Kusukela ekudalweni kwabantu, uMdali wayekhuluma labo esebenzisa izingilosi labaphrofethi. Kanti njalo wenza ukuthi amazwi lezithembiso zakhe kubhalwe phansi. Izithembiso lezo zitshengisa ukuthi uNkulunkulu ufuna sithokoze. Zitholakala ngaphi?

Okwakhulunywa nguNkulunkulu kutholakala eMibhalweni Engcwele. (2 KuThimothi 3:16) Abaphrofethi babekuthatha ngaphi ababekubhala? (2 UPhetro 1:21) UNkulunkulu nguye owayebatshela ukuthi babhaleni. Okwenziwa nguNkulunkulu kufanana lalokho okungenziwa ngusomabhizimusi. Ngokwesibonelo, nxa efuna ukubhala incwadi, uyatshela umabhalani ukuthi abhaleni. Lanxa incwadi iyabe ingabhalwanga ngusomabhizimusi, konke okusencwadini kuyabe kuvela kuye. UNkulunkulu laye wasebenzisa amadoda atshiyeneyo ukuthi abhale phansi konke ayefuna sibekwazi, lanxa kunjalo nguye uMlobi weMibhalo Engcwele.

OkuseLizwini likaNkulunkulu kuqakatheke kakhulu yikho efuna sikubale futhi sikuzwisise. Lamuhla ‘izindaba ezinhle zaphakade’ zimenyezelwa “kuzo zonke izizwe, lezizwana, lezindimi.” (ISambulo 14:6) IMibhalo Engcwele iyonke kumbe iyingxenye isitholakala ngezindimi ezedlula 3 000 futhi lokhu kwenzakala ngamandla kaNkulunkulu. Akula elinye ibhuku elitholakala ngezindimi ezinengi kangaka.