Mhlaka 26 June 2022 kwethulwa iNguqulo Yomhlaba Omutsha YeMibhalo Engcwele ngolimi lwesiNdebele saseZimbabwe.

Lesi yisipho esihle kakhulu abantu bakaJehova abasitholileyo ngoba iNguqulo Yomhlaba Omutsha ihunyutshwe ngendlela eqondileyo njalo ilamazwi ayiwo kanye ayephefumulelwe nguNkulunkulu. (2 KuThimothi 3:​16) IBhayibhili leli litshiyene njani lendlela amanye amaBhayibhili ahunyutshwe ngayo? Lihunyutshwe ngobani njalo lidindwe ngobani? Kuyini okungenza uthembe ukuthi iNguqulo Yomhlaba Omutsha ihunyutshwe ngendlela eqondileyo?

Esinye isikhwicamfundo sezentengiselwano okuthiwa nguDeclan Hayes sabhala sathi: “Minyaka yonke alikho elinye ibhuku elithengwa njengeBhayibhili.” Kodwa okudanisayo yikuthi abanye abantu ngenxa yokugijimisa imali abalandaba lokuthi amaBhayibhili abawahumutshayo ahunyutshwe ngendlela eqondileyo yini. Ngokwesibonelo, abahumutshi belinye iBhayibhili bayakhipha amanye amavesi abacabanga ukuthi abantu abazawabala abasoze bawathande. Abanye abahumutshi bona bayatshintsha amabala kumbe imitsho ababona angani izacaphula abantu ababalayo. Ngokwesibonelo, abanye bahumutsha ngendlela eyenza kukhanye angathi uNkulunkulu ungubaba aphinde abe ngumama.

Kodwa okudanisa kakhulu okwenziwa ngabanye abahumutshi bamaBhayibhili yikukhipha ibizo likaNkulunkulu elithi Jehova. (Ezinye izikhwicamfundo zihumutsha ibizo likaNkulunkulu ngokuthi “Yahweh.”) EMibhalweni yeBhayibhili yakudala, ibizo likaNkulunkulu limelwa ngongwaqa abane besiHebheru abangahunyutshwa ngokuthi YHWH kumbe JHVH. Ibizo likaNkulunkulu litholakala eMibhalweni yesiHebheru * okwezikhathi ezingaba ngu-7 000. (U-Eksodusi 3:​15; IHubo 83:18) Kuyacaca ukuthi uMdali wethu ufuna abantu abamkhonzayo balazi futhi balisebenzise ibizo lakhe.

Kodwa kulesikhathi lapho amaJuda ayekela khona ukubiza ibizo likaNkulunkulu esithi kuyazila ukwenza njalo. Lokhu kwabangela ukuthi ngokuhamba kwesikhathi amaKhristu lawo alandele umkhuba lo. (ImiSebenzi 20:29, 30; 1 KuThimothi 4:1) Lamuhla abahumutshi beBhayibhili bajayele ukukhipha ibizo likaNkulunkulu elithi Jehova bafake elokuhlonipha elithi “Nkosi.” Abanye abahumutshi bamaBhayibhili esiNgisi bakhipha ibala elithi “ibizo” kuJohane 17:6. Evesini le uJesu wathi: “Sengenze ibizo lakho laziwa.” I-Good News Translation yona ithi: “Sengikwenze waziwa.”

Ezinye izikhwicamfundo zithi okwenza zikhiphe ibizo likaNkulunkulu zifake elithi “Nkosi” yikuthi zilandela lokho obekuvele kusenziwa kusukela kudala. Abanye bathi okwenza bona bakhiphe ibizo likaNkulunkulu yikuthi bafuna amaBhayibhili abo athengwe. * UJesu kazange avumelane lawo amasiko lawa ayenza ukuthi uNkulunkulu angadunyiswa. (UMathewu 15:6) Kanti njalo eMibhalweni akula lapho esitshelwa khona ukuthi kumele sikhiphe ibizo likaNkulunkulu sifake elokuhlonipha. Ngokwesibonelo, uJesu Khristu ulamabizo okuhlonipha amanengi njengelithi ‘uLizwi kaNkulunkulu’ lelithi ‘iNkosi yamakhosi.’ (ISambulo 19:11-16) Manje lokhu sekusitsho ukuthi ibizo likaJesu kumele likhitshwe yini kusetshenziswe awokuhlonipha?

