Genesisi 37:1-36
37 Jakobe wakaenderera mberi ecigara ku nyika yo Khanani, kwaigaraya babake vari mu nyikanja.
2 Zvakaitika mu upenyu hwa Jakobe nga izvi:
Josefa paainga no makore 17, iyena waihavisa mavhuta no vana va Bhiriha pomwe no vana va Ziripa, vakaji va babake. Josefa wakavhunja babake masoko akashata ngo pamusoro pavo.
3 Iziraeri waida maningi Josefa kupinda vana vese, ngokuti wainga mwana waakabara paainga waamusharuka. Iyena wakaitihwa nguvo yakaseja* maningi.
4 Majinevanji ake paakavona kuti iyena waidika maningi ndi baba wavo kupinda vana vese, ivona vakatanga kumunyenya. Avacaikwanisepi kubhuya naye zvaushoni.
5 Pa kufamba ko mukuvo, Josefa wakarota hope wojivhunja majinevanji ake, vowanazve thangwe rimweni ro kumunyenya ndirona.
6 Iyena wakati: “Ndapota, izwanyi hope jandakarota.
7 Ndakarota tecisunga mutoro jo mbeu pakati po munda. Mutoro wangu wakamuka woima, mutoro jenyu jakatendeneja mutoro wangu jougwadamira”.
8 Majinevanji ake akananga kudari: “Iwewe unoda kujiitadi mambo wedu no kuzotitonga?” Ivona vakawanazve thangwe rimweni ro kumunyenya ndirona ngo ndava yo hope jake no zvaakanangaro.
9 Pasure pazvo, wakarotazve hope jimweni, wojivhunja majinevanji ake kuti: “Ndarotazve hope jimweni. Vhaza iyi, zuva no mweji no ndhondho 11, zvakandigwadamira.”
10 Perapo wakaenda kojivhunja babake, majinevanji ake aripovo. Babake vakamuvereketera veciti: “Hope jawarotaro jiri kuda kunangenyi? Kureva kuti inini na mai wako no majinevanji ako tinozoza kwauri tokugwadamira?”
11 Majinevanji ake akamuitira ushanje* asi babake vakaviga mu mwoyo zvaakanangaro.
12 Majinevanji ake akaenda ko havisa mavhuta a baba wavo phedo no Shekemi.
13 Iziraeri wakazovhunja Josefa kuti: “Majinevanji ako aaripi kuhavisa mavhuta phedo no Shekemi? Viyai kuno ndinoda kukutuma kuti uende kwavari.” Iyena wakati: “Zvakanaka ndinoenda!”
14 Babake vakamuvhunja kudari: “Ndapota, endai wovona dangani majinevanji ako ari ushoni. Uvonezve kuti mushambi wakadini, undiviisire masoko.” Ngo kudaro, wakamutuma kuvha ku muterero wo Hebheroni woenda Shekemi.
15 Pa kufamba ko nguva iyena wakasongana no mwanarume waifamba mu bani. Mwanarume wiya wakamuvhunjisa kudari: “Uri kupsangenyi?”
16 Iyena wakamudavira kudari: “Ndiri kupsaka majinevanji angu. Ndivhunjenyi, ari kuhavisira kwapi mavhuta?”
17 Mwanarume wiya wakamudavira kuti: “Ivona vavha pano, ndavazwa vecinanga kuti ‘ngatipinde Dhotani.’” Ngo kudaro, Josefa wakatevera majinevanji ake, wovawana Dhotani.
18 Ivona vakamuvona ngo ndhambo, acito aguma kwavaingaro, ivona vakatanga kuita mazano o kumuuraya.
19 Ivona vakavhunjana ngo cavo kudari: “Vonanyi! Ari kuviya muroti wiya!
20 Viyanyi timuuraye timuwisire mu mwimbo,* tinange kuti iyena warumwa ngo cinyama co musora. Kuti tivone kuti zvicinyi zvinozoitika no hope jake jiya.”
