1, 2. Kuyini okwanceda oFakazi bakaJehova abangu-230 ukuthi baphephe kuloluhambo lokufa ekupheleni kweMpi Yomhlaba Yesibili?

 EKUPHELENI kweMpi Yomhlaba Yesibili, uhulumende wamaNazi usubhidlika, kwakhitshwa umlayo wokuthi kutshabalaliswe izibotshwa eziyizinkulungwane ezazisele emajele okuhlukuluzwa. Izibotshwa ezazisejele yeSachsenhausen kwakumele zihanjiswe lapho okugadelwa khona izikepe zifike zigqitshwe emikhunjini ziyegaluliswa elwandle.

² Izibotshwa ezingu-33 000 ezazivela ejele yeSachsenhausen kwakumele zikhasabule umango ongamakhilomitha angu-250 zisiya eLübeck edolobheni eliseduzane lolwandle eGermany. Phakathi kwabo kwakulaboFakazi bakaJehova abangu-230 ababevela emazweni ayisithupha okwathiwa bahambe ndawonye. Bonke babengaselamandla ngenxa yendlala lokugula. Baphepha njani abazalwane bethu kuloluhambo? Omunye wabo wathi: “Saqhubeka sikhuthazana ukuze singadinwa.” ‘Amandla amakhulukazi’ avela kuNkulunkulu kanye lokuthandana kwabo kwabanceda ukuthi baphephe ebunzimeni lobu.​—2 Kor. 4:7.

3. Kungani kumele sikhuthazane?

³ Namuhla asikho kuloluhambo lokufa kodwa sehlelwa zinhlupho ezinengi. UMbuso kaNkulunkulu usubekiwe ngo-1914, uSathane waxotshwa ezulwini waphoselwa emhlabeni ‘egcwele intukuthelo, ngoba ekwazi ukuthi isikhathi sakhe sifitshane.’ (Isam. 12:7-9, 12) Njengoba i-Amagedoni isiseduze kangaka, uSathane usebenzisa izilingo kanye lobunzima ukwenzela ukuthi sibe buthakathaka ekukhonzeni kwethu. Ukwengezelela kulokhu, silezindubo ezisehlelayo ekuphileni nsukuzonke. (Jobe 14:1; UmTshu. 2:23) Kwesinye isikhathi ukunqwabelana kobunzima esilabo kungasenza sidinwe kakhulu, okokuthi amandla esilawo okuqhubeka sikhonza ayabe semalutshwana ukuthi silwisane lokudana. Cabanga ngomfowethu oseleminyaka eminengi enceda abantu abanengi ekukhonzeni kwabo. Ngesikhathi esegugile yena lomkakhe bagula futhi waqalisa ukuzizwa edane  kakhulu. Njengalowo mfowethu sonke siyawadinga ‘amandla amakhulukazi’ avela kuJehova kanye lokukhuthazana.

4. Ukuze sikhuthaze abanye, yisiphi isixwayiso somphostoli uPhawuli okumele sisigxilise ezinhliziyweni zethu?

⁴ Uma sifuna ukuba yisikhuthazo kwabanye, kumele sigxilise ezinhliziyweni zethu isixwayiso umphostoli uPhawuli asinika amaKhristu angamaHebheru. Wathi yena: “Kasicabangeni ukuba singakhuthazana kanjani ethandweni lasezenzweni ezinhle. Kasingakudeli ukuhlangana, njengalokhu abanye abajayele ukukwenza, kodwa kasikhuthazane, ikakhulu njengoba libona uSuku lusondela.” (Heb. 10:24, 25) Singasisebenzisa njani isixwayiso esimunyethwe ngamazwi la alengqondo?

5. Kutshoni ‘ukucabanga’ abanye njalo kuyini okumele sikwenze ukuze senelise ukwenza lokhu?

⁵ ‘Ukucabanga’ abanye kutsho “ukunakekela izinswelo zabo njalo lokuhlala sibakhumbula.” Kungenzakala yini ukuthi sinakekele izinswelo zabanye nxa kuyikuthi sikhuluma labo ngesikhathi sibabingelela eWolu loMbuso kuphela, kumbe sixoxa labo ngezinto ezingatsho lutho nje? Akungeke kwenzakale. Lanxa kunjalo, kumele sinanzelele ‘ukukhathalela umsebenzi wethu’ singabi ‘ngabathandi bezindaba zabanye.’ (1 Tes. 4:11; 1 Tim. 5:13) Kodwa-ke nxa sifuna ukukhuthaza abafowethu, kumele sibazi ngcono, okutsho ukuthi kumele sazi izimo abakuzo, izimpawu zobuntu abalazo, indlela abakhonza ngayo, abenelisa ukukwenza kanye lokusilela kwabo. Kumele basibone njengabangane babo futhi babeleqiniso lokuthi siyabathanda. Lokhu kutsho ukuthi siyazinika isikhathi sokuba labo, hatshi nxa besebunzimeni loba bedanile kuphela kodwa langezinye izikhathi nje.​—Roma. 12:13.

