MUSOLO WO KUJIJA 49
NGOMA 147 Upenyu Usingaperi Wotakagondeswa
Mungaitenyi Kuti Murarame Nokusingaperi?
‘Mundhu wese anoashira mwanakomana uye otenda maari unozova no upenyu usikaperi.’—Johani 6:40.
ZVATISAJIJA
Tinozojija kuti makomborero api ano vokuzojwa uye magundata amweni, ngo pamusoro po cibairo ca Jesu Kristu.
1. Ngenyi vandhu vamweni vanoti azviiti kurarama no kusingaperi?
VANDHU vakawanda vanoeja kurhya zviro zvinovaka muviri, vanoita ezerisisiyo kuti vave no utano wakanaka uye vararame nguva yakareba. Kunyange zvakadalo avasotereri kurarama no kusingaperi. Ivona vangalangarira kuti azvikwanisiki kurarama no kusingaperi ngo ndava yo zvineso zvinoviiswa ngo kukura. Asi pana Johani 3:16 uye 5:24 Jesu wakabhuya kuti: Zvinoita kuti tiwane ‘upenyu usingaperi’.
2. Johani citsauko 6 cinobhuyenyi ngo pamusoro po upenyu usingaperi? (Johani 6:39, 40)
2 Zuva rimweni, Jesu wakaita mushamaiso wo kupa vandhu vakawanda zvokurhya zvingwa no hove. a Izvi zvaishamaisa, asi zvaakabhuya mu zuva rakazotevera zvaishamaisa maningi. Vandhu vakawanda vakamutevera mbhera kooguma ku Kapernaume, ikonayo wakavavhunja kuti vandhu vaizomuswa vorarama no kusingaperi. (Verenganyi Johani 6:39, 40.) Langariranyi kuti izvi zvinoda kubhuyenyi ku shamwari no hama jenyu jakafa. Masoko akabhuya Jesu, anokhombija kuti vandhu vakawanda vakafa vanozomuswa imwimwi no hama jenyu mungararama no kusingaperi! Asi masoko amweni akabhuiwa mu mavhesi amweni anotevera ari mu citsauko 6 ca Johani, akanesa vandhu kuti vamazwisise. Na zvino asiri kunesa vandhu kuti vamazwisise.
3. Jesu wakabhuyenyi pana Johani 6:51?
3 Jesu paainga apeja kupa vandhu zvokurhya, ivona vakatanga kulangarira ngo manaa akapuwa vaIziraeri ndi Jehovha pavainga muzvipare. Bhaibheri rinobhuya manaa inga ‘cingwa co mu gore’. (Pis. 105:40; Johani 6:31) Jesu wakashandisa manaa kuti ajijise zviro zvinokosha maningi. Kunyange hazvo manaa yainga nasiriro ya Jehovha, asi vakamarhyaro ngo kufamba ko nguva vakazofa. (Johani 6:49) Asi Jesu wakazviti: ‘Ndiri cingwa cinovha kudenga,’ ‘cingwa ca Mwari,’ uye ‘cingwa co upenyu.’ (Johani 6:32, 33, 35) Jesu wakabhuya musiyano wo manaa na iyena pacake. Iyena wakati: ‘Ndini cingwa cinopona cakavha kudenga. Kudai mundhu akarhya cingwa ici unozorarama no kusingaperi.’ (Verenganyi Johani 6:51.) Asi vajudha vakabararika hwiru ngo masoko aya. Ivona vainga vasikazvizwisisi kuti kuitisa kudini Jesu ungabhuya kuti iyena ‘cingwa’ cakavha kudenga uye kuti cingwa ici caikosha kudarika manaa akapuwa vaiziraeri ndi Mwari? Jesu wakavabesa kuti vazwisise paakati: ‘Cingwa candinozomupa inyama yangu.’ Waida kubhuyenyi? Zvinokosha kuti tizwisise zvaaida kubhuya, ngokuti mupingulo wakona unotibesa kuzwisisa kuti iyesu no hama jedu jakafa tinozowanisa kudini upenyu usingaperi. Ngatiwone kuti waida kubhuyenyi.
