Mazwi Akangwara 27:1-27
27 Ucabhumba ngo njiku yamangwana,Ngokuti iwewe auzvizivi zvinoitika njiku imwe na imwe.
2 Simbhwai ngo vandhu vamweni, kuciripi kujisimba wega,Vandhu vamweni ngavaite zvondhozvo
Kuciripi ngo muromo wako.
3 Buwe, rinorema.Musanga, unoremavo.
Asi kunyangajiswa ngo benji,
Zvinorema maningi kupinda zvese izvi zvo zviviri.
4 Ciki, jakashata.Kuveni ushungu, hwakadari inga kuzara ko kumwa.
Asi ndiyani angakwanisa kucungirira thima?
5 Kupangira mundhu pambhene, kuri nane maningi
Kupinda kumuda, wotama kukhombija kuti unomuda.
6 Zvivonje zvinobudiswa ngo shamwari, zvakanaka maningi,Asi mabhejhu o mundhu wakashata, akawanda maningi.
7 Mundhu wakaguta, anoramba* mabembhe o uci,Asi mundhu ano njara, pikija zviro zvinovava, anonakihwa ndizvona.
8 Mundhu anotiza pamuzi pake,Wakadari inga shiri inotiza musaki yayo.
9 Mafuta no rubani, zvinodakajisa mwoyo,Ndizvonavo zvinoita ushamwari hwakanaka hunovha pakupuwa mbhangiro ngo mwoyo wese.
10 Ucasiya shamwari yako kana shamwari ya baba wako,Ucaenda kanyi ko hama yako;Zviri nane kwenda kanyi ka vhizinyu ari phedo, kuciripi kwenda ku hama iri ndhambo.
11 Ivai wakangwara mwana wangu,Dakajisai mwoyo wangu, kuti ndikwanise kudavira wiya anondishora.
12 Mundhu wakangwara, anovona zvakashata wofindara,*Asi mapenji, anoenderera mberi osongana no matambujiko.
13 Torai nguvo jo mundhu anotendera kuti mundhu umweni, waucikazivi, akufiyari ngo zina rake.Kudari akatendera kuti mwanakaji waucikazivi akufiyari ngo zina rake, mutorerei ciro inga cibatiso.
14 Kudari mundhu akacungamija* mudoni wake ngo izwi guru comangwanani,Mudoni wake, anozvivona inga zviro zvakashata.*
15 Mukaji anonesa,* wakadari inga madondhoji o nvura anogara ecidondha pa njiku yo nvura.
16 Anokwanisa kumuviga, anokwanisavo kuviga mbhepo.Iyena anokwanisazve kubata mafuta ngo nyara yake yo muho.
17 Kudari inga simbi inoroja simbi imweni,Mundhu, anoroja shamwari yake.
18 Mundhu anotaja mufigu wake, anozoha mucero yawo.Anotaja patarau wake, anozokujwa.
19 Kudari inga kumwa inovonesa kumeso ko mundhu,Mwoyo wo mundhu, unovonesavo zvakaita mwoyo wo mundhu umweni.
20 Guva no ndau inovorera muviri wo mundhu,* azviguti,Ndizvonavo zvinoita no majiso o mundhu, aagutivo.
21 Kudari inga sirivha inonasiririhwa mu cikari co kunasirira,No goridhi, rinonasiririhwa mu coto co kunyungurusa,
Mundhu anoejwa ngo kusimbhwa kwaanoithwa.
22 Pikija ukashokota* benji mu duri inga mbeu,Upenji hwaro ahuzorisiyi.
23 Iwewe unodikana kunasa kuziva ushoni
Magarire o mushambi wako,
Tajai ushoni mavhuta ako.
24 Upfumi, ahugari kwenda no kwenda,Nee korowa, aigari mbhera kumubarihwana wese.
25 Sora vishi rinopera, romerazve sora rimweni,Zvinomera mu matundhu, zvinounganijwa.
26 Mavhuta, anokupekeja nguvo,Makotokoto, anoshandiswa pa kutenga munda.
27 Unozovazve no mukaka wakawanda wo* mbuji kuti uhe,Kuti uhise vo pamuzi pako no kusapota vashandiri vako vokaji.
Masoko o Pasi
^ Gama ngo Gama: “anocika.”
^ Kana: “wovanda.”
^ Gama ngo Gama: “akakomborera.”
^ Gama ngo Gama: “inga cituko.”
^ Kana: “anon’gun’guta.”
^ Kana: “Sheori no Abhadhoni.”
^ Kana: “ukasokora.”
^ Kana: “no mahe akawanda o.”