6. Kuyini okunganceda umdala ukuthi ‘acabange’ ngalabo abagcinayo?

⁶ Amadoda amadala ebandleni akhuthazwa ukuthi ‘abe ngabelusi bomhlambi kaNkulunkulu abawugcinayo’ esenza lokhu ngokuthanda kwawo langokuzimisela. (1 Pet. 5:1-3) Abadala bangawenza njani ngokuphumelelayo umsebenzi wabo wokwelusa nxa bengazazi kuhle izimvu abazigcinayo? (Bala iZaga 27:23.) Nxa bezinika isikhathi sokuba labakhonza labo njalo bethokoza uma belabo, kuzaba lula ngezimvu ukuthi zicele uncedo eziludingayo kubo. Kanti njalo kuzaba lula ukuthi abafowethu labodadewethu baveze imizwa yabo lezikhalazo zabo, okuzakwenza kube lula ngabadala ukuthi ‘bacabange’ ngalabo ababagcinayo futhi babanike uncedo abaludingayo.

7. Kumele siwabone njani ‘amazwi abhedayo’ alabo abadanileyo?

⁷ Ngesikhathi ebhalela ibandla laseThesalonika, uPhawuli wathi: “Lisize ababuthakathaka.” (Bala u-1 Thesalonika 5:14.) Ngamanye amazwi, singathi ‘abalovalo kumbe abahlulukelweyo’ kanye labadanileyo babuthakathaka. IZaga 24:10 zithi: “Uma uthikaza ngezikhathi zenhlupheko, mancinyane kanganani amandla akho!” Amazwi omuntu odane kakhulu angaba ‘ngamazwi abhedayo.’ (Jobe 6:2, 3) Nxa ‘sicabanga’ ngabantu laba kumele singakhohlwa ukuthi lokho abakutshoyo kungabe kungayisikho okusezinhliziyweni zabo. URachelle wazibonela lokhu kunina owayesehlala engumuntu odanileyo. Wathi: “Izikhathi ezinengi umama wayekhuluma izinto ezibuhlungu kakhulu. Ngesikhathi kusenzakala lokhu, ngangizama ukukhumbula ukuthi umama wayengumuntu onjani sibili. Wayelothando, elomusa njalo engumuntu ophanayo. Ngakufunda ukuthi abantu abadanileyo bakhuluma izinto abangahlosanga ukuzitsho. Sokumele sinanzelele ukuthi asiphindiseli ngamazwi loba ngezenzo ezibuhlungu ngoba kungaba kubi kakhulu.” IZaga 19:11 zithi: “Ukuhlakanipha komuntu kumupha isineke; kumupha udumo ukunganaki ukuqalwa.”

8. Kumele ‘siqinise’ uthando lwethu ikakhulu kubobani, njalo ngani?

8 Singatshengisa njani ukuthi ‘siyamcabanga’ umuntu odabuke kakhulu enhliziyweni  ngenxa yokuyangeka kanye lokuhlulukelwa alokhu ekuzwa okubangelwa yizinto aziphambanisayo kudala lanxa esethethe amanyathelo okulungisisa izinto? UPhawuli wabhala ngesoni esaphendukayo eKhorinte esithi: “Kumele limthethelele njalo limduduze, ukuze angagajelwa lusizi olukhulu. Ngakho ngiyalincenga ukuba liluqinise futhi uthando lwenu kuye.” (2 Kor. 2:7, 8) Esinye isichazamazwi sithi ibala elihunyutshwe ngokuthi “liluqinise” litsho “ukwenza into ethile ibe semthethweni, ukutshengisa ukuthi ikhona futhi ngeyeqiniso.” Yikho-ke asingeke siphongucabanga ukuthi umuntu uyakubona ukuthi siyamthanda njalo siyamkhathalela. Kumele akubone sikutshengisa ngezenzo langendlela esimkhangela ngayo.

