Nxa Umkakho Efebile
UBUHLUNGU obuzwayo nxa umkakho angafeba bephula inhliziyo. Lanxa kunjalo abanye bayenelisa ukuxolela omkabo abafebileyo njalo bazame ukulungisisa umtshado wabo. * Kodwa kungelani lokuthi bayabaxolela kumbe hatshi, labo abonelweyo bazwa ubuhlungu obukhulu. Kuyini okungabanceda ukuthi benelise ukulwisana lobuhlungu?
AMAVESI ANGAKUNCEDA
IMibhalo ibancede kakhulu labo abalabomkabo abafebileyo. Sebefundile ukuthi uNkulunkulu uyazibona izinyembezi zabo futhi uyabuzwisisa ubuhlungu abaphakathi kwabo.—UMalaki 2:13-16.
“Nxa ukunqineka kwase kungikhulela, induduzo yakho yaletha intokozo emphefumulweni wami.”—IHubo 94:19.
UBill uthi: “Ngesikhathi ngibala ivesi le ngangibona uJehova ngelihlo lengqondo engiduduza ngendlela elomusa njengoba nje ubaba olothando engaduduza indodana yakhe.”
“Kwabathembekileyo lawe uthembekile.”—IHubo 18:25.
Owesifazane okuthiwa nguCarmen olomkakhe owafebayo uthi: “Umkami wehluleka ukuthembeka kimi kodwa uJehova ngangimthemba ukuthi kasoze angilahle.”
“Lingakhathazeki ngaloba yini, kodwa kukho konke bekani izicelo zenu kuNkulunkulu ngomthandazo langokumncenga . . . Nxa lingenza njalo, ukuthula kukaNkulunkulu okwedlula konke ukuzwisisa kuzalinda izinhliziyo zenu.”—KwabaseFiliphi 4:6, 7.
Owesifazane okuthiwa nguSasha uthi: “Ngayibala kanengi ivesi le. Ngangihlala ngithandaza sikhathi sonke, futhi uNkulunkulu wanginika ukuthula.”
Bonke esikhulume ngabo phezulu baphelelwa lithemba baze bafisa lokufa. Kodwa ukuthembela kuJehova uNkulunkulu lokubala iBhayibhili yikho okwabaqinisayo. UBill uthi: “Ukholo lwami lwenza impilo yami yaba lenjongo lanxa kwasokukhanya angathi konke okunye kwasokubhidlikile. Lanxa ngahamba ‘esigodini sethunzi lokufa’ okwesikhatshana, uNkulunkulu wayelami.”—IHubo 23:4.
^ indima 4 Ukuze ufunde okunengi mayelana lokuthi umkakho kumele umxolele yini loba hatshi bala izihlokwana 1, 2 lo-3 eziku-Phaphama! ka-April 22 1999, ezingaphansi kwesihloko esithi “Lapho Umngane Womshado Engathembekile.”
Nanku Okunye
INQABAYOKULINDA
UNkulunkulu Ulesihawu Yini?
IBhayibhili lisitshela ukuthi uNkulunkulu uyazazi izimo esikuzo, imicabango yethu kanye lendlela esizizwa ngayo futhi uyasizwela.
INQABAYOKULINDA
Ukuqhubekela Phambili Ngempilo Ngemva Kokuchitha Umtshado
Phose bonke abachitha umtshado bathola ukuthi impilo isuka ibenzima kulalokho akade bekukhangelele. Iseluleko seBhayibhili esilusizo singakunceda ukuthi uphumelele ukulwisana lempumela yakhona.