Indaba yebizo likaNkulunkulu iqakathekile kakhulu. Omunye obona ngokuhunyutshwa kweBhayibhili e-India wathi ekhuluma ngokukhitshwa kwebizo likaNkulunkulu eBhayibhilini wathi: “AmaHindu afuna ukwazi ibizo likaNkulunkulu hatshi amabizo akhe okuhlonipha. Nxa engalazi lelobizo kuyabe kufanana lokuthi awamazi ngitsho umnikazi walo.” Bonke nje abantu abafuna ukumazi uNkulunkulu bengavumelana lamazwi la. Phela ukwazi ibizo likaNkulunkulu kwenza simzwisise, singacabangi ukuthi ngumuntu ongazwisisekiyo esingeke simazi. (U-Eksodusi 34:​6, 7) IBhayibhili lithi: “Wonke umuntu obiza ibizo likaJehova uzasindiswa.” (KwabaseRoma 10:13) Ngakho abantu abakhonza uNkulunkulu kumele balisebenzise sibili ibizo lakhe.

Abantu bathokoza kakhulu ngo-1950 lapho bethola iNguqulo Yomhlaba Omutsha YeMibhalo YamaKhristu YesiGrikhi ngolimi lwesiNgisi. Eminyakeni elitshumi eyalandelayo kwethulwa amabhuku eMibhalo yesiHebheru kancane kancane. Ngo-1961 iBhayibhili leli lethulwa seliphelele ngolimi lwesiNgisi. INguqulo Yomhlaba Omutsha yahumutsha ibizo likaNkulunkulu ngokuthi “Jehova” okwezikhathi ezingaba ngu-7 000 lapho elitholakala khona kuThestamenti Elidala. Okuhle kakhulu yikuthi ibizo leli litholakala ka-237 eMibhalweni yamaKhristu yesiGrikhi. *

Ukufaka ibizo likaNkulunkulu lapho elalitholakala khona kuyamdumisa sibili uNkulunkulu kuphinde kusincede ukuthi sizwisise iMibhalo. Ngokwesibonelo, amaBhayibhili amanengi ahumutsha uMathewu 22:44 ngokuthi: “INkosi yathi eNkosini yami.” Kodwa uhlupho yikuthi akukhanyi ukuthi ngubani okhuluma lomunye. INguqulo Yomhlaba Omutsha yona iwabeka kuhle amazwi akuMathewu 22:44 athethwe kuHubo 110:1. Ithi: “UJehova wathi eNkosini yami.” Lokhu kwenza abayibalayo benelise ukwehlukanisa uJehova uNkulunkulu leNdodana yakhe.

INguqulo Yomhlaba Omutsha idindwa yinhlanganiso esemthethweni yaboFakazi bakaJehova ebizwa ngokuthi yi-Watchtower Bible and Tract Society. Sekuleminyaka edlula 100 oFakazi bakaJehova bephrinta amaBhayibhili njalo bewanika abantu emhlabeni wonke. OFakazi bakaJehova ababumba iKhomithi Yokuhumutsha INguqulo Yomhlaba Omutsha yibo abahumutsha iBhayibhili leli. Amalunga eKhomithi le awazange afuna ukwaziwa ngitsho langemva kokufa kwawo ngoba ayengafuni ukuthi udumo luye kuwo.​—1 KwabaseKhorinte 10:31.

Kungani iBhayibhili leli libizwa ngokuthi yi-Nguqulo Yomhlaba Omutsha? Isandulelo seBhayibhili lesiNgisi elaphuma ngo-1950 sachaza ukuthi ibizo leBhayibhili leli lenza siqiniseke ukuthi sekuseduze ukuthi abantu bangene emhlabeni omutsha okukhulunywa ngawo ku-2 Phetro 3:​13. IKhomithi le ithi kuqakathekile ukuthi amaBhayibhili ahumutshe lona kanye iqiniso eliseLizwini likaNkulunkulu njengoba sesilungiselela ukuyangena emhlabeni omutsha ozabe ‘ulokulunga.’

Abahumutshi beBhayibhili leli babesiba leqiniso lokuthi bahumutsha izinto eziqondileyo. Ababekuhumutsha babekuthatha eMibhalweni yakuqala eyesiHebheru, eyesi-Aramu, leyesiGrikhi besebenzisa yona kanye iMibhalo ethenjwayo. Abahumutshi babesiba leqiniso lokuthi bahumutsha khona kanye okuseMibhalweni yasendulo ngapha besebenzisa ulimi oluzwisiseka lula.

Ezinye izikhwicamfundo ziyayibabaza iNguqulo Yomhlaba Omutsha ngenxa yokuthi ihumutsha izinto ngendlela eqondileyo. Ngo-1989 esinye isikhwicamfundo okuthiwa nguBenjamin Kedar-Kopfstein, esihlala e-Israel njalo esihluza ulimi lwesiHebheru sathi: “Ekuhlolisiseni kwami iMibhalo yesiHebheru ngiyiqathanisa lendlela amanye amaBhayibhili ahumutshe ngayo nginanzelela ukuthi iBhayibhili elingcono kakhulu yi-Nguqulo Yomhlaba Omutsha yesiNgisi. Ekuyisebenziseni kwami kuyazicacela ukuthi abahumutshi beBhayibhili leli basebenza nzima ukuthi bahumutshe ngendlela eqondileyo njalo ezwisisekayo.”

