Isono yiloba yisiphi isenzo, umuzwa kumbe umcabango ongahambelani lemithetho kaNkulunkulu. Sigoqela lokwephula imithetho kaNkulunkulu ngokwenza into embi loba engalunganga emehlweni kaNkulunkulu. (1 UJohane 3:4; 5:17) IBhayibhili liphinda lithi isono yikwehluleka ukwenza into eqondileyo.—UJakhobe 4:17.

 Ezindimini zakuqala okwabhalwa ngazo iBhayibhili ibala elithi isono litsho “ukukhutha.” Ngokwesibonelo, amanye amasotsha ako-Israyeli ayezingcitshi zokujikijela ngamatshe okokuthi ‘ayengakhuthi.’ Aluba ibala elithi ‘ayengakhuthi’ lalingahunyutshwa njengoba linjalo kwakuzathiwa “ayengenzi isono.” (Abahluleli 20:16) Yikho ukwenza isono yikukhutha kumbe ukwehluleka ukuphila ngendlela uNkulunkulu afuna siphile ngayo.

 Njengoba uNkulunkulu enguMdali wethu, nguye okumele asifakele imithetho. (ISambulo 4:11) Sizalandisa kuye ngenxa yakho konke esikwenzayo.—KwabaseRoma 14:12.

Kungenzakala yini ukuthi singawoni?

 Hatshi, ngoba iBhayibhili lithi: “Bonke bonile njalo bayasilela enkazimulweni kaNkulunkulu.” (KwabaseRoma 3:23; 1 AmaKhosi 8:46; UmTshumayeli 7:20; 1 UJohane 1:8) Kungani kunjalo?

 Ekuqaliseni, u-Adamu lo-Eva babengelasono ngoba babedalwe bephelele futhi benziwe ngomfanekiso kaNkulunkulu. (UGenesisi 1:27) Kodwa lokhu kwabalahlekela ngenxa yokungalaleli kwabo uNkulunkulu. (UGenesisi 3:5, 6, 17-19) Yikho badlulisela isono lokungapheleli ebantwaneni babo. (KwabaseRoma 5:12) INkosi uDavida yabhala yathi: “Ngazalwa ngilesono.”—IHubo 51:5.

Kulezono ezinkulu ukwedlula ezinye yini?

 Ye zikhona. Ngokwesibonelo iBhayibhili lithi abantu baseSodoma “babexhwalile besenza izono ezinkulu” futhi ‘izono zakhona zazisesabeka.’ (UGenesisi 13:13; 18:20) Ake sihlole imicijo emithathu engasinceda sibone ukuthi kuyini okwenza isono sibe sikhulu kumbe sibe sibi kakhulu.

1.   Ubukhulu. IBhayibhili lisixwayisa ukuthi sibalekele ukwenza izono ezinkulu ezinjengobufebe, ukukhonza izithombe, ukutshontsha, ukudakwa, ubuqili, ukubulala lesidimoni. (1 KwabaseKhorinte 6: 9-11; ISambulo 21:8) IBhayibhili liphinda likhulume ngesono esingasenza singahlosanga esinjengokukhuluma amazwi ahlabayo kumbe ukwenza ngendlela ezwisa abanye ubuhlungu. (IZaga 12:18; Kwabase-Efesu 4:31, 32) Lanxa kunjalo iBhayibhili lisikhuthaza ukuthi singasithathi lula isono njengoba zonke nje zingabangela ukuthi sicine sephule imithetho kaNkulunkulu.—UMathewu 5:27, 28.

2.   Inhloso. Ezinye izono zenziwa ngenxa yokungazi imithetho kaNkulunkulu. (ImiSebenzi 17:30; 1 KuThimothi 1:13) Lanxa kungamelanga zithathwe lula, iBhayibhili litshengisa ukuthi ezinjalo zitshiyene lalezo ezenziwa ngabomo, umuntu eyazi imithetho kaNkulunkulu. (AmaNani 15:30, 31) Isono esenziwa ngabomo sivela ‘enhliziyweni embi.’—UJeremiya 16:12.

3.   Isikhathi. IBhayibhili lithi kulomehluko phakathi kwesono esenziwa kanye laleso esenziwa okwesikhathi eside. (1 UJohane 3:4-8) Nxa “siqhubeka sisenza isono ngabomo” ngemva kokuba sesikwazi okulungileyo siyabe sizathola isijeziso esivela kuNkulunkulu.—KumaHebheru 10:26, 27.

 Umuntu ozisolayo ngenxa yesono esikhulu asenzileyo angadana ngenxa yesono leso. Ngokwesibonelo, iNkosi uDavida yabhala yathi: “Ukona kwami sekungisinda njengomthwalo onzima ongathwalekiyo.” (IHubo 38:4) Kodwa iBhayibhili liyasiduduza ngamazwi la athi: “Omubi kayekele indlela yakhe loxhwalileyo alahle imicabango yakhe. Kaphendukele kuJehova, uzakuba lesihawu kuye, lakuNkulunkulu wethu ngoba uzamthethelela ngesihle.”—U-Isaya 55:7.