9. Kutshoni ‘ukukhuthazana ethandweni lasezenzweni ezinhle’?

⁹ UPhawuli wabhala wathi: “Kasicabangeni ukuba singakhuthazana kanjani ethandweni lasezenzweni ezinhle.” Kumele sikhuthaze esikhonza labo ukuthi batshengise uthando lezenzo ezinhle. Nxa umlilo usuzacitsha, kungadingeka ukuthi uwukhwezele futhi uwuvuthele. (2 Tim. 1:6) Lathi singakhuthaza abazalwane bethu ukuthi batshengise ukuthi bayamthanda uNkulunkulu kanye labomakhelwane babo, sikwenza lokhu ngothando. Ukuncoma abanye okuqotho kuqakathekile ukuze sibakhuthaze ukwenza imisebenzi emihle.

10, 11. (a) Ngobani phakathi kwethu abadinga ukunconywa? (b) Nika isibonelo sokuthi ukunconywa kungamnceda njani umuntu ‘osethethe inyathelo elingayisilo.’

¹⁰ Sonke siyakufuna ukunconywa kungelani lokuthi sizizwa sidanile noma hatshi. Omunye umdala wabhala ukuthi: “Angikhumbuli ubaba wami engitshela ukuthi ngenze kuhle. Yikho ngakhula ngizeyisa. . .. Lanxa sengileminyaka engu-50, ngilokhu ngikuthanda ukuqinisekiswa ngabangane bami ukuthi ngiwenza kuhle umsebenzi wami wokuba ngumdala. . .. Okwenzakalayo empilweni yami kwangifundisa ukuthi kuqakatheke kakhulu ukukhuthaza abanye njalo ngenza konke  okusemandleni ami ukuze ngikwenze.” Ukunconywa kunganika idlabuzane kubo bonke, kungaba ngamaphayona, abagugileyo, lalabo abadanileyo.​—Roma. 12:10.

¹¹ Nxa ‘labo abalezimpawu ezingokomoya bezama ukulungisisa umuntu osethethe inyathelo elingayisilo,’ ukwelulekwa ngothando kanye lokunconywa okufaneleyo kungamkhuthaza ukuthi aphenduke ezenzweni ezinhle. (Gal. 6:1, NW) UMiriam wakubona ukuba liqiniso kwalokhu. Wabhala ukuthi: “Ngezwa ubuhlungu obukhulu lapho abangane bami engangibathanda betshiya ibandla, ngilokhu ngisebuhlungwini, ubaba laye wahlaselwa ngumkhuhlane wokopha igazi ebuchotsheni. Ngadana kakhulu. Ukuze ngizame ukulwisana lokudana lokhu, ngaqalisa ukuthandana lejaha elingakhonziyo.” Lokhu kwenza waba lomuzwa wokuthi kafanelwanga yikuthandwa nguJehova waze wacabanga ukutshiya iqiniso. Lapho omunye umdala emkhumbuza ngokuthembeka ayelakho kuNkulunkulu kuqala, wathinteka. Wavumela abadala ukuthi bamqinisekise ngothando lukaJehova. Ekucineni uthando lwakhe lwavuselelwa. Walitshiya ijaha elingakhonziyo ayethandana lalo futhi waqhubeka ekhonza uJehova.

12. Kuyini esingakutsho ngokuyangisa, ukuchothoza kumbe ukwenza umuntu azizwe elecala nxa sikhuthaza?

¹² Ukuyangisa umuntu umqathanisa labanye, ukumchothoza ngokumbekela imithetho enzima, kumbe ukumenza azizwe elecala lokungafezi okunengi kungamnika idlabuzane lokuthi asebenze ngamandla, kodwa lokho akuyindawo, kuphelela emoyeni. Kodwa-ke ukuncoma esikhonza laye kanye lokumnceda ukuthi ananzelele ukuthi ukuthanda uJehova yikho okwenza simkhonze, kungaba lempumela emihle njalo ezahlala isikhathi eside.​—Bala uFiliphi 2:1-4.

