Vahebheru 5:1-14
5 Mupiri mukuru wese anosanwa pakati po vandhu, anogajwa kuti avaimirire pa zviro zvo Umwari, kuti aite cipo no mupiro ngo ndava yo zvishaishi.
2 Iyena anokwanisa kuitira unyasha vandhu vacina cavanoziva no vanoshaisha, ngokuti iyena anohwisanavo no kuremba kwake.
3 Ngo ndava yazvo, iyena anodikana kuita zvipo ngo pamusoro po zvishaishi zvake, inga zvaanoitira vandhu vamweni.
4 Akuna mundhu anoashira kukujwa uku ngo kuda kwake, anokuwana kudari akadanijwa ndi Mwari, inga zvakaithwa Aroni.
5 Ngo maitiro ondhowo, Kristu aazivi kujikuja ega ecijiita mupiri mukuru, asi wakakujwa nga Wiya wakamuvhunja kuti: “Iwewe uri mwanangu; nyamasi inini ndava babako.”
6 Inga zvaakanangazve kuti: “Iwewe uri mupiri mbhera narini inga zvakaita Merekizedheki.”
7 Kristu paainga pasi pano, waikumbira ecideketera no kukhuwa ecibuda musoji kuna Wiya waikwanisa kumuponesa mu rufu. Asi iyena wakapurukihwa ngokuti waithya Mwari.
8 Pikija iyena wainga mwana, wakajija kuzwira ngo matambujiko aakasongana nawo.
9 Pasure po kuithwa wakakwana, iyena wakava mutungamiriri wo vandhu vese vanomuzwira kuti vapone no kucikaperi.
10 Iyena wakagajwa ndi Mwari kuti ave mupiri mukuru inga zvakaita Merekizedheki.
11 Itusu tino zvakawanda zvo kubhuya ngo pamusoro pake, asi zvinonesa kuzvisanangura, ngokuti imwimwi mava munonesa kuzwisisa.
12 Ngokuti wari imwimwi maifanera kuva vajijisi, asi muciri kutoda kuti mundhu umweni atange kumujijisa zviro zvokutanga zvo masoko akacena a Mwari, asi imwimwi mahwirira sure, mecida kumwazve mukaka,* haiwa zvokuha zvakavanga.
13 Mundhu wese anoenderera mberi ecimwa mukaka* aazivi soko ro ururami, ngokuti iyena aciri mwana mudoko.
14 Zvokuha zvakavanga ngo zvo vandhu vakura, vaya vanoita kuti simba ravo ro kuzwisisa rijijiswe kusiyanisa zvakanaka no zvakashata pavanonga vecirishandisa.
