Genesisi 27:1-46
27 Izaki wainga waamusharuka, majiso ake ainga acikakwanisi kuvona ushoni. Ngo kudaro, wakadanija Izau mwana wake wo mukuru, womuvhunja kuti: “Mwana wangu!” Iyena wakadavira kuti: “Ndauwe!”
2 Izaki wakaenderera mberi eciti: “Inini ndaamusharuka. Andiizivi njiku yandinofa.
3 Waro ndapota torai mupasha jako no uta uende musora koondinyangira nyama.
4 Ukaviya, ibikei ngo mabikiro andinodaya, uiviise kuno. Perapo ndinozoiha kuti ndikukomborere ndicito ndafa.”
5 Asi Rabheka waizvizwa Izaki paaibhuya no mwana wake Izau. Ngo kudaro, Izau wakazopinda konyanga nyama kuti aviye nayo.
6 Rabheka wakavhunja mwana wake Jakobe kuti: “Ndavha kuzwa babako vecivhunja nevanji vako Izau kuti:
7 ‘Ndiviisirei nyama, uibike ngo mabikiro andinodaya. Perapo ndinozoiha kuti ndikukomborere pamberi pa Jehovha ndicito ndafa.’
8 Waro izwai mwana wangu. Itai zvandinodari kukuvhunjari pano.
9 Ndapota, endai kumushambi uviise zvikoto-koto* zviviri. Kuti ndizvibikire babako ngo mabikiro avanodaya.
10 Perapo endai koopekeja babako kuti vahe, vakukomborere vacito vafa.”
11 Jakobe wakavhunja Rabheka mai wake kuti: “Izau nevanji vangu vano mavhiri, asi inini andina mavhiri.
12 Babangu vakazondibata-bata keni? Zvinozoita inga ndiri kuvaungwisa. Ivona vanozondituka kuciripi kundikomborera.”
13 Mai vake vakamudavira kuti: “Kutukwa kwaunozoithwaro ngakuviire inini mwana wangu. Itai basi zvandakuvhunjaro. Endai, undiviisire zvikotokotozvo.”
14 Ngo kudaro, iyena wakaenda, wotora zvikoto-koto* zviya, wozviviisa kamake. Make vakazvibika inga zvaidaya babake.
15 Pasure pazvo, Rabheka wakatora nguvo jakaseja* maningi jo mwana wake wo mukuru, Izau, jaainga najo mumba, wojisimija mwana wake wo mudoko Jakobe.
16 Iyena wakamusimijazve mukono jake no musipa, matovo o zvikoto-koto* zviya, ngokuti mainga mucina mavhiri.
17 Iyena wakapekeja mwana wake Jakobe, nyama yakabikwa ushoni no zvokuha zvaakabika.
18 Ngo kudaro, iyena wakaenda ka babake wovadanija kuti: “Baba!” Ivona vakadavira kuti: “Ndauwe! Ndiwe ani mwanangu?”
19 Jakobe wakadavira babake kuti: “Ndini Izau, dangwe renyu. Ndapera kuita zvamandivhunjaya. Ndapota garanyi pasi. Ihanyi nyama yandamuviisira kuti mundikomborere.”
20 Izaki wakavhunjisa mwana wake kuti: “Waitisa kudini kuti ukasike kuiwana, mwana wangu?” Iyena wakadavira kuti: “Ngokuti Jehovha, Mwari wenyu waiviisa kwandiri.”
21 Perapo Izaki wakavhunja Jakobe kuti: “Ndapota, khwederai kuno kuti ndikubate-bate mwana wangu, ndizive kuti ndiwedi mwana wangu Izau kana kuti andiwepi.”
22 Ngo kudaro, Jakobe wakakhwederera babake Izaki vomubata-bata. Pasure pazvo vakati: “Izwi iri ndha Jakobe. Asi nyara iji nja Izau.”
23 Jakobe aazivi kumuziva ngokuti mukono jake jainga no mavhiri inga ja Izau. Ngo kudaro, iyena wakamukomborera.
24 Pasure pazvo, iyena wakamuvhunjisa kuti: “Ndiwedi kamare mwana wangu Izau?” Iyena wakadavira kuti: “Ndini!”
25 Perapo wakati: “Ndiviisirei nyama yawanyangaro kuti ndiihe mwana wangu. Perapo ndinozokukomborera.” Iyena wakamuviisira, woha. Womuviisira vhinyu, womwa.
26 Perapo Babake vakati: “Ndapota khwederai kuno mwanangu, undibhejhari.”
27 Ngo kudaro, iyena wakamukhwederera womubhejhari. Iyena wakanuhija nguvo jake perapo womukomborera eciti:
“Kunuhira ko mwana wangu kwakaezana no munda wakakomborehwa ndi Jehovha.