13. Kugoqelani ukukhuthaza abanye? (Khangela umfanekiso osekuqaliseni.)

¹³ Kumele ‘sikhuthazane, ikakhulu njengoba sibona usuku lusondela.’ Ukukhuthaza abanye kugoqela ukubanika idlabuzane lokuqhubekela phambili bekhonza uNkulunkulu. Njengoba ukukhuthazana ethandweni lasezenzweni ezinhle kungafaniswa lokukhwezela umlilo obusucitsha, ukukhuthaza abanye kungafaniswa lokuthela ipharafini kulowomlilo ukuze ubhebhe kakhulu. Ukukhuthaza abanye kutsho ukuthi siqinise abadanileyo njalo sibaduduze. Nxa sinikwe ithuba lokukhuthaza umuntu onjalo kumele sikhulume ngomusa langobumnene. (Zaga. 12:18) Kanti njalo kumele ‘siphange silalele’ njalo ‘siphuze ukukhuluma.’ (Jak. 1:19) Uma silalela ngesihawu, singenelisa ukubona izimo ezibangela ukudana komKhristu esikhonza laye njalo sitsho okuthile okungamnceda ukuthi alwisane lalesosimo.

14. Umfowethu owayesephele amandla wancedwa njani?

¹⁴ Cabanga ngomunye umdala owayelozwela owenelisa ukunceda umfowethu owayengasafezi inkonzo okweminyaka  eminengi. Njengoba umdala lo wayemlalele ekhuluma, kwacaca ukuthi umfowethu lo wayelokhu emthanda kakhulu uJehova. Wayefunda iNqabayokulinda yinye ngayinye ngokuzimisela njalo esenza imizamo yokuba khona emihlanganweni sikhathi sonke. Kodwa-ke izenzo zabanye abandleni zazimzwise ubuhlungu njalo zamdanisa. Umdala wamlalela ngesihawu engamahluleli njalo watshengisa ukuthi uyamthanda umfowethu lo kanye lemuli yakhe. Ekucineni umfowethu lo wakunanzelela ukuthi wayevumela izinto ezimbi ezenzakala kudala ukuthi zimvimbele ukukhonza uNkulunkulu wakhe amthandayo. Umdala wamcela ukuthi bahambe bonke ekutshumayeleni. Ukusizwa ngumdala kwamnceda ukuthi avuselele inkonzo yakhe njalo ngokuhamba kwesikhathi wacina esengumdala.

15. Sifundani kuJehova ngokukhuthaza abadanileyo labaphele amandla?

¹⁵ Kungenzeka ukuthi kuthathe isikhathi ukuthi umuntu odanileyo azizwe ngcono kumbe angalwamukeli masinya uncedo esimnika lona. Kungadingakala ukuthi siqhubeke simncedisa. UPhawuli wathi: “Lisize ababuthakathaka, libekezelele umuntu wonke.” (1 Tes. 5:14) Kulokuthi simtshiye masinya umuntu ophele amandla, kumele ‘simsize’ njalo siqhubeke simncedisa. Endulo uJehova wazibekezelela ezinye izinceku zakhe ezaziphela amandla kwesinye isikhathi. Ngokwesibonelo, uNkulunkulu waba lomusa ku-Elija njalo wabalendaba lemizwa yakhe. UJehova wanika umphrofethi lo usizo ayeludinga ukuze aqhubekele phambili lenkonzo yakhe. (1 AmaKho. 19:1-18) Ngenxa yokuthi uDavida waphenduka ngobuqotho, uJehova wamthethelela ngomusa. (Hubo. 51:7, 17) UNkulunkulu wanceda lomlobi weHubo 73, owaphosa wekela ukumkhonza. (Hubo. 73:13, 16, 17) UJehova ulobubele lomusa kithi, ikakhulu nxa sidanile njalo siphele amandla. (Eks. 34:6) Isihawu sakhe “sitsha ukusa kwamalanga,” njalo “isihawu sakhe kasipheli.” (Lilo. 3:22, 23) UJehova ufuna lathi silandele isibonelo sakhe njalo siphathe abadanileyo ngothando.

16, 17. Njengoba ukuphela komumo wezinto sekuseduze, kuyini okumele sizimisele ukukwenza, futhi ngani?

¹⁶ Kuzozonke izibotshwa ezingu-33 000 ezasuka ejele yokuhlukuluzwa eSachsenhausen, kwafa izinkulungwane. Kodwa-ke bonke oFakazi bakaJehova abangu-230 abathatha lolu hambo besuka ejele basinda. Ukukhuthazana lokusekelana kwabanceda kakhulu ekuntshintsheni lolo hambo lokufa lusiba luhambo lokusinda.

¹⁷ Lamuhla ‘sisendleleni elukhonjwana eya ekuphileni.’ (Mat. 7:14) Sekuseduze ukuthi zonke izikhonzi zikaJehova zihambe ndawonye zingena emhlabeni omutsha olokulunga. (2 Pet. 3:13) Asizimiseleni ukuncedana njengoba sihamba endleleni eya ekuphileni okungapheliyo.