Ekisodho 7:1-25
7 Jehovha wakavhunja Mosi kudari: “Vonai, ndakuita inga Mwari kuna Faro. Aroni hama yako, anozova muporofeti wako.
2 Unozonanga zviro zvese zvandinozokuvhunja. Aroni hama yako, inozozvivhunja Faro. Iyena anozosiya Vaiziraeri kuti vabude mu nyika yake.
3 Inini ndinozotendera kuti mwoyo wa Faro utindivare. Ndozowanja zvitatijo no mushamaiso, zvandinozoita mu nyika yo Ejipita.
4 Asi Faro aazomupurukiri. Inini ndinozoshandisa simba rangu mu nyika yo Ejipita, ndobudisa cikwata co vandhu vangu, Vaiziraeri, mu nyika yo Ejipita, pasure po kukhawisa nyikeyo.
5 Vaejipita vanozonasa kuziva kamare kuti ndini Jehovha, pandinozoshandisa simba rangu kuti ndihwise Ejipita, ndobudisa Vaiziraeri pakati pavo.”
6 Mosi na Aroni vakaita zvovakavhunjwa ndi Jehovha. Vakaita kudaro kamare.
7 Mosi wainga no 80 o makore. Aroni wainga no 83 o makore, povakabhuya na Faro.
8 Jehovha wakavhunja Mosi na Aroni kudari:
9 “Kudari Faro akamuvhunja kuti: ‘Itanyi mushamaiso.’ Iwewe vhunjai Aroni kudari: ‘Torai ndonga yako uikhandire pasi, pa mberi pa Faro.’ Iyona inozocinja kuita nyoka yakakura.”
10 Ngo kudaro, Mosi na Aroni vakapinda kuna Faro vonasa kuita zvovakavhunjwa ndi Jehovha. Aroni wakatora ndonga yake woikhandira pasi pamberi pa Faro no pamberi po vashandiri va Faro. Ndonga iyani yakacinja kuita nyoka yakakura.
11 Asi Faro wakadanija vazivi, varoi no vapiri vo masaramuso vo Ejipita voitavo zvondozvo ngo masaramuso avo.
12 Umwe na umwe wavo wakakhandira ndonga yake pasi. Ndongejo jakacinja kuita nyoka jakakura. Asi ndonga ya Aroni yakamija ndonga javo.
13 Pikija zvakadaro, mwoyo wa Faro wakatindivara. Iyena aazivi kuvapurukira inga zvakananga Jehovha.
14 Jehovha wakavhunja Mosi kudari: “Mwoyo wa Faro wakatindivara. Iyena waramba kupindisa vandhu vangu.
15 Endai ka Faro mangwana co mangwanani. Iyena paanonga ecienda ku Murambo wa Niro, iwewe garai mumbhiripiri mo kumwa kuti usongane naye. Torai ndonga yakacinjaya kuva nyoka.
16 Muvhunjei kudari: ‘Jehovha, Mwari wo Vahebheru, wandituma kwauri. Iyena wandivhunja kudari: “Pindisai vandhu vangu kuti vandishandire mu zvipare.” Asi imwimwi amuzivi kumuzwira mbhera wari.
17 Jehovha anoti: “Nga izvi, unozoziva kuti ndini Jehovha. Wari ndinoda kutaka kumwa yo Murambo wa Niro ngo ndonga iri wari munyara mwangu. Kumwa iyi inozocinja kuva ngazi.
18 Hove jiri mu Murambo wa Niro jinozopera kufa. Murambo wese unozonuha. Vaejipita avazokwanisi kumwa kumwa yo Murambo wa Niro.”’”
19 Jehovha wakavhunja Mosi kudari: “Vhunjai Aroni kuti: ‘Torai ndonga yako uimuse pa nyezuru po kumwa yo Ejipita, iri mu murambo, mu mugeri,* mu makandhwa no mu ndau jinodirihwa kumwa, kuti icinje kuva ngazi.’ Kunozova no ngazi mu nyika yese yo Ejipita mbhera mu ndau jakaitwa ngo matabwa no mapuwe.”
20 Mosi na Aroni, vakaita ngo kukasika zvovakavhunjwa ndi Jehovha. Iyena wakamusa ndonga yake wotaka kumwa yo Murambo wa Niro, pamberi pa Faro no pamberi po vashandiri vake. Kumwa yese yo murambo yakacinja kuva ngazi.
21 Hove jainga mu murambomo jakapera kufa. Murambowo wakatanga kunuha, zvoita kuti Vaejipita vokonehwa kumwa kumwa yo murambowo. Muejipita mwese mwainga no ngazi.
22 Ngo kudaro, vapiri vo masaramuso vo Ejipita vakaitavo zvondhozvo, ngo masaramuso avo, zvoita kuti mwoyo wa Faro ugare wakatindivara. Iyena aazivi kuvapurukira, inga zvakanangwaya ndi Jehovha.
23 Perapo, Faro wakahwirira kanyi. Zvakaitikaro, azvizivi no kutomupsasa.
24 Vandhu vese vo Ejipita vaica mwimbo* ngo mumbhiripiri mo Murambo wa Niro kuti vakwanise kucera kumwa yo kumwa. Ngokuti kumwa yo Murambo wa Niro aicaimwika.
25 Pakapera njiku nomwe Jehovha naacinja Murambo wa Niro kuva ngazi.
