Varoma 15:1-33
15 Waro itusu takavangari, tinodikana kubesera vakaremba kuti vacungirire kurembejeka kwavo. Atidikani kuita zvinotidakajisa basi.
2 Umwe nga umwe wedu ngaapsake kudakajisa mudoni wake pa zviro zvakanaka kuti amuvangise.
3 Ngokuti pikija Kristu aazivi kuita zvaimudakajira basi, inga zvakatahwa kuti: “Kutuka ko vandhu vaikutuka ngakuwire inini.”
4 Ngokuti zviro zvese zvakatahwa kare, zvakatahwa kuti zvitijijise, tova no vetero inovha pa kucungirira kwedu no kunyarajwa ngo Matahwa.
5 Mwari anopa kucungirira no nyarajo ngaaite kuti murangariro wenyu uezane no wainga na Kristu Jesu,
6 kuti mukuje Mwari, Baba wa Mambo wedu Jesu Kristu, makabatana no izwi* rimwe.
7 Ngo kudaro, ashirananyi ngocenyu inga zvamakaithwa ndi Kristu kuti Mwari akujwe.
8 Ndinomuvhunja kuti Kristu wakava mushandiri wo vandhu vakasokwa ecikhombija kuti Mwari ngo wokadi, kuti avangise zvigondiso zvakaithwa ndi Mwari ku majicekuru avo,
9 kuti majinja akuje Mwari ngo unyasha hwake. Inga zvakatahwa kuti: “Ngo ndava yazvo ndinozokuziva pambhene pakati po majinja, ndozoimbira zina renyu ndumbo jo kusimba.”
10 Iyena wakanangazve kuti: “Dakaranyi imwimwi majinja ese pamwepo no vandhu vake.”
11 Ngo kudaro iyena wakanangazve kuti: “Majinja ese ngaasimbe Jehovha,* vandhu vese ngavamusimbe.”
12 Isaya wakanangazve kuti: “Kunozova no muji wa Jesi, wiya anozomuka kuti atonge majinja, majinja ese anozomugonda.”
13 Mwari anopa vetero, ngaamupe mudakaro no runyararo ngo kumuthemba kwamunomuita, kuti vetero iwande* ngo simba ro mujimu mucena.
14 Inini ndino cokwadi na imwimwi hama jangu, kuti imwimwi munodakarira kuita zviro zvakanaka, makazara ngo uzivi hwese, munokwanisazve kujijisana ngocenyu.
15 Ngo kudaro, inini ndamutarira ndakasujunuka ngo pamusoro po zviro zvinganani kuti imwimwi muzviceujezve. Ndinoita izvi ngo unyasha hucikaezaniswi hwandakaitihwa ndi Mwari
16 kuti ndive mushandi wa Kristu Jesu pa kubesera vandhu vo majinja. Ndakabatikana ngo basa iri rakacena ro masoko akanaka a Mwari, kuti vandhu vo majinja vave cipo cinotendehwa, cakaceneswa ngo mujimu mucena.
17 Ndino thangwe rokudakara ngo kuva mujiji wa Kristu Jesu no kuita basa ra Mwari.
18 Andingabhuyi ciri cese. Zvandingabhuya basi nga zviya zvakaithwa ndi Kristu ecindishandisa kuti majinja ese azwire, ecishandisa masoko angu no zviito,
19 ngo simba ro zvitatijo no mushamaiso ngo simba ro mujimu wa Mwari. Ngo njira iyi ndakacumaira masoko akanaka ngo pamusoro pa Kristu mu Jerusarema mwese mbhera ku mativi ese o Iririkomu.
20 Cinangwa acicainga cokutokotesa masoko akanaka ku ndau yainga yoozivika zina ra Kristu, kuti nditame kuvaka pakatanga kuvakwa ngo mundhu umweni.
21 Inga zvakatahwa kuti: “Vaya vacizivi kuzwa masoko ngo pamusoro pake vanozomuvona, vaya vacizivi kuzwa vanozozwisisa.”
22 Ndizvona zvakaitisa kuti ndirambiswe ruzinji kuza kuzomuvona.
23 Asi wari andicina ndima icizivi kucumaihwa mu ndharaundha iyi, inini ndaano makore mazinji ndecida kuza kuzomuvona.
24 Ngo kudaro, pandinozoenda Espanya, ndinovetera kuzomuvona mondiperekeja tikapeja mukuvo munganani tiri tese.
25 Asi wari ndinoenda Jerusarema kooshandira hama jiri kondhono.*
26 Hama jo Masedhoniya no Akaya jakapekeja zvajainga nazvo ngo kuita mupiro jokoobesera varombo vainga pakati po hama jiri ku Jerusarema.
27 Zvokadi, ivona vakazviita ngo mwoyo wese ngokuti vainga no magava navo. Kudari vo majinja vakaashira zviro zvavo zvokumujimu, ivona vaidikanavo kuvabesa ngo zviro zvokunyama.
28 Ndikapeja zvandiri kuitari, ndogumisa mupiro iji kwavari, ndinozovha Espanya ndoza kwamuri.
29 Kusiyapo izvo, ndinoziva kuti pandinozoviyeyo, ndicava no makomborero akawanda a Kristu.
30 Ndinomukumbira hama mu zina ra Mambo wedu Jesu Kristu, ngo pamusoro po rudo hunobahwa ngo mujimu, kuti muvangisire pamwepo na inini pa kuita mukumbiro kuna Mwari, ngo pamusoro pangu,
31 kuti ndiponeswe mu nyara jo vandhu vacikatendi vari mu Judheya, kuti cipo candiri kwenda wari naco ku vandhu va Mwari vari mu Jerusarema, vaciashire ushoni.
32 Ngo kudaro, ngokuda ka Mwari, inini ndinoviya kuzomuvona no mudakaro, ndozotondhojwa pamwepo na imwimwi.
33 Mwari anopa runyararo, ngaave nemwi. Ameni.
Masoko o Pasi
^ Gama ngo Gama: “muromo.”
^ Vonanyi Kudurujihwa ko Magama.
^ Kana: “ifashukire.”
^ Kana: “hama jakasanwa.”