28 Mwari wo cokwadi ngaakupe mbhute yo kumatenga, mavhu ano ndimo, zvokuha zvakawanda no vhinyu imbza.
29 Vandhu ngavakushandire. Majinja ngaakugwadamire. Ivai mambo wo hama jako. Vana va mai wako ngavakugwadamire. Ngaatukwe mundhu wese anokutuka. Ngaakomborehwe mundhu wese anokukomborera.”
30 Izaki paakandopera kukomborera Jakobe, Jakobe wovha pamberi pa baba wake ngo kukasika, Izau nevanji vake vakagumavo kuvha konyanga.
31 Iyena wakabika zvinonaka wozviendesa ka babake. Perapo wakavhunja babake kuti: “Baba mukanyi muhe nyama yandanyanga inini mwana wenyu kuti mundikomborere.”
32 Babake vakamuvhunjisa kuti: “Ndiwe ani?” Iyena wakadavira kuti: “Ndini Izau, mwana wenyu wo dangwe.”
33 Izaki wakatanga kundhyandhya eciti: “Waro ndiyani waenda kovhima nyama woviya kuzondipekeja? Inini ndapera kuha iwewe ucito waguma, ndomukomborera. Iyena anozovadi kamare wakakomborehwa!”
34 Izau paakazwa masoko a babake, iyena wakatanga kucema* ngo izwi guru kamare ecivhunja babake kudari: “Ndikomborerenyivo! Ndikomborerenyivo babangu!”
35 Asi Izaki wakati: “Munukuna wako wandicengejera. Wowana makomborero awaidaya kuwana iwewe.”
36 Ngo kudaro, Izau wakati: “Anorazawe yo kupuwa zina rokuti Jakobe.* Ngokuti iyena wanditorera kaviri cigaro cangu. Pakutanga wakanditorera utangwe hwangu. Wari wanditorerazve makomborero angu!” Wakaengejerazve eciti: “Baba amungandikomborerivo henyu?”
37 Asi Izaki wakadavira Izau kudari: “Inini ndakamuita mambo wako. Ndakamuita kuti ave patarau wo hama jake. Ndakamupekeja zvokuha no vhinyu imbza kuti ashandise. Ndasarazve nenyi kuti ndikupekeje mwana wangu?”
38 Izau wakavhunja babake kudari: “Muno makomborero amwe basi baba? Ndikomborerenyivo! Ndikomborerenyivo babangu!” Paakananga izvi, Izau wakacema* ngo izwi guru, wobuda musoji.
39 Ngo kudaro, Izaki babake vakamudavira kuti:
“Izwai, iwewe unozogara ndhambo no mavhu ano ndimo. Ndhambo no mbhute yo kudenga.
40 Unozopona ngo banga rako. Unozoshandira hama yako. Paunozoremba unozogura kanga yake mu musipa mako.”
41 Asi Izau wakaitira bundu Jakobe ngo ndava yo makomborero aakapuwa ndi Babake. Izau waindonanga mu mwoyo make kuti: “Mazuva o kufa ka babangu aaphedo. Vakafa ndinozourayavo hama yangu Jakobe.”
42 Rabheka paakazwa zvakananga mwana wake womukuru Izau, wakadanijisa mwana wake wo mudoko Jakobe womuvhunja kuti: “Izwai! Nevanji vako vari kukuitira zano ro kuda kukuhwirijira ngo kukuuraya.
43 Waro mwana wangu, itai zvandiri kukuvhunjari. Mukai, utizire Harani ka nevanji wangu Rabhani.
44 Garai navo pa mukuvo wakati kuti mbhera ushungu hwa nevanji wako huthuruke.
45 Gareyo mbhera ushungu hwa nevanji wako kwauri hupere, vakanganwe zvawavaitirari. Perapo inini ndinozokudanijisa. Ndingaruzirenyi movaviri njiku yondhoyo?”
46 Pasure pazvo Rabheka wakaenda kovhunja Izaki kuti: “Ndiri kunyenya upenyu hwangu ngo ndava yo vana va Hiti. Kudari Jakobe akarovora umwe wo vana va Hiti, vakaezanaya no vana vo munyika iyi, zviri nane kufa hangu!”
Masoko o Pasi
^ Mukono wo mbuji kana mbuji yorume.
^ Mukono wo mbhuji kana mbuji yorume.
^ Kana: “jakanyara.”
^ Mukono wo mbhuji kana mbuji yorume.
^ Kana: “kurira.”
^ Zina iri rinoreva kuti, “Anotorera Cigaro.”
^ Kana: “wakarira.”
