Mazwi Akangwara 20:1-30
20 Vhinyu inoitisa kuti mundhu ashore,Doro rinoungwisa mundhu,
Mundhu anosvejeka ngo ndava yazvo, asipi muzivi.
2 Kuthya kwa mambo, kwakadari inga kubhonga kunoita mbhondoro,Mundhu anomuambira,* anodira upenyu hwake pa ngozi.
3 Mundhu acikanghwiniri pa kunesana, anokujwa,Asi benji ririrese, rinozvinghwinira.
4 Mundhu ano umbwa,* aarimi mu nguva yokutondhora,Ngo kudaro, anofamba ecikumbira pa nguva yo kukotora
Ngokuti iyena aana ciro.
5 Murangariro jo mwoyo wo mundhu, jakadari inga kumwa yakajika,Asi mundhu ano ungwaru, anokwanisa kujikweva jobuda kunja.
6 Vandhu vazinji vanonanga kuti vano rudo hucikacinji,Asi ndiyani anokwanisa kuwana mundhu wakagondeka?
7 Mundhu wakanaka, ari kufamba mukugondeka kwake,
Vanodakara vana vanobahwa pasure pake.
8 Mambo paanonga akagara pacigaro cake kuti atonge,Anopeja vandhu vese vakashata ngo majiso ake.
9 Ndiyani angananga kuti:“Ndacenesa mwoyo wangu, andicinazve cishaishi”?
10 Mapuwe okupima ndiwona okucengejera,No mupimo wokunyepa, zvinonyenywa ndi Jehovha.
11 Pikija mwana, anokhombija zvaari ngo zviito zvake,Dangani mufambiro wake wakanaka kana wakacena.
12 Njeve inozwa no jiso rinovona,Zvese zvakaithwa ndi Jehovha.
13 Ucadisisa maningi kuvata,
Ngokuti unozova murombo,
Funungurai majiso ako,
Ukadaro unozova no zvokuha zvakawanda.
14 Mutengi anoti: “Azvizivi kunaka, azvizivi kunaka!”Ngo kudaro, anopinda ojikuja ngo nyagoso yaaiita.
15 Kuno goridhi no mapuwe akawanda o mutengo mukuru,Asi muromo unovereketa zvo uzivi, unosisira maningi.
16 Torai nguvo jo mundhu anotendera kuti mundhu umweni, waucikazivi, akufiyari ngo zina rake,Kudari akatendera kuti mwanakaji waucikazivi akufiyari ngo zina rake, mutorerei ciro inga cibatiso.
17 Zvokuha zvinowanika munjira yo kunyepa,Zvinodakajisa mundhu,
Asi pakupejisira, muromo wake unozozara ngo musanga.
18 Mazano anobuda ushoni kudari pakava no kubhuisana,Ihwai hondo yako ngo kutungamirihwa ngo mundhu anonasa kuziva.
19 Murevi, anondhandhanisa zviro zvakafisika,Ucabatana no mundhu anodakarira kureva* vamweni.
20 Mundhu anotuka baba na mai wake,Rujhu yake inozojima kudari pakaguma cidima.
21 Upfumi hunotanga kuwanika ngo njira yakashata,Pakupejisira ahuzokomborehwi.
22 Ucadonanga kuti: “Ndinoda kumuhwirijira!”
Imirai Jehovha, iyena anozokuponesa.
23 Mapuwe okupima ndiwona okucengejera,Anonyenywa ndi Jehovha.
Mupimo unocengeja, auzivi kunaka.
24 Mudanyu jo mundhu, jinotungamirihwa* ndi Jehovha,Waro zvingaitisa kudini mundhu azwisise gwanja raanodikana kufamba?
25 Zvinoendesa ku murau* kudari mundhu akavhisa ciro
“Wocipira Mwari” acizivi kunasa kurangarira,
Perepo wozorangarira ngo mbhiko yaakaita.
26 Mambo wakangwara, anouruja vakashataWofambisa panyezuru pavo, rodha rokupura ndirona.
27 Mwiha unofemiwa ngo mundhu,Irujhu kuna Jehovha
Kuti ivonese zviri mukati-kati mo mundhu.
28 Rudo hucikacinji no kugondeka,Zvinojivirira mambo,
Ngo ndava yo rudo uhu, iyena anocijikira cigaro cake.
29 Majaha anokujwa ngo simba rawoKuseja* ko vasharuka, ivhuji ravo rakacena.
30 Kukuzvuka no zvivonje, zvinotibesera kuti tisiye zvakashata,Kutakwa kunoita kuti mundhu acene ngo mukati-kati.
Masoko o Pasi
^ Kana: “anomuphera.”
^ Kana: “ano nungo.”
^ Kana: “anocengejwa ngo muromo.”
^ Kana: “Madazo o mundhu, anotungamirihwa.”
^ Kana: “muravo.”
^ Kana: “Kunyara.”
