IBhayibhili Lithini Ngokuzila?
Impendulo YeBhayibhili
Ngezikhathi zakudala ukuzila kwakusamukeleka kuNkulunkulu nxa kwakusenziwa ngezizathu ezinhle. Kodwa nxa kwakungenjalo uNkulunkulu wayengathokozi. Lamuhla akulamthetho eBhayibhilini othi ukuzila kuqondile yini kumbe hatshi.
Abantu bakudala babezila nxa kutheni?
Nxa babefuna ukuncediswa nguNkulunkulu kumbe ukuqondiswa nguye. Abantu ababesiya eJerusalema babezila ukudla ukuze kukhanye ukuthi bancenga uNkulunkulu ukuthi abancedise. (U-Ezra 8:21-23) Ngezinye izikhathi uPhawuli loBhanaba babezila nxa bekhetha abadala emabandleni.—ImiSebenzi 14:23.
Ukuze bacabangisise ngenhloso kaNkulunkulu. UJesu wazila okwamalanga angu-40 ngemva kokubhabhathizwa ukuze alungiselele ukwenza intando kaNkulunkulu.—ULukha 4:1, 2.
Ukuze batshengise ukuzisola ngezono ababezenzile. UJehova watshela ama-Israyeli ayengafuni ukuphenduka wathi: “Phendukelani kimi ngezinhliziyo zenu zonke, ngokuzila langokukhala lokulila.”—UJoweli 2:12-15.
NgeLanga Lokubuyisana. Emthethweni uJehova awunika ama-Israyeli kwakulothi bazile ngeLanga Lokubuyisana. a (ULevi 16:29-31) Kwakuqakathekile ukuthi ama-Israyeli azile ngelanga leli ngoba kwakuzawakhumbuza ukuthi alesono lokuthi ayakudinga ukuthethelelwa nguNkulunkulu.
Yiziphi izizathu ezingaqondanga zokuzila?
Ukufuna ukubukwa ngabantu. UJesu wafundisa ukuthi ukuzila kumele kwenziwe ensitha ngoba yindaba ephakathi komuntu ozilayo loNkulunkulu.—UMathewu 6:16-18.
Ukufuna ukuzenza olungileyo. Ukuzila akwenzi umuntu abengcono kulabanye.—ULukha 18:9-14.
Ukuzama ukuvala isono esenziwe ngabomo. UNkulunkulu wayesamukela ukuzila nxa abantu bemlalela futhi betshengisa ukuzisola ngezono abazenzileyo.—U-Isaya 58:3, 4.
Ukuphongulandela umkhuba owenziwayo. UNkulunkulu unjengomzali wethu futhi akathokozi nxa abantu besenza izinto ezingasuki enhliziyweni.—U-Isaya 58:5-7.
Kulomthetho othi amaKhristu kumele azile yini?
Hatshi. UJehova wayetshele ama-Israyeli ukuthi azile ngeLanga Lokubuyisana kodwa umkhosi lo waphela ngemva kokuba uJesu ethethelele izono zabantu abaphendukayo. (KumaHebheru 9:24-26; 1 UPhetro 3:18) ILanga Lokubuyisana kwakungumkhosi owawusenziwa ngama-Israyeli kodwa amaKhristu wona kawakho ngaphansi koMthetho kaMosi. (KwabaseRoma 10:4; KwabaseKholose 2:13, 14) Yikho umKhristu ngamunye usengazikhethela ukuthi uyafuna yini ukuzila loba hatshi.—KwabaseRoma 14:1-4.
AmaKhristu ayakwazi ukuthi ukuzila ayisikho okuqakatheke kakhulu ekukhonzeni kwawo. IBhayibhili lisitshela ukuthi amaKhristu angenelisa uthokoza lanxa engazili.—1 KuThimothi 1:11; UmTshumayeli 3:12, 13; KwabaseGalathiya 5:22.
Imibono engaqondanga mayelana lokuzila
Okungaqondanga: Umphostoli uPhawuli wakhuthaza amaKhristu atshadileyo ukuthi azile.—1 KwabaseKhorinte 7:5, King James Version.
Okuqondileyo: Imibhalo yeBhayibhili yakudala ayikhulumi lutho ngokuzila ku-1 Khorinte 7:5. b Lokhu kutshengisa ukuthi abahumutshi beBhayibhili bangezelela indaba yokuzila. Baphinda benza njalo lakuMathewu 17:21; uMakho 9:29 laku-ImiSebenzi 10:30. AmaBhayibhili amanengi lamuhla ayaweqa amavesi la ngoba ayengekho.
Okungaqondanga: AmaKhristu kumele azile ukuze akhumbule amalanga angu-40 uJesu awazilayo ngemva kokubhabhathizwa.
Okuqondileyo: UJesu kazange athi amaKhristu kumele azile njalo akulandawo eBhayibhilini lapho esifunda khona ukuthi amaKhristu akuqala azila. c
Okungaqondanga: AmaKhristu kumele azile nxa ekhumbula ukufa kukaJesu.
Okuqondileyo: UJesu kazange athi abalandeli bakhe bazile nxa bekhumbula ukufa kwakhe. (ULukha 22:14-18) Wathi abalandeli bakhe babezazila ngemva kokufa kwakhe. Kodwa lokhu akutsho ukuthi wayebeka umthetho okumele ulandelwe, wayekhuluma ngokwakuzakwenzakala. (UMathewu 9:15) IBhayibhili latsho ukuthi amaKhristu kumele adle ezindlini zawo nxa elambile hatshi ukudla eSikhumbuzweni sokufa kukaJesu.—1 KwabaseKhorinte 11:33, 34.
a Mayelana leLanga Lokubuyisana uNkulunkulu wathi kuma-Israyeli: “Lizidele.” (ULevi 16:29, 31) Lokhu kwakusitsho ukuthi bazile. (U-Isaya 58:3) IBhayibhili okuthiwa yi-Contemporary English Version likubeka kanje: “Akumelanga lidle ukuze litshengise ukuphenduka ezonweni zenu.”
b Khangela umqulu wesithathu ikhasi 554 ebhukwini elithi A Textual Commentary on the Greek New Testament elabhalwa nguBruce M. Metzger.
c Esinye isichazamazwi esikhuluma ngamaKatolika sithi: “Kungakafiki iminyaka yabo 300 C.E. abantu babezila okwelanga kumbe amabili belungiselela iPhasika hatshi ukuqeda iviki yonke bezilile. Ukuzila amalanga angu-40 kwaqalisa ngemva komhlangano owenziwa ngabafundisi beKatolika lohulumende lapho abavumelana khona ukuthi benze njalo. Kodwa ezinye izikhwicamfundo azikuvumi ukuthi emhlanganweni lo kwatshaywa umthetho onjalo.”—New Catholic Encyclopedia Second Edition, Volume 8, page 468.
Nanku Okunye
UJESU UYINDLELA, LEQINISO, LOKUPHILA
Kungani Abafundi BakaJesu Bengazili Ukudla?
UJesu ubaphendula esebenzisa umzekeliso wemigodla yewayini.
OKUMAYELANA LATHI
Cela Ukuthi Omunye Wethu Akuvakatshele
Xoxa ngezinto ezitshiyeneyo eziphathelane leBhayibhili kumbe ufunde okunengi ngaboFakazi bakaJehova.