ZVINODA KUBHUYENYI ‘CINGWA CINOPONA’ NO ‘NYAMA YANGU’
4. Ngenyi vamweni vakanyangajwa ngo zvakabhuiwa ndi Jesu?
4 Vandhu vamweni vakawajiwa, povakazwa Jesu esibhuya kuti ‘waida kupa nyama yake kuti aponese vandhu.’ Pamweni vakalangarira kuti vaizopuwa nyama yake kuti vairhye kamare. (Johani 6:52) Kunja ka izvi, iyena wakabhuyazve masoko amweni akavawaja maningi. Iyena wakati: ‘Kudai mukatama kurhya nyama yo mwana wo mundhu no kumwa ngazi yake amuzowani upenyu usingaperi.’—Johani 6:53.
5. Ngenyi tingava no cokwadi cokuti Jesu aato kubhuya kuti vandhu vaidikana kumwa ngazi yake kamare?
5 Mu mazuva a Nowa, Mwari wakarambisa kuti vandhu avasaidikana kurhya ngazi. (Gen. 9:3, 4) Jehovha wakavhunjazve vaIziraeri mutemo uwu. Mundhu wese waizorhya ngazi ‘waidikana kuuraiwa.’ (Rev. 7:27, masoko o pasi.) Jesu waizwira mutemo uwu. (Mat. 5:17-19) Hino tino cokwadi cokuti Jesu aasaizokumbira kuti vajudha varhye nyama yake no kumwa ngazi yake. Ngo kubhuya magama aya anowaja, Jesu waijijisa vandhu kuti vawane ‘upenyu usingaperi.’—Johani 6:54.
6. Tinozvizivisa kudini kuti Jesu, waibhuya ngo njira yokuezanisira kuti vandhu vaidikana kumwa ngazi no kurhya nyama yake?
6 Jesu waida kubhuyenyi? Zvakajeka kuti Jesu waibhuya ngo gwanja lo kuezanisira, inga zvaakavhunja mwanakaji umweni wo ku Samaria paakati: ‘Mundhu wese anomwa kumwa yandinomupa aazozwizve nyota, asi kumwa yandinomupa inozova cinyuke co kumwa inoerera kuti ipe upenyu usingaperi.’ (Johani 4:7, 14) b Jesu wainga asikabhui kuti mwanakaji wo ku Samaria waidikana kumwa kumwa iri yese, ngo civhumbu orarama no kusingaperi. Ngo njira yakatojana, wainga asikabhuyi kuti vandhu vaya vaakabhuyaya navo ku Kapernaume vaizowana upenyu usingaperi ngo kurhya nyama yake pacayo no kumwa ngazi yake kamare.
KUSIYANA KO ZVIITIKO ZVIVIRI IZVI
7. Vamweni vanoti kudini ngo masoko a Jesu anowanika pana Johani 6:53?
7 Vandhu vamweni vanoti masoko ari pana Johani 6:53 Jesu waida kubhuira zvaizoizwa ngo vandhu vese vanonga vari pa cilangarijo ngokuti wakashandisa masoko akatojana. (Mat. 26:26-28) Ivona vanoti, mundhu wese anonga ari pacilangarijo unodikana kurhya cingwa no kumwa vhinyu. Izvi ndizvona here? Zvinokosha maningi kuti tiwane mu pingulo wakona ngokuti gore ngo gore, vandhu vakawanda vanoungana kuti vaite musangano uwu unokosha. Tiri kuda kuwona musiyano uripo pakati pozvinobhuiwa pana Johani 6:53 no zvakabhuiwa ndi Jesu pa cilangarijo.
