Kulula ukuthi sithi nxa iBhayibhili likhuluma ngoSathane liyabe lisitsho bonke nje ububi obukhona. Kodwa yikho yini okufundiswa liBhayibhili? Nxa kuyikuthi yikho, kungani iBhayibhili lisithi uSathane wakhuluma loJesu Khristu waphinda wakhuluma loNkulunkulu uSomandla? Ake sikhangele izingxoxo lezi ezimbili.

UJesu eqalisa inkonzo yakhe, uDeveli wazama ukumphambukisa ngokumlinga kathathu. Wazama ukulinga uJesu ukuthi asebenzise kubi amandla ayewaphiwe nguNkulunkulu ukuze athole okokudla njengoba wayeselambile. Kanti njalo uDeveli wayenga uJesu ngokumtshela ukuthi aziphosele phansi esuka phezulu ukuze nje azibonakalise ebantwini lanxa wayeyabe efaka ukuphila kwakhe engozini. Wamtshela lokuthi nxa angaze amkhonze wayezamnika yonke imibuso yomhlaba. UJesu kazange avume ukuqilwa nguSathane njalo wayesebenzisa iMibhalo sonke isikhathi lapho emphendula.​—ULukha 4:1-13.

UJesu wayekhuluma lobani? Kambe wayekhuluma lomoya omubi owawuphakathi kwakhe? IMibhalo ithi uJesu ‘useke walingwa ngezindlela zonke njengathi kodwa akaze aba lesono.’ (KumaHebheru 4:​15) Kanti njalo iBhayibhili liphinda lithi: “Yena  kenzanga sono, njalo akukho nkohliso eyatholakala emlonyeni wakhe.” (1 UPhetro 2:​22) UJesu wayezelwe engelasono njalo kazange abe laso, waqhubeka ethembekile. Kakuzange kube lomoya omubi phakathi kukaJesu. Kuyacaca-ke ukuthi kwakungelamoya omubi othile phakathi kwakhe ayekhuluma lawo, kodwa wayekhuluma lomuntu okhona sibili.

Ingxoxo le isinika obunye ubufakazi bokuthi uSathane ukhona sibili.

• Khumbula ukuthi uDeveli wayethe uzanika uJesu amandla okubusa umhlaba wonke nxa angaze amkhonze. (ULukha 4:5-7) Siyabona-ke ukuthi uSathane ukhona ngoba nxa kuyikuthi kakho, lokhu kwakuzabe kuyinto engatsho lutho. Kanti njalo uJesu kazange aphikise ukuthi yonke imibuso esemhlabeni ngekaSathane.

• UDeveli wathi esebone ukuthi uJesu kazange awele ezilingweni zakhe “wamtshiya, kuze kuzuzakale isikhathi esingcono.” (ULukha 4:13) Yikho-ke kusegcekeni ukuthi uSathane kayisibo bubi esibubonayo nje, kodwa uyisitha esiyingozi esingavumiyo ukwehlulwa.

• Nanzelela ukuthi “izingilosi zeza zamnakekela” uJesu. (UMathewu 4:11) Izingilosi lezi ezazilande ukuzonceda uJesu kanye lokumkhuthaza kwakuyizidalwa zomoya yini? Akuthandabuzwa ukuthi kwakuyizo. Lokhu kutsho ukuthi uSathane laye uyisidalwa somoya esikhona sibili.

Enye indaba ngeyayiphathelane loJobe, indoda eyayisesaba uNkulunkulu. Indaba le ilezingxoxo ezimbili eziphakathi kukaDeveli loNkulunkulu. Ekuxoxeni kwabo, uNkulunkulu wayencoma uJobe ngenxa yokuthi wayethembekile. Kodwa uSathane wathi uJobe ukhonza uNkulunkulu ngenxa yokuthi kulezinto azitholayo. Ngamanye amazwi uDeveli wayesithi uNkulunkulu uthenga uJobe ukwenzela ukuthi ahlale ethembekile kuye. Kufanana lokuthi wayesithi yena umazi ngcono uJobe ukwedlula uNkulunkulu. UJehova wavumela ukuthi uSathane athathele uJobe impahla yakhe, abulale abantwabakhe lokuthi amgulise. * Ngokuhamba kwesikhathi kwazicacela ukuthi uJehova wayeqinisile lokuthi uSathane wayeqamba amanga. UNkulunkulu wambusisa uJobe ngenxa yokuthi wahlala ethembekile.​—UJobe 1:6-12; 2:1-7.