OFakazi bakaJehova sebehumutshe iNguqulo Yomhlaba Omutsha ngezinye izindimi. Abantu abanengi sebelayo iNguqulo Yomhlaba Omutsha ngezindimi zabo njalo abanye baleMibhalo yamaKhristu yesiGrikhi kuphela. Lihunyutshwe njani iBhayibhili leli? Abahumutshi baqala bahlolisise amabala asetshenziswe eBhayibhilini futhi bahumutsha besebenzisa amakhompiyutha. Kulohlangothi olusekela umsebenzi wokuhumutsha oluncedisa abahumutshi ukuze bawenze kuhle umsebenzi wabo. Umsebenzi wokuhumutsha iBhayibhili ukhangelwa yiKhomithi Yokuloba esebenza ingaphansi kweQula Elikhokhelayo laboFakazi bakaJehova. Kuyini okwenziwayo ukuze umsebenzi lo uphume kuhle?

Kuqala kukhethwe iqembu labahumutshi abangamaKhristu azinikeleyo kuNkulunkulu. Abakhangele umsebenzi wokuhumutsha sebananzelela ukuthi abahumutshi benza umsebenzi olohlonzi nxa besebenza bendawonye ngoba bayabe bebonisana. (IZaga 11:14) Izikhathi ezinengi kukhethwa umuntu oselesikhathi ehumutsha amabhuku aboFakazi bakaJehova. Ngemva kwalokho abahumutshi abayabe bekhethiwe bayafundiswa indlela yokuhumutsha iBhayibhili baphinde bafundiswe lendlela yokusebenzisa inhlelo zekhompiyutha nxa sebesenza imisebenzi yabo.

Abahumutshi bayafundiswa ukuthi bahumutshe iBhayibhili ngendlela eqondileyo njalo basebenzisa amabala azazwisiswa ngabantu. Nxa kuyikuthi umbhalo uzasala ucacile futhi uzwisiseka, kuhunyutshwa kulandelwa ibala ngebala kumbe indlela imitsho ebekwe ngayo eMibhalweni yakuqala. Kodwa nxa lokhu kungenza ukuthi umbhalo ungacaci loba ungazwisiseki kufakwa lokho okutshiwo yivesi kumbe umutsho. Lokhu yikho okwenziwa kuhunyutshwa iNguqulo Yomhlaba Omutsha eyesiNdebele. Abahumutshi baqala ngokuhumutsha amabala aqakathekileyo asetshenziswa eBhayibhilini. Babesebenzisa uhlelo lwekhompiyutha okuthiwa yi-Watchtower Translation System. Uhlelo lolu lwalukhipha amabala eBhayibhili ahambelanayo njalo lwalulengxenye etshengisa amabala esiGrikhi lawesiHebheru. Lokhu kwakunceda abahumutshi ukuthi babone ukuthi amabala la ahunyutshwe njani kwamanye amavesi. Ngemva kokuhumutsha amabala la baqalisa ukuhumutsha amavesi. Nxa ivesi abayihumutshayo ilamabala abasebewahumutshile, babehle bawabone kukhompiyutha.

Kodwa ukuhumutsha akutsho nje ukuphongutshintshela amabala esikhiwa esiNdebeleni. Abahumutshi basebenza nzima ukuze babe leqiniso lokuthi amabala abawakhethayo akhipha khona kanye okutshiwo yivesi. Babehumutsha ngonanzelelo ukuze bakhe imitsho ngendlela abantu abakhuluma ngayo. Nxa usubala iBhayibhili leli uzabona ukuthi kwasetshenzwa nzima sibili. Ku-Nguqulo Yomhlaba Omutsha yesiNdebele saseZimbabwe kufakwe khona kanye okwakuseMibhalweni yasendulo futhi ihunyutshwe ngendlela elula, ecacileyo lezwisisekayo. *

Siyakukhuthaza ukuthi uyibale iNguqulo Yomhlaba Omutsha YeMibhalo Engcwele. Ungayibala kuwebhusayithi yethu i-jw.org, ku-JW Library kumbe uyicele komunye waboFakazi bakaJehova. Ungalibala ukhululekile iBhayibhili leli ngoba liphethe wona kanye amazwi kaNkulunkulu ahunyutshwe ngolimi lwakho. Uzazibonela ngawakho ukuthi liyisipho esihle kakhulu esivela kuJehova.