8. Ngaupi musiyano uripo pakati pozviitiko zviviri izvi? (Wonanyi foto.)
8 Ngatimbowona musiyano uripo pakati pozviitiko izvi. Cokutanga, Jesu wakabhuya riini uye kupi masoko akanyorwa pana Johani 6:53-56? Iyena wakabhuya masoko aya mu gore la 32 Kristo aviya ku vandhu vo Garireya. Izvi zvakaitika padarika gore asati aita cilangarijo mu Jerusarema. Cocipiri, masoko aya waimavhunja ani? Iyena wakamavhunja vandhu vaimutevera ngo kuda zvo kurhya, kupinda kujija ngo pamusoro pa Jehohva no Umambo wake. (Johani 6:26) Kubhuya cokwadi, Jesu paakabhuya zviro zvavasito kunasa kuzwisisa ngokukasika vakaregera kumutenda. Vajiji vake vamweni vakaema kumutenda. (Johani 6:14, 36, 42, 60, 64, 66) Vandhu ava, vainga vakasiyana maningi no vapostori 11 va Jesu vainga vakagondeka. Pa nguva iyi ivona vakaramba vana Jesu kunyange vainga vasikazwisisi zvaaijijisa. Asi vapostori ava vainga no cokwadi cokuti Jesu wainga mwana wa Mwari wainga akavha ku denga. (Mateu 16:16) Jesu wakabonga maniningi vapostori vake ngo kubhuya kuti: ‘Iyemwi ndimwi makagara neni pa muejo jangu.’ (Ruka 22:28) Musiyano uwu, unokhombija kuti masoko ari pana Johani 6:53 Jesu wainga asikabhui zvaida kuzoizwa pa cilangarijo. Asi pano musiyano umweni.
Muhoko boshwe Johani citsauko 6 inosangura zvakabhuiwa ndi Jesu ku vaJudha muGarireya. Mu hoko murhyo gore rakatevera Jesu wakabhuya ngozvo cikwata cidoko co vajiji vainga Jerusarema (Wonanyi ndima 8)
MASOKO A JESU ANOBHUYENYI KAMURI
9. Masoko aakabhuya Jesu pacirangarijo anoshanda pacikwata cipi?
9 Pa cilangarijo, Jesu wakapa vapostori vake cingwa cainga cisina isti uye ovavhunja kuti caiemerera muviri wake. Yena wakazovapazve vhinyu iyo inoemerera “ngazi yake yo citenderano.” (Mako 14:22-25; Ruka 22:20; 1 VaK. 11:24) Zvaakabhuyari zvinokosha mainingi. Iyena wakati i sungano ipsa. Sungano iyi inoizwa ndi Jehovha no “nyumba ya Iziraeri” kana vaya vanozotonga na Jesu mu Umambo wa Mwari. (VaH. 8:6, 10; 9:15) Pa nguva iyi, vapostori avato kuzwisisa ngozvo sungano iyi, uye vaizoita divi lo sungano ipsa lo kutonga na Jesu kudenga.—Johani 14:2, 3.
10. Zvakabhuiwa ndi Jesu ku Garireya zvakasiyana papi no zvaakabhuya pacilangarijo? (Wonanyi foto.)
10 Zvakabhuiwa ndi Jesu pa cilangarijo, zvinoda kubhuira cikwata cidoko co vandhu cinodaijwa kuti mushambi mudoko. Vapostori vaainga navo pa nguva iyi ndivona vakatanga kuita divi lo cikwata ici. (Ruka 12:32) Ndivona vaakakumbira Jesu kuti varhye cingwa no kumwa vhinyu. Vamweni vaizoitawo divi lo sungano iyi, vanozorhya cingwa no kumwa vinyu pa cilangarijo ca Jesu. Ndivona vanozoenda koogala na Jesu kudenga. Ngokudalo, uwu ndiwona musiyano uripo pakati po cilangarijo co kufa ka Jesu, no zvakaitika ku Garireya. Masoko aakabhuya pa cilangarijo cokufa kake anoshandira kucikwata cidoko. Uye masoko aakabhuya paainga Kapernaume anobatanija vandhu vakawanda.
Vaya vanorhya cingwa no kumwa vhinyu ndi vaya vo cikwata cidoko, asi mundhu ari wese ungatenda muna Jesu kuti awane upenyu usingaperi (Wonanyi ndima 10)
11. Jesu wakabhuyenyi ku Garireya zvinokhombija kuti wainga asikabhuiri cikwata cidoko?
11 Jesu paainga ku Garireya mu gore la 32 Kristu aviya, vandhu vakawanda vaaibhuya navo vaida kurhya. Asi Jesu wakaeja kuvabesa kuti vawone kuti kainga no zviro zvaikosha kupinda zvokurhya zvainga zviro zvaizovapa upenyu usingaperi. Jesu wakatovavhunja kuti vandhu vainga vakafa vaizomuswa pa zuva lo kupejisira, kuti vararame no kusingaperi. Pa citsauko 6 ca Johani yena wainga asikabhui makomborero aizowaniwa ngo vandhu vashoma. Asi iyena wakabhuya ngo makomborero aizowaniwa ngo vandhu vakawanda. Iyena wakati: “Ari wese akarhya cingwa ici unozorarama no kusingaperi . . . Cingwa candinopa inyama yangu kuitira upenyu wo vandhu.”—Johani 6:51. c
