Jesu paanoha pa nyumba yo vaFarisi, kunja kwayo kunoungana zviuru zvo vandhu vacimuvetera. Vandhu vanomuunganira inga zvakamuitikiraya mu Garireya. (Marco 1:33; 2:2; 3:9) MuJudheya maari wari, vazinji vanoda kumuvona no kumuzwa, vecitatija mugariro jakasiya no jo vaFarisi vahaya nae.

Zvinozonanga Jesu zvino revo huru maningi ku vajiji vake, zvokuti: “Basopanyi mbijo yo vaFarisi: njo ujiitisi.” Jesu wakainangazve ngwajo iyi, asi zvaavona paaiha zvinovonesa kuti masoko aya anodikana ngo kukasika. (Luka 12:1; Marco 8:15) VaFarisi vanoda kuviga zvishaishi zvavo ngo kutatija kuti vanonamata, asi izvo i ngozi inodikana kudihwa pambhene. Jesu anodurujira kuti: “Apana ciro cakafisika cicingazoziviki, nokuti cakavigika cicingazovoneki.”—Luka 12:2.

Zvingaita kuti vandhu vazinji vakaunganari kutenderera Jesu i vaJudha, vacizivi kumuzwa acijijisa mu Garireya. Ngokudaro, anophinda mafundo anosirira aakabhuyazve pa mukuvo wakapera. Anobvunja vapurukiri vake kudari: “Mucathya vanouraya muviri, kuperapo apana co vanozoita.” (Luka 12:4) Inga zvaakaita pa mukuvo wakapera, Jesu anokohomejera kuti vateveri vake vanodikana kugonda kuti Mwari anozovapa zvovanoda. Ivona vanodikana kutenda kuti Jesu ndiena Mwana wo mundhu zve kuti Mwari anokwanisa kuvabesera.—Mateu 10:19, 20, 26-33; 12:31, 32.

Mwanarume umweni ari pa mbungano iyi anovonesa kuti ngocapi caanokaya-kaya maningi ndicona, paanoti: “Mujijisi! Bvunjai hama yangu kuti ikovanisane na inini utaka.” (Luka 12:13) Mutemo unonanga kuti mwana wo dangwe anodikana kupuwa mativi maviri o utaka, ngokudaro, apadikani kuva no ganijano. (Deuteronòmio 21:17) Asi zvinovoneka inga kuti mundhu uu ari kuda zvizinji kupinda zvanotendehwa. Ngo ungwaru, Jesu anoramba kunghwinira mu shwiro iyi. Iyena anomubvunjisa kudari: “Mujaha, ndiani wandiita mutongi dangani mukovanisi wenyu?”—Luka 12:14.

Perepo Jesu anopa ngwajo vese varipo, eciti: “Basopanyi muemuro yese! Ngokuti, pikija muve no bzizinji, apana anopona ngo ndava yo upfumi.” (Luka 12:15) Azvinenyi kuti mundhu ano upfumi hwakadini, iyena anozofa wosiya zvese zvaanazvo. Jesu anokohomejera fundo iri ngo mufananijo ucikakanganiki unokhombijavo kusisira ko kuva no zina rakanaka pamberi pa Mwari.

Jesu anoti: “Paiva no mukhupuki wakakotora mbeu zinji mu maminda ake. Ngokudaro wakarangarira mu hana make kuti: ‘Ndinoitenyi waro? Ngokuti andina pokudira mbeu jangu.’ Woti: ‘Ndinoita kudari: Ndinopfanyangura nyumbu jangu, ndozoruka jimweni huru, mo ndinozoviga mbeu jese no upfumi hwese. Ndinozobvunja mwoyo wangu kuti: “Uno upfumi huzinji hwakavigwa hunokwana makore mazinji. Zororai, ihai, imwai, jidakarisei.”’ Kaveta Mwari wakamubvunja kuti: ‘Uri psere! Usiku huno unozobviswa mwiha wako. Bzese bzo waperaro kuunganija bzinozosara naani?’ Ndibzona bzinozoitika no mundhu anounganija upfumi hwake, acikajiiti mukhupuki panyasi pa Mwari.”—Luka 12:16-21.

Vajiji va Jesu no vamweni vari kumupurukira, vangabatwavo ngo muravo wo kupsaka upfumi kana kuhuunganija. Kana kuti kuthimwa-thimwa muupenyu kuri kuvaphingaija pa kushandira Jehovha. Ngokudaro, Jesu anophinda mbhangiro yaushoni yaakapa pa Hurukuro yake yo pa Dundhu, pa gore no meya rakapera.

Iyena anoti: “Mucathimwa-thimwa ngo maponero enyu, kuti munozohenyi; dangani no muviri, kuti munozosimira cinyi. . . . Ringisanyi magunguvo: aasimi, aakotori, aana nyumbu yokuvigira mbuva. Kaveta Mwari anomahisa. Amuna mutengo here wokupinda xiri? . . . Ringisanyi maruva  no marebero ao: Aabati basa, aasoni; inini ndinomubvunja kuti Soromona, mu goja rake rese, aazivi kusimira kudari inga umwe wao. . . . Mucapsanga bzo munoda kuha dangani kumwa, mucathimwa-thimwa kamare; . . . Baba wenyu vanoziva kuti munobzida. Psakanyi pakutungamira Umambo hwake, ibzo munozopuwa bzakathimijika.”—Luka 12:22-31; Mateu 6:25-33.

Mbhaani vanozopsaka Umambo hwa Mwari? Jesu anotatija kuti i vashoma basi, kana kuti “muxambi mudoko,” wo vandhu vakagondeka ngo vanozozviita. Pa kufamba ko mukuvo, zvinozokhombijwa kuti mutengo wavo unokwana 144.000 basi. Vandhu ava vari kuveterenyi? Jesu anovagondesa kuti “Baba wenyu vakada kumupa Umambo.” Ivona avazobatikani pa kuunganija upfumi pasi pano, mbabva pojinokwanisa kuba. Asi mwoyo yavo inozova pa “upfumi ucingaperi mugore,” kovanozotonga na Kristu.—Luka 12:32-34.