Kuti tiite zvatinokwanisa mu kutokotesa “vangeri [masoko akanaka] ricikaperi” ku “vandhu vese, nyika, majinja, ndimi no mabvumbo ese”, itusu tinobudisa mabhuku mu ndumi jinodarika 750. (Apokalipsi 14:6) Tinokwanirisa kudini basa iri rinonesa? Tinoriita no kubesehwa ngo vatari vo nyika jakasiana-siana pomwe no cikwata cinozvipira co vasanduji—vese Zvapupu zva Jehovha.

Bhuku rinotanga kunasirihwa mu cingezi. Mukhumbi Unotonga unovonerera basa ro Bauhwa ro Kutara pa cine ro nyika yese. Bauhwa iri rinoronga kugajwa ko vatari vanoshandira pa cine ro nyika yese kana ku hofisi jo macine amweni. Ngo kuva no vatari mu ndau jakasiana-siana zvinotibesera kupekeja shwiro jo maponero akasiana-siana zvoita kuti mu nyika jese mabhuku edu ave anodakajisa.

Bhuku rinotumihwa ku vasanduji. Zvikapera kutahwa, kunasirihwa zve no kutendehwa, zvinotumihwa ku zvikwata zvo vasanduji vari mu nyika zinji ngo kushandisa mucini jo mudavijano, vanoshanda mu kusanduja, kupopora zve vaverengi. Ivona vanovangisira kukheta ‘mazwi akarurama o bzokadi’ anotora ciemo cakakwana co Cingezi mu ndumi yavo.—Mucumaeri 12:10.

Basa rinokasikiswa ngo komputadhori. Komputadhori aigari pa cinyau co vatari vo vandhu zve vasanduji. Asi, basa ringakasikiriswa ngo kushandisa dura mazwi ro komputadhori zve mathurusi o kupsakisisa. Zvapupu zva Jehovha vanoshandisa muitiro wo Mucini jo Mudavijano o Kudhindha mu Ndumi Zinji (MEPS). Ngo muitirowo bhuku no ratu-ratu zvingatumihwa mu mazana o ndumi, zve zvobatanijwa, kuti zvidhindhwe.

Ngenyi itusu tinoita simba rese iri, pikija ku ndumi jinobhuiwa ngo vandhu vashoma? Ngo kuti ici i cido ca Jehovha kuti “vandhu vese vaponeswe, no kukwanisa kuziva bzokadi.”—1 Timoti 2:3, 4.

• Mabhuku edu anonasiriswa kudini?

• Ngenyi tecisanduja mabhuku edu mu ndumi zinji?