OFakazi bakaJehova bayamthanda uNkulunkulu kanye labomakhelwane, yikho bekuthanda ukuxoxa labantu ngezindaba ezinhle eziseBhayibhilini okugoqela lalabo ababengafuni ukuzwa izindaba ezinhle. (UMathewu 22:37-​39) Ukuthanda uNkulunkulu kwenza silalele umlayo kaJesu wokuthi “sifakaze.” (ImiSebenzi 10:42; 1 UJohane 5:3) Lokhu kutsho ukuthi kumele sibuyele kanengi ebantwini ukuze sibatshele umlayezo ovela kuNkulunkulu. Yikho okwakusenziwa ngabaphrofethi bakaNkulunkulu bakudala. (UJeremiya 25:4) Ukuthanda omakhelwane kwenza sizame ukutshela bonke abantu ‘ivangeli loMbuso’ okugoqela lalabo ababengafuni ukulalela.​—UMathewu 24:14.

 Nxa sibuyela ezindlini esake sathola umuntu owayengafuni ukuxoxa lathi, sijayele ukuthola umuntu ofuna ukusilalela. Nanzi ezinye izizatho ezenza sibuyele ezindlini zabantu ababengafuni ukuxoxa lathi:

•   Abantu bayathutha.

•   Abanye abahlala kuleyondlu bangabe befuna ukuzwa izindaba ezinhle.

•   Abantu bayantshintsha. Izinto ezenzakala emhlabeni kumbe izimo ezintshintshayo zenza abanye bafune ukuzwa okufundiswa liBhayibhili. (UMathewu 5:3) Lalabo abasiphikisayo bangavuka bentshintshile njengomphostoli uPhawuli.​—1 KuThimothi 1:​13.

 Lanxa kunjalo, asibambi muntu ngamandla ukuthi asilalele. (1 Phetro 3:​15) Kumele umuntu azenzele isinqumo ezindabeni zokukhonza.​—UDutheronomi 30:19, 20.