21 Rubheni paakazvizwa, wakapsaka kumuponesa. Wonanga kudari: “Ticadomuuraya.”
22 Rubheni wakati: “Mucamuuraya. Ngatimuwisire mu mwimbo uwu* mu zvipare muno. Asi ticamukhuvaza.” Cinangwa ca Rubheni cainga cokumuponesa, kuti amuhwirije ka babake.
23 Ngo kudaro, Josefa paakaguma, hama jake jakavhura nguvo yake yaiseja* maningi yaaisimira.
24 Ivona vakamubata vomuwisira mu mwimbo.* Ngari yondhoyo mainga mucina kumwa.
25 Perapo vakagara pasi kuti vahe. Pavakamusa majiso vakavona dungwa ro Vaishimaeri vecivha Giriyadhi. Kamera javo jaithwara ngeji* jinonuhira, bharsamo no mapande anobudisa ngeji. Ivona vaiyenda Ejipita.
26 Judha wakavhunjisa hama jake kuti: “Tinozowanenyi kudari tikauraya hama yedu, tofushira ngazi yake?
27 Wari ngatimutengesere Vaishimaeri. Asi ticadomuitira zvakashata ngokuti iyena ihama yedu. Tiri wo ukama hwondhohwo.” Ngo kudaro, ivona vakazwa zvakanangari hama yavo.
28 Vatengesi vo Midhiyani pavaikhirira, hama ja Josefa jakamuvhisa mu mwimbo miya* jomutengesera Vaishimaeri ngo 20 o mangwenjere o sirivha. Vanarume ava vakamutora vopinda naye Ejipita.
29 Pa kufamba ko nguva, Rubheni paakaviya pa mwimbo* wovona kuti Josefa aacaingemo, iyena wakamwesa nguvo jake.
30 Paakahwirira ku hama jake wakati: “Mufana wiya wangara-ngara. Ndodini wari?”
31 Ngo kudaro vakauraya goto-goto votora nguvo ya Josefa voibija mu ngazimo.
32 Perapo vakatumira nguvo yokuseja* iya kuna baba wavo no masoko aya: “Tawana nguvo iyi. Ivonenyi dangani ngo yo mwana wenyu.”
33 Jakobe wakairingisa woti: “Inguvo yo mwana wangu! Zvingaita kuti iyena warumwa ngo cinyama co musora. Kunasa kunanga, Josefa wahiwa ngo cinyama!”*
34 Ngo kudaro, Jakobe wakamwesa nguvo jake, wosunga saku* mu cihunu.* Iyena wakapeja njiku jakawanda ecicema* mwana wake.
35 Vana vake vese vorume no vokaji, vaieja kumunyaraja. Asi iyena wairamba kunyarajwa ecinanga kuti: “Ndinoenda mu Guva* ndecindocema* mwana wangu basi!” Iyena waindoenderera mberi ecicema* mwana wake.
36 Vamidhiyani vakaenda ko mutengesera ku Ejipita kuna Potifari muranda wa Faro, mutugamiriri wo vangwariri va mambo
Masoko o Pasi
^ kana: “yakanyara.”
^ Kana: “usanje.”
^ Kana: “dima; sime.”
^ Kana: “dima iri; sime iri.”
^ Kana: “yainyara.”
^ Kana: “dima; sime.”
^ Mukhaindi umweni wo ngeji jaishandiswa inga phurufumi mu nguva jo Bhaibheri.
^ Kana: “dima riya; sime riya.”
^ Kana: “dima; sime.”
^ Kana: “yokunyara.”
^ Kana: “cikara.”
^ Kana: “sako.”
^ Vonanyi Kudurujihwa ko Magama.
^ Kana: “acirira.”
^ Kana: “Sheori.” Kana kuti, kufa kunoita vandhu vese. Vonanyi Kudurujihwa ko Magama.
^ Kana: “ndicindorira.”
^ Kana: “acirira.”
