Jesu paakandopera kubhabhatijwa, acito watanga mushando wake, wakahwisana no muvengi waida kumuitisa kuti apose. Dhiabhu waipsaka kueja Jesu kuphinda no kuphinda. Pa kufamba ko nguva, Jesu wakazonanga ngo pamusoro po mushati, eciti: “Mambo wo nyika ari kuza. Ngo bzokadi akuna caanokwanisa kondiri.”—Johani 14:30.

Mupostori Johani wakavoneswa zvinozoitikira “cikara cikuru, nyoka yo kutanga inodanwa Diabu nokuti Sathana.” Mukorore uu wakashata wo vandhu vese waizogogomehwa kumatenga, “wakazara ngo runya, anoziva kuti nguva yaanayo i doko.” (Apokalipsi 12:9, 12) MaKristu ano thangwe raushoni rokuti atende kuti ari kurarama mukati mo “nguva . . . doko” zve sambi-sambi uno “cikara . . . nyoka yokutanga,” cinozokhandihwa mu gomba rakajikisisa zve apana caanozokwanisa kuita ko 1.000 co makore. Pa mukuvo uu, Jesu anozotonga mu Umambo hwa Mwari.—Apokalipsi 20:1, 2.

Icinyi cinozoitika pa nyika pano pa mukuvo uu? Ndiani anozopona pasi pano zve upenyu hunozova hwakadini? Jesu ambhwine wakapa mupinguro. Pa mufananijo wake wo mabvuta no mbuji, Jesu wakakhombija zvinozoitikira vandhu vakarurama. Ivona vakafanana no mabvuta ngokuti vanozwirana no hama ja Jesu zve vanojiitira zvakanaka. Iyena wakajekesazve zvinozoitikira vaya vanoita zvakasiyana, vokufanana no mbuji. Jesu wakati: “Vakaxata ava [vakafanana no mbuji] vanozoenda mu nyatwa icingaperi; vakarungama [vakafanana no mabvuta] mu kupona kucingaperi.”—Mateu 25:46.

Izvo zvinotibesera kuzwisisa masoko a Jesu ku mushaishi wakakohomehwa pamutivi pake. Jesu aazivi kumupa mupfupo waakagondesa vapostori vake vakagondeka, wo kutora rutivi mu Umambo hwo kumatenga. Asi Jesu wakagondesa  mushaishi wo kukhauya uu kudari: “Zvokadi inini ndinokubvunja nyamasi kuti, iwewe unozova na inini mu Paradhiso.” (Luka 23:43, Shanduro yeNyika Itsva) Ngokudaro, mwanarume uu wakawana vetero yo kuponera mu Paradhiso—munda wakaseja, wakaezana no parki. Zvakajeka kuti vandhu vakafanana no mabvuta nyamasi uno, voenda “mu kupona kucingaperi,” vanozovavo mu Paradhiso.

Izvo zvinozwirana no zvakananga Johani ngo pamusoro po magariro anozoita nyika, ukazoguma mukuvo uu. Iyena wakati: “Nga uu muzi wa Mwari no vandhu; Ivona vanozoita vandhu vake, Mwari wozogara na ivona, wozoita Mwari wavo. Anozopukusa misoji yo mu meso mavo. Akucazovi no kufa nokuti mariji, kurira nokuti kuhwaja. Ngokuti bzokare bzakapinda.”—Apokalipsi 21:3, 4.

Kuitira kuti mushaishi wiya azorarame mu Paradhiso, anozomuswa ko vakafa. Iyena andiepi ega anozomuswa. Jesu wakazvijekesa paakati: “Inozoguma ngari yokuti vaya vari mu makuva vanozozwa izwi rake. Pondhopo vaya vakaita bzauxoni vanozomuka kuenda ko kumuka ko uhomi; vakaxaixa vaya vanozoenda ku kumuka ko” kutongwa.—Johani 5:28, 29.

Waro tingati kudini ngo vapostori vakagondeka zve vashoma vanozova na Jesu kumatenga? Bhaibheri rinonanga kuti “vanozova vapiri va Mwari no va Kristu, vanozoita majimambo na yena, pa ciuru co makore.” (Apokalipsi 20:6) Vanozotongari na Jesu i vanarume no vanakaji vanobva pa nyika pano. Ngokudaro, ivona vanozova vatongi vo kumatenga vanozwira pena zve vanozwisisa ku vandhu vari panyika pano.—Apokalipsi 5:10.

Jesu anozoshandisa muripo wake wo kujipira ku vandhu vari panyika no kuvasujunura pa ushaishi hwo utaka. Iyena no vaanozotonga navo, vanozoita kuti vandhu vese vave vakakwana. Pa mukuvo wondhowo, vandhu vanozobusa upenyu hwaaidaya Mwari pa kutanga kuti vave naho paakabvunja Adhamu na Evha kuti barananyi muzaje nyika. Pikija kufa kwakaviiswa ngo kushaisha kwa Adhamu, kunozopejwa.

Ngokudaro, Jesu anozoita zvese zvaakabvunjwa ndi Jehovha. Pa kupera ko ciuru co makore, Jesu anozopekeja Umambo no mbhuri yo ukama hwo vandhu vakakwana kuna Babake. Ecinangira ciito cinoshamaisa co kujidodokesa co divi ra Jesu, mupostori Pauro wakatara kudari: “Bzese bzikapera kudihwa pa soka jake, na yenavo Mwana anozojidodokesa ka wiya wakadira bzese pa soka, kuti Mwari ave wese [kana zvese] ku vese.”—1 VaKorinto 15:28.

Zvajeka kuti Jesu anoita basa rinosisira maningi pa kukwanirisika ko zvidisiso zvinoshamaisa zva Mwari. Zve pozvinozogara zvecikwanirisika zvidisiso izvi kwenda no kwenda, Jesu anozoita zvaakananga ngo pamusoro pake eciti: “Ndini gwanja, bzokadi no uhomi.”—Johani 14:6.