Mateu 18:1-35
18 Pa nguva yondhoyo vajiji va Jesu vakamukhwederera vomuvhunjisa kudari: “Ndiyani mukuru mu Umambo hwo kumatenga?”
2 Ngo kudaro, iyena wakadanija mwana mudoko womuimisa pakati pavo
3 wovavhunja kuti: “Ndinomuvhunja zvokadi kuti, mukatama kutendeuka* moita inga mwana mudoko, amuzonghwini mu Umambo hwo kumatenga.”
4 Ngokuti wiya anojidodokesa inga mwana mudoko uwu, ndiyena mukuru mu Umambo hwo kumatenga;
5 wiya anoashira mwana mudoko wakadari ngo ndava yo zina rangu, anondiashiravo.
6 Asi wiya anokhugunyisa umwe wo vana ava vanonditenda, anodikana kusungihwa gwiyo rinosikiswaya ngo mbongoyo mu musipa mwake, perepo wondondomejwa pakati po jombe.
7 “Nyatwa kuno vandhu vo nyika ino, ngokuti vanowisa vamweni. Zvokadi kunozova no vandhu vakadaro, asi nyatwa kovari.
8 Kudari nyara yako kana soka yako ikakukhugunyisa, itemei uisveje. Zviri nane kuwana upenyu nowakaremara kana ucithobinya kuciripi kukhandihwa mu muriro ucikaperi no nyara mbiri kana soka mbiri.
9 Kudari jiso rako rikakuitisa zvakashata, rivhisei urisveje ndhambo. Ngokuti zviri nane kuwana upenyu uno jiso rimwe kuciripi kukhandihwa no majiso maviri mu Gehena* rinobwaka.
10 Bhasopanyi kuti mutame kurerusa umwe wo vana vadoko ava, ngokuti ndinomuvhunja kuti ngirozi javo jiri kudenga, nguva jese jiri kusota mu meso ma Baba wangu vari kudenga.
11 *——
12 “Munorangarirenyi? Kudari mundhu ano zana* ro mavhuta, rimwe rawo rosvejeka, aasiyi makumapfumbamwe na mapfumbamwe pa dundhu, woenda koopsaka vhuta rimwe rasvejekaya?
13 Inini ndinomuvhunja kuti, akambhera ngo kuriwana anodakara maningi ndirona kupinda makumapfumbamwe na mapfumbamwe acikazivi kusvejeka.
14 Mukufananavo, asipi kuda ka Baba wangu* vari kudenga kuti umwe wo vana vadoko ava asvejeke.
15 “Kudari hama yako ikakushaishira, endai wooivhunja* no muri movaviri. Kudari ikakuzwira, unonga waihwirija mu gwanja rakanaka.
16 Kudari ikatama kukuzwira, torai mundhu umwe kana vaviri, kuti ucapupu hunoitwa ngo vandhu vaviri kana vatatu, hunase kujekesa shwiroyo.
17 Kudari ikatama kuvazwira, vhunjai ungano. Kudari ikatamazve kuzwira ungano, ivonei inga mundhu wo majinja no mushabisi.
18 “Ndinomuvhunja zvokadi kuti: Zvese zvamunosunga pasi pano, zvinonga zvasungwa kudenga, zvese zvamunosujunura pasi pano, zvinongavo zvasujunuhwa kudenga.
19 Ndinomuvhunjazve kuti: Kudari vandhu vaviri pasi pano vakazwirana ciri cese cinosisira cavanodikana kukumbira, cinozovaitikira ngo ndava ya Baba wangu vari kudenga.
20 Ngokuti panonga pano vandhu vaviri kana vatatu vakaungana ngo zina rangu, inini ndinonga ndiripovo.”
21 Pedhru wakakhwederera Jesu womuvhunjisa kuti: “Mambo, kudari hama yangu ikandishaishira ndinodikana kuiregerera kangana? Kanomwe here?”
22 Jesu wakamuvhunja kuti: “Ndinokuvhunja kuti, haiwa kanomwe asi mbhera makumanomwe na runomwe.
23 “Ngo kudaro, Umambo hwo kumatenga hungaezaniswa na mambo anoda kuti varanda vake vapagari magava avo.
24 Paakatanga kuvakhumbusa, painga no umwe wavo wainga akamufiari gumi ro zviuru* zvo matarenta.*
25 Zvecivoneka kuti, iyena aacainga no manera okupagari, mambo wake wakamuvhunja kuti atengese mukaji wake, vana no zvese zvaainga nazvo kuti apagari.
26 Ngo kudaro, muranda wakamugwadamira eciti: ‘Ndipenyi mukuvo, ndinozomupagari zvese.’
27 Ngo pena, mambo wo muranda uwu, wakamuregerera magava ake, womusiya kuti apinde.
28 Asi muranda wiya wakapinda, woenda koopsaka muranda doni wake wainga akamufiari zana* ro madhenariyo,* womutikinya, eciti: ‘Pagarii magava angu.’
29 Muranda doni wake wakamugwadamira, womudeketerera eciti: ‘Ndipenyi mukuvo, ndinopagari.’
30 Asi, iyena aazivi kutendera, wakamuendesa mukadheya mbhera apeje kupagari magava ake.
31 Varanda doni vamweni pavakavona zvakaitika, vakanyangajwa maningi ndizvona, voenda koozvisumurira mambo.
32 Mambo wake wakamudanijisa, womuvhunja kuti: ‘Muranda wakashata, inini ndakakuregerera magava, pawakandideketerera.
33 Waro iwewe watamavo ngenyi kuitira unyasha muranda doni wako inga zvandakakuitiraya?’
34 Mambo wake wakanyangajwa maningi ndizvona, womuendesa mu kadheya* mbhera apeje kupagari magava ese.
35 Baba wangu vo kumatenga vanozomuitiravo zvondhozvo kudari mukatama kuregerera hama yenyu ngo mwoyo wese.”
Masoko o Pasi
^ Kana: “kucinja.”
^ Vonanyi Kudurujihwa ko Magama.
^ Vonanyi masoko o pasi ari pana Mateu 17:21.
^ 100.
^ Kangaije: “wenyu.”
^ Gama ngo Gama: “wooipangira.”
^ 10.000.
^ 10.000 zvo matarenta o sirivha zvinoezana no 60.000.000 o madhenari.
^ 100.
^ Zingwenjere ro Ciroma rairema mutengo wo 3,85g, raidanijwa kuti dhenariyo.
^ Gama ngo Gama: “nyara jo vangwariri vo kadheya.”
