Gama rokuti “piyona” kazinji rinoreva vayani vanofunungura ndharaundha impsa zve vo funungura gwanja kuti vamweni vatevere. Jesu waiita inga piyona wakatumihwa pa nyika kuzoita mushandiri anoponesa zve kuzofunungura gwanja ro ruponeso. (Mateu 20:28) Nyamasi uno, vateveri vake vanomutevejera ngo kupeja nguva zinji, mu kuzwirana no mugarire wavo, ‘vacijijisa’. (Mateu 28:19, 20) Vamweni vanokwanisa kutora ratinodanija kuti basa ro upiyona.

Piyona i basa ro nguva jese ro kucumaera. Zvapupu zvese zva Jehovha i vacumaeri vo masoko akanaka. Asi, vamweni vanonasirira upenyu hwavo kuti vashande inga mapiyona o nguva jese, vecipeja 70 o nguva pa mweji mu basa ro kucumaera. Kuda kuita izvi, vamweni vanopungura nguva yavo yo basa ro kunyama. Vamweni vanokhetwa kuti vashande inga mapiyona kamare mundharaundha munodiwa maningi vatokotesi vo Umambo, vecipeja 130 o nguva kana kupindirija mu kucumaera pa mweji ngo mweji. Mapiyona anodakara ngo kuva no upenyu hwakareruka, vecigonda kuti Jehovha anozovapa zvavanoda pa upenyu. (Mateu 6:31-33; 1 Timoti 6:6-8) Vaya vacingakwanisi kushanda inga ma piyona o nguva jese vangashanda inga mapiyona o besero mu kuzwirana no mugariro wavo, vano engejera basa ravo ro kucumaera ngo kupeja 30 kana 50 o nguva pa mweji.

Piyona ano rudo na Mwari zve no vandhu. Kufanana na Jesu, itusu tinovona mugariro wo vazinji wo kumujimu ucina vetero. (Marco 6:34) Asi, itusu tino zivo ingakwanisa kuvabesera wari uno, vowana vetero yakavanga yo kumbeji. Rudo ku vadoni kunosunda piona kuti ape ngo kukova kwese nguva yake zve no simba rake kuti abesere vamweni kumujimu. (Mateu 22:39; 1 VaTesalònika 2:8) Inga muuyo, gonda rake rino vangiswa, ano khwedera phedo na Mwari zve ano mudakaro mukuru.—Maitiro o Vapostori 20:35.

• Ndiani piyona kwamuri?

• Icinyi cinosunda vamweni kuti vave mapiyona o nguva yakazara?