Nduyo 66:1-20
Ku mutungamiriri. Ndumbo.
66 Imwimwi vandhu vo panyika, khuwanyi ngo kudakara no kusimba Mwari.
2 Imbiranyi zina rake rinokujwa, ndumbo jo kumusimba.
Mukujenyi no kumusimba.
3 Vhunjanyi Mwari kudari: “Zviito zvenyu zvinoshamaisa!
Ngo ndava yo simba renyu rakakura,Vavengi venyu vanozotetemera ngo kuthya pamberi penyu.
4 Vandhu vese vo panyika vanozogwadama pamberi penyu;Vozomuimbira ndumbo jo kumusimba.Ivona vanozoimba ndumbo jokusimba zina renyu.” (Sera)
5 Viyanyi muvone mabasa a Mwari.
Zvaanoitira vana vo vandhu zvinoshamaisa.
6 Iyena wakacinja jombe, rova nyika yakaoma;Ivona vakaambuka murambo ngo soka.
Takadakara ngo zvaakatiitira pondhopo.
7 Iyena anotonga mbhera narini ngo simba rake.
Majiso ake anogara akasota majinja.
Vaya vakaoma musoro avadikani kuzvikuja pacavo. (Sera)
8 Simbanyi Mwari wedu imwimwi vandhu,Itanyi kuti izwi ro kumusimba, rizike.
9 Iyena anongwarira upenyu hwedu;Iyena aatenderi kuti soka jedu jikhugunywe.
10 Mwari wedu, imwimwi makatipopora;Ngo kudaro, makatisefa inga sirivha, imwimwi makatisefa.
11 Imwimwi makatibata ngo cimaricera cenyu;*Makatithwarisa mutoro unorema.
12 Imwimwi makatendera kuti vandhu vacike-cike musoro jedu;Tosongana no matambujiko toita inga tapindiswa ngo pamuriro no mukumwa;Asi imwimwi makativiisa ku ndau yokuzorora.
13 Ndinozonghwina mu nyumba yenyu ndino zvipo zvokupiswa;Ndinozokwanirisa mbhiko jondakamuitira
14 Zviya zvandakagondesa ngo muromo wangu,Na zviya zvandakavereketa ngo muromo wangu pandainga ndecitambujika.
15 Ndinozomupa zvipo zvokupiswa zvo zvinyama zvakapundaNo usi wo mupiro wo mavhuta orume.
Ndinozomupa n’gombe jorume no maphongo.* (Sera)
16 Imwimwi mwese munothya Mwari, viyanyi muzwe,Inini ndinozomuverengera zvaakandiitira.
17 Ndakamudaninja ngo muromo wangu,Ndomukuja ngo rurumi hwangu.
18 Kudari nokwainga kuti ndakaviga zviro zvakashata mu mwoyo mwangu,Jehovha aacaizondizwepi.
19 Asi Mwari wakandizwa;Iyena wakanasa kuteya njeve ku mukumbiro wangu.
20 Ngaasimbwe Mwari ngokuti iyena aazivi kuramba mukumbiro wanguNee aazivi kundinyima rudo hwake hucikacinji.
