Varoma 1:1-32
1 Inini Pauro, muranda wa Jesu Kristu ndakadanijwa kuti ndive mupostori. Ndakagajwa kuti ndizivise masoko akanaka anovha kuna Mwari.
2 Mwari wakagondesa kare masoko akanaka aya mu Matahwa akacena ecishandisa vaporofeti vake.
3 Masoko aya, ngo o pamusoro po Mwana wake wainga mubarihwana wa Dhavhidhi.
4 Zviri pambhene kuti iyena ndi Mwana wa Mwari, ngokuti Mwari wakashandisa simba rake ro mujimu mucena kuti amumuse kuvha ko vakafa; iyena kamare Jesu Kristu Mambo wedu.
5 Ecishandisa iyena, Mwari wakatiitira unyasha hucikaezaniswi. Jesu wakandisana kuti ndive mupostori kuti ndibesere vandhu vo majinja ese kuti vave no rutendo, vazwire no kukuja zina rake.
6 Imwimwivo muri pakati po majinja aya akadanijwa kuti ave vateveri va Jesu Kristu.
7 Ndiri kutarira vagari vo Roma vese vakadiwa ndi Mwari kuti vave vandhu vakacena:
Unyasha hucikaezaniswi no runyararo hunovha ka Mwari Baba wedu na Mambo Jesu Kristu ngahuve na imwimwi.
8 Pakutanga, ndinobonga Mwari ndi Jesu Kristu ngo ndava yenyu, ngokuti rutendo huri kubhuiwa mu nyika yese.
9 Ngokuti Mwari wandinoitira basa rakacena ngo mwoyo wangu wese ngo kucumaira masoko akanaka ngo pamusoro po Mwana wake, ndiyena anodiitira ucapupu hwo manangiro andinomuita imwimwi mu mukumbiro jangu ndicikazorori,
10 ndicideketera kuti kudari zvecikwanisika wari, ndizeyo kuzomuvona Mwari akada.
11 Ngokuti ndiri kuda maningi kuvonana na imwimwi kuti ndimupe cipo candinaco co makomborero a Mwari, kuti muvangiswe;
12 kana kuti tivangisane ngo rutendo hwedu, hwenyu no hwangu.
13 Hama, ndinoda kuti muzive kuti kazinji ndaieja kuda kuzeyo kuti ndivone muviyo jo kucumaira kwedu, inga zviri kuitikavo pakati po majinja amweni. Asi ndakaphingwa mbhera wari uno.
14 Inini ndino magava no Vagiriki pamwepo no vonyikanja, kuno vakajijiswa no vacizivi kujijiswa;
15 ndiri kudavo kumutokotesera masoko akanaka ku Roma kwamuriwaro.
16 Inini andipseruki ngo ndava yo masoko akanaka; ngokuti ndiwona simba ra Mwari raanoponesa ndirona vandhu vese vanotenda. Kutangira ku Vajudha, tevere ku Vagiriki.
17 Ngokuti anovonesa ururami hwa Mwari kuno vaya vanotenda, ovangisa rutendo hwavo, inga zvakatahwa kuti: “Asi mururami anozopona ngo ndava yo rutendo.”
18 Mwari kudenga anovonesa ushungu hwake ku vandhu vakashata no vacizivi kururama, vanophinga cokwadi ngo njira yakashata kuti citame kuzivika,
19 ngokuti zviro zvinozivika ngo pamusoro pa Mwari, zvakajeka kwavari, zvecivoneka kuti Mwari wakavavhunja pambhene.
20 Pikija Mwari acikavoneki, kuvhira pakutanga kusikwa ko nyika, vandhu vanokwanisa kuvona simba rake ricingaperi no kuva kwake Mwari, ngokuti vanokwanisa kuzwisisa ngo zviro zvaakasika zvokuti avazonangi kuti aticaizviziva.
21 Ngokuti pikija vaimuziva Mwari, avazivi kumukuja inga Mwari wavo, votama kumubonga. Murangariro yavo yakarangarira zvo urethe no mwoyo javo jicina hwiru jakaita cidima.
22 Pikija vanonanga kuti vari vazivi, vaita marethe,
23 vakacinja rukujo hwa Mwari acingafi* huite ciro cakaezana no muezaniso wo mundhu anofa, shiri, zvinyama zvino murenje murongomuna no zvinogwezva.
24 Mwari wakavaregera veciita zvido zvakashata zvo mwoyo yavo, wovasiya veciita zviro zvicizivi kucena no kuita zviro zvinopseruja muviri yavo.
25 Vakacinja cokwadi ca Mwari ngo manyepo. Kusiyapo kunamata no kuitira basa rakacena Musiki anokujwa mbhera narini, ivona vakaitira zvondhozvo zviro zvakasikwa. Ameni.
26 Ndizvona zvakaitisa kuti Mwari avaregere vacikakwanisi kujibata mu zvidaka-daka zvo vatano. Vakaji vavo vakapinduja maitiro anodikana kuitwa no majimwamuna avo, voita zviro zvicikadikani kuitwa.
27 Ngo maitiro ondhowo, vanarume vavo vakapinduja maitiro o vatano no vakaji vavo, voemurirana ngo cavo, vanarume no vanarume. Ivona vanoita zviro zvinonyoweja voashira nyathwa jinofanera ngo zviito zvavo zvakashata.
28 Zvecivoneka kuti vakavona kuti azvifaneri kuzwira Mwari, iyena wakavaregera vano murangariro wakashata voita zviro zvavacaidikana kuita.
29 Ivona vainga vakazara ngo zviro zvese zvicizivi kururama, zvakashata, kudisisa zviro zvakawanda, vakazara ngo thima, kuuraya, hasha, kucengeja, cido co kutambuja vamweni, kuita magumbu,*
30 kushora kwese, kunyenya Mwari, vacikareremeji vamweni, vanozvikuja, vanozvitundhumaja, vanorura mazano okuita zvakashata ku vamweni, vacikazwiri vabari,
31 vacikazwisisi, vacikaiti zvamunozwirana, vacikadi ukama, vacina usizi.
32 Pikija ivona veciziva mutemo yakarurama ya Mwari, yokuti mundhu wese anoita zviro izvi anofanira kufa, ivona vanondozviita, vecitosimba vaya vanozviitavo.