12. Tinodikana kuitenyi kuti tiwane upenyu usingaperi?
12 Jesu aato kuvhunja va Judha vo Garireya kuti makomborero aya, aizoviira vandhu vese vakamborarama kareko kana vaizobarwa. Asi zvaizobesa vanorhya cingwa, kana kuti vaya vano rutendo muna Jesu. Vandhu vakawanda vanozviti makristu, vanotenda kuti vanozoponeswa kudai vakatenda basi ‘muna Jesu,’ uye no kumuwona inga muponesi wavo pacavo. (Johani 6:29, Shanduro ya Rei Jaime) Kainga no vandhu vakawanda maningi ku Garireya vaitenda muna Jesu, asi vakaema kumutevera. Ngenyi izvi zvakaitika?
13. Icinyi cinodiwa kuti mundhu ave muteveri wa Jesu?
13 Vandhu vazinji vaitevera Jesu ngokuti iyena waivapa zvavaida. Ivona vaida kuti Jesu avarape, avape zvokurhya zvamahara, avaitire mushamaiso no kubhuya zvovaida. Asi Jesu, wakavabesa kuti kuwona zvovaidikana kuita kuti vave vajiji vake. Jesu wakavavhunja pambhene kuti aato kuviya pasi pano kuzovapa basi zvovaida. Ivona vaidikana kutenda mukoka wake wokuti, “viyanyi kandiri,” kana kuti vaidikana kuzwira zvese zvaaijijisa.—Johani 5:40; 6:44.
14. Tinodikana kuitenyi kuti tibeswe ngo nyama no ngazi ya Jesu?
14 Jesu wakajijisa kuti, ngo ndava yokupira kakaita muviri no ngazi yake, zvakaita kuti vandhu vakawanda vawane upenyu usingaperi. Asi vandhu ava, vaidikana kutenda cokwadi ici, uye vova no rutendo maari. Kutenda uku kaikosha maningi ku Vajudha uye kunokoshawo maningi katiri. (Johani 6:40) Ngokudalo, zvakabhuiwa ndi Jesu pana Johani 6:53, zvinoda kubhuya kuti, tinodikana kutenda muripo wa Jesu kuti tiwane upenyu usingaperi. Makomborero aya, angatowaniwavo ngo vandhu vakawanda.—VaE. 1:7.
15-16. Zviro zvipi zvinokosha zvotajija pana Johani citsauko 6?
15 Zvakanyorwa pana Johani citsauko 6, zvinokosha maningi katiri tese uye kuno hama jedu jakafa. Paiinga ku Garireya, iyena wakarapa vaiwaja, waijijisa ngozvo Umambo wa Mwari uye wakapa vandhu zvokurhya. (Ruka 9:11; Johani 6:2, 11, 12) Asi cinonyanya kukosha ngo cokuti wakajijisa kuti iyena “cingwa co upenyu.”—Johani 6:35, 48.
16 Icokwadi kuti kuna vaya vaakadanija kuti: “Magundata amweni” avadikani kurhya cingwa no kumwa vhinyu pacilangarijo co kufa ka Jesu. (Johani 10:16) Kunyange zvakadalo, ivona vanobeswa ngo nyama no ngazi ya Jesu Kristu. Kuitisa kudini? Ivona vongabeswa ngo kutenda muripo wa Jesu Kristu. (Johani 6:53) Ngokudaro, vaya vanorhya cingwa no kumwa vhinyu, vangakhombija kuti vakaita sungano ipsa uye kuti vanosoterero yo kuzotonga mu Umambo wa Mwari kudenga. Azvinenyi kuti tiri vokuzojwa kana magundata amweni, masoko ari pana Johani citsauko 6 anokosha katiri tese. Iyena unotijijisa kuti, tese tinodikana kuva no rutendo kumuripo wa Jesu kuti tirarame nokusingaperi.
NGOMA 150 Psakanyi Mwari Kuitira Ruponeso Wenyu