Yikho-ke uNkulunkulu wayengakhulumi lomoya omubi othile owawuphakathi kwakhe ngesikhathi ekhuluma loSathane. IBhayibhili lithi ngoNkulunkulu: “Indlela yakhe iphelele.” (2 Samuyeli 22:31) ILizwi likaNkulunkulu liphinda lithi: “Ingcwele, ingcwele, ingcwele iNkosi uNkulunkulu uSomandla.” (ISambulo 4:8) Ukuba ngcwele kutsho ukuba msulwa, ukungabi lesici kanye lesono. UJehova uphelele njalo akulalutho olusolekayo kuye. Ngakho-ke akwenzakali ukuthi atholakale elobubi.

Lanxa kunjalo, abanye bangaphikisa bathi ingxoxo eyayiphakathi kukaNkulunkulu loSathane kwakuyinganekwane nje ngenxa yokuthi bathi akulamuntu okuthiwa nguJobe owake wabakhona. Kodwa kulengqondo yini lokho? Amanye amavesi aseBhayibhilini atshengisa ukuthi uJobe wayengumuntu okhona sibili. Ngokwesibonelo, kuJakhobe 5:​7-11 kwakhulunywa ngoJobe lapho kukhuthazwa amaKhristu ukuthi aqinisele nxa esebunzimeni, njalo aphinda aduduzwa ngokutshelwa ukuthi okwenzakala kuJobe kwakutshengisa ukuthi uJehova uyababusisa ababekezelayo. Nxa kuyikuthi uJobe wayengasimuntu okhona sibili, njalo kuyikuthi ukuhlasela kukaSathane kwakuyinganekwane nje, amazwi la ayengasoze awakhuthaze ngitsho amaKhristu. Kanti njalo kuHezekheli 14:​14, 20 lapho okuqanjwa khona amadoda amathathu ayelungile kuqanjwa uNowa, uDanyeli kanye loJobe. UJobe ngumuntu owake waba khona sibili njengoNowa loDanyeli njalo wayeyindoda elokholo oluqine kakhulu. Nxa kuyikuthi wayengumuntu okhona, kutsho ukuthi lowamhlaselayo, lowo owabangela ukuthi ahlupheke, laye wayeyisidalwa esikhona sibili.

Kusegcekeni ukuthi iBhayibhili lithi uSathane yisidalwa somoya esikhona sibili. Kodwa mhlawumbe usuzibuza ukuthi, ‘Uyingozi yini kimi lasemulini yami?’

Akuzibone ngelihlo lengqondo izigebenga zitheleka esigabeni sakini zizohlala khona. Akuthandabuzwa ukuthi bekungaba lokuganga okunengi njalo abantu abanengi bebezahlalela ovalweni. Lokhu kufanana lokwenzakala kuSathane lamadimoni akhe, lawo ayizidalwa zomoya njengaye. Bathi sebehlamukele uNkulunkulu bajikelwa phansi emhlabeni. Ubona angani kwenzakalani ngemva kokujikelwa kwabo? Cabanga ngalokho oyake ukubone kusenzakala kwelakini kumbe kwamanye amazwe.

•   Ubona kulokhu kusiba lodlakela yini njalo kusenzakala izinto ezethusayo, lanxa emhlabeni wonke kuzanywa ukuthi izinto lezi ziqedwe?

• Ubona kulokhu kugcwala amafilimu alobudimoni yini kungelani lokuthi abazali abanengi kabafuni ukuthi abantwababo babukele amafilimu la?

• Izinto zemvelo ezisendaweni ohlala kuyo uzibona ziqhubeka zitshabalaliswa yini lanxa kusenziwa imizamo eminengi yokuthi zilondolozwe?

• Lokho okwenziwa ngabantu lezinsuku akukutshiyi utshe amathe yini? Akukhanyi kulokuthile yini okubafuqela egodini eliyingozi?

Khangela ukuthi iBhayibhili lithi ngubani obangela ukuhlupheka okusemhlabeni lamuhla. Lithi: “Umgobho omkhulu waphoselwa phansi​—⁠inyoka leyana endala ethiwa ngoMubi loba uSathane, odukisa umhlaba wonke. Waphoselwa emhlabeni, ekanye lezingilosi zakhe. . .. Maye kuwo umhlaba lolwandle ngoba omubi useze phansi kini! Ugcwele intukuthelo, ngoba uyakwazi ukuthi isikhathi sakhe sifitshane.” (ISambulo 12:9, 12) Abantu abanengi sebekubona ukuthi uSathane yisidalwa somoya esiyingozi lokuthi nguye obangela umonakalo omkhulu emhlabeni wonke.

Mhlawumbe usuzibuza ukuthi ungazivikela njani. Ngumbuzo omuhle kakhulu lowo. Impendulo sizayithola esihlokweni esilandelayo.