Varoma 3:1-31
3 Ngenyi Mujudha anganangwa kuti ari nane kupinda vamweni, kana kuti kusokwa kunobeserenyi?
2 Iyena anopinda vamweni pa zvese. Vajudha vakapuwa masoko akacena a Mwari pakutanga.
3 Waro, ngenyi vamweni vakona avazivi kugondeka? Kunanga kuti kutama kwavo rutendo kunoreva kuti Mwari aazivi kugondeka here?
4 Andizvopi! Pikija kuti vandhu vanyepe, vese vanodikana kuziva kuti Mwari anobhuya cokwadi mukuvo wese, inga zvakatahwa kudari: “Kuti vese vazive kuti munobhuya cokwadi, pamunotongwa imwimwi munowina.”
5 Tinozonangenyi kudari kutama kururama kwedu kwecivonesa ururami hwa Mwari? Mwari akavonesa ushungu hwake, zvinoreva kuti aazivi kururama? (Ndiri kubhuya ngo mavereketere o vandhu.)
6 Andizvopi! Waro zvikadaro, Mwari angazotongesa kudini nyika?
7 Kudari kunyepa kwangu kuri kuitisa kuti cokwadi ca Mwari cizivike kuti Mwari akujwe, ngenyi ndiri kutongwa inga mushaishi?
8 Ngenyi ticikavereketi ngo mavereketero anonangwa ngo vandhu vanonyepa kuti: “Ngatiite zvakashata kuti zvakanaka zviviye”? Kutongwa ko vandhu ava kunozozwirana no ururami.
9 Waro toguma pa mbhejiso yapi? Itusu tiri nane kupinda vamweni here? Andizvopi! Ngokuti itusu tapera kuzviziva kuti Vajudha no Vagiriki, vese vano cishaishi;
10 ngo kuteveja zvakatahwa kuti: “Apana mundhu wakarurama, na umwe hake;
11 apana na umwe ano uzivi. Apana mundhu anopsaka Mwari.
12 Vese vakasvejeka, vandhu vese vakava vacikabesi; apana mundhu anokhombijira unyasha, apana na umwe hake.”
13 “Madokoriro avo akaita inga* makuva akashama; rurimi javo jinocengeja.” “Muromo javo jino nvenene yo nyoka.”
14 “Muromo javo jakazara ngo zvinotuka no zvinovava.”
15 “Murenje javo jinogogoma kuti jipopomeje ngazi.”
16 Zvese zvavanoita zvinoparaja no kubara ngozi,
17 ivona avarizivi gwanja ro runyararo.”
18 “Ivona avathyi Mwari.”
19 Itusu tinozviziva kuti zviro zvese zvinonangwa ngo Mutemo, ngo zvo vandhu vano Mutemo, kuti muromo yese inyarare nokuti nyika yese izive kuti ino ndava pamberi pa Mwari.
20 Ngo kudaro, apana mundhu anganangwa kuti mururami ngo kuita mabasa o mutemo, ngokuti mutemo ndiwona unotiitisa kuti tizive cishaishi.
21 Asi wari ticingashandisi mutemo, kururama ka Mwari kwakakhombijwa pambhene ngo ucapupu hunoithwa ngo Mutemo no Vaporofeti.
22 Ururami hwa Mwari hunovha mukutenda Jesu Kristu, hwecienda ku vandhu vese vano rutendo. Ngokuti apana musiyano.
23 Ngokuti vandhu vese vakashaisha vokonehwa kuvonesa rukujo hwa Mwari.
24 Ivona vakapuwa cipo co mwoyo wese, Mwari wovadanija varurami ngo ndava yo unyasha hwake hucikaezaniswi ecivasujunura ngo muripo wakaithwa ndi Kristu Jesu.
25 Mwari wakamupira inga cipo kuti muviirane naye ngo kutenda ngazi yake. Mwari wakaita zvondhozvo kuti akhombije ururami hwake. Ngokuti iyena anononoka kunyangajwa, eciregerera zvishaishi zvakaithwa kare.
26 Iyena wakaita izvi kuti akhombije ururami hwake mu mukuvo uno, kuti azove mururami paanozotatijira ururami hwake ku mundhu anotenda Jesu.
27 Waro mundhu angajikuja ngenyi? Apatona. Ngo ndava yo mutemo? Ngo ndava yo mabasa? Haiwa. Asi ngo ndava yo mutemo wo rutendo.
28 Itusu tinoziva kuti mundhu anodanijwa kuti mururami ngo ndava yo rutendo, kuciripi ngo mabasa o mutemo.
29 Kureva kuti Mwari ngo wo Vajudha basi? Andiyepivo Mwari wo vandhu vo majinja? Hina, ndiyenavo Mwari o vandhu vo majinja.
30 Zvecivoneka kuti Mwari ndi umwe basi, iyena anovona vakasokwa kuva varurami ngo ndava yo rutendo hwavo, wovonazve vacizivi kusokwa kuti varurami ngo ndava yo rutendo hwavo.
31 Waro itusu tiri kupfujura mutemo ngo ndava yo rutendo hwedu? Andizvopi! Mukusiyana, itusu tinovangisa mutemo.
Masoko o Pasi
^ Kana: “rukuro javo jakaita inga.”
