Mucumaeri 1:1-18
1 Masoko o mujijisi,* mwana wa Dhavhidhi uwo wainga mambo wo Jerusarema.
2 Mujijisi anonanga kudari: “Zviro zvicikabeseri kamare!”“Zviro zvicikabeseri kamare! Zviro zvese azvina zvazvinobesera!”
3 Mundhu anowanenyi ngo kushanda ngo simba kwaanoita pa basa rakeRaanovangisira kuti ariite pa nyika?*
4 Mubarihwana umwe unopinda, mubarihwana umweni unoviya,Asi nyika inogara iripo mbhera narini.
5 Zuva rinobuda, zuva rinovira;Perepo rinohwirira ngo kukasika ku ndau yaro kuti ribudezve nga papsa.
6 Mbhepo inoenda kakusi, yotenderera yecienda kanjikazi;Iyona inotenderera, yoenderera mberi yecitenderera; mbhepo inoenderera mberi yecitenderera.
7 Kumwa yo murambo jese inopopoma kwenda mu jombe, pikija zvakadaro, jombe arizari.
Kumwa yo murambo inohwirira ku ndau kwayakavha, kuti itangezve kupopoma.
8 Zviro zvese zvinorembesa;Apana angatokwanisa kubhuya ngo pamusoro pazvo.
Jiso ariguti ngo zvarinovona;Nee njeve aiguti ngo zvainozwa.
9 Zviro zvainga zviripo ndizvona zvinozovepozve,Zviro zvakamboithwa ndizvona zvinozoithwazve;Apana ciro cipsa pa nyika.*
10 Kureva kuti pano ciro cinganangwa kuti: “Vonanyi, ciro ici cipsa?”
Zvese zvainga zviriyo kuvhira kare no kare;Izvona zvainga zviriyo ticito tabahwa.
11 Apana mundhu acaceukija vandhu vakapona kare;Apana mundhu anozoceukija vandhu vanozopona sure kwavo.Pikija ivona avazoceukijwi ngo vandhu vanozopona sure kwavo.
12 Inini mujijisi, ndiri mambo wo Vaiziraeri mu Jerusarema.
13 Ndakaenderera mberi ndecijija no kupsakisisa ngo uzivi zviro zvese zvakaizwa pasi po matenga. Mwari wakapa basa rinonesa vana vo vandhu kuti vaenderere mberi vakabatikana.
14 Inini ndakavona zviro zvese zvinoizwa pa nyika,*Ndoguma pa mbhejiso yokuti zvese azvibesi, ikugogomera mbhepo.
15 Azvikwanisiki kurungamisa ciro cakagombama,Azvikwanisiki kuverenga ciro ciri kucota.
16 Ngo kudaro, inini ndakati ngo mu mwoyo mwangu: “Zvokadi, inini ndakawana uzivi wakawanda, kupinda mundhu ari wese wakavepo mu Jerusarema inini ndicito ndabahwa, mwoyo wangu wakawana uzivi wakawanda maningi no zivo.”
17 Inini ndakavangisira maningi kuti ndizive uzivi, ndizive upenji no kuziva urethe, zviro izvivo ikugogomera mbhepo.
18 Ngokuti uzivi wakawanda unoviisavo kutambujika kukuru,Ngo kudaro, wiya anoengejera zivo yake, anoengejeravo kuhwajihwa kwake.
Masoko o Pasi
^ Mucihebheru gama iri rinonangira mundhu anounganija vandhu.
^ Gama ngo Gama: “pasi po zuva.”
^ Gama ngo Gama: “pasi po zuva.”
^ Gama ngo Gama: “pasi po zuva.”
