala i-New World Translation esanda kulungisiswa ngoba ibhalwe ngolimi olulula.”

 Imali esetshenziswa ukwakha amaRTO, ukuwagcina esesimeni esihle lokunakekela labo abasebenza khona ivela eminikelweni esekela umsebenzi owenziwa emhlabeni wonke. Iminikelo le ihlanganisa laleyo eyenziwa ku-donate.mt1